അഞ്ജു അഷറഫ്-
കൊച്ചി:
ഒരിക്കല്‍ പറഞ്ഞു നിര്‍ത്തിയിടത്തു നിന്ന് വീണ്ടും ആരംഭിക്കുകയാണ്. വാരിയംകുന്നത്ത് കുഞ്ഞുമുഹമ്മദ് ഹാജിയെ കുറിച്ചുള്ള സിനിമയാണ് ഇപ്പോള്‍ സമൂഹത്തിലും ചലച്ചിത്രമേഖലയിലും വീണ്ടും ചര്‍ച്ചാവിഷയമായിരിക്കുന്നത്.
ഒരാളുടെ ജീവിത യാത്രയെ കുറിച്ച് ഒരു സിനിമ ആകാം അല്ലെങ്കില്‍ രണ്ട്. അതിനപ്പുറത്തേക്ക് കടന്ന് വാരിയം കുന്നത്ത് കുഞ്ഞു മുഹമ്മദ് ഹാജിയുടെ ജീവിതത്തെ നാലുപേര്‍ നാല് ദിശയില്‍ നിന്ന് നോക്കിക്കാണാനാണ് ശ്രമിക്കുന്നത്.
ചരിത്രത്തില്‍സ്ഥാനം പിടിച്ച ഒരു വ്യക്തിയെക്കുറിച്ച്... മലബാറിലെ പഴമക്കാരുടെ മനസ്സില്‍ വിപ്ലവ വീര്യത്തോടെ ഇന്നും ജീവിക്കുന്ന വാരിയം കുന്നത്ത് കുഞ്ഞുമുഹമ്മദ് ഹാജിയെക്കുറിച്ച് ഏതാണ്ട് ഒരേ സമയത്താണ് നാല് സിനിമകളുടെ പ്രഖ്യാപനം ഉണ്ടാകുന്നത്. മലയാള സിനിമയിലെ ശ്രദ്ധേയനായ യുവ സംവിധായകനും നിര്‍മാതാവുമായ ആഷിക് അബു സംവിധാനം ചെയ്യുന്നചിത്രം, പി.ടി. കുഞ്ഞുമുഹമ്മദിന്റെ സിനിമ, അലി അക്ബര്‍ ഒരുക്കുന്ന ചിത്രം, ഇബ്രാഹിം വെങ്ങരയുടെ സിനിമ. നാലുപേര്‍ ഒരുക്കുന്ന നാലു സിനിമയും സംസാരിക്കുന്നത് ഒരാളെ കുറിച്ചാണ്.
ഇങ്ങനെ ഒരു ഭാഗ്യം ഇതിനുമുമ്പ് മറ്റാര്‍ക്കും ലഭിച്ചു കാണാന്‍ വഴിയില്ല. ആശയം ഒന്നാണെങ്കിലും അവതരിപ്പിക്കുന്ന രീതി വ്യത്യസ്തമായിരിക്കും... ചിത്രത്തിന്റെ ഘടനയിലും വ്യത്യാസമുണ്ടാകും. സിനിമയുടെ പ്രഖ്യാപനം നേരത്തെ ഉണ്ടായപ്പോള്‍ തന്നെ വാരിയം കുന്നത്ത് കുഞ്ഞുമുഹമ്മദ് ഹാജിയെക്കുറിച്ചും അദ്ദേഹത്തിന്റെ ജീവിതദര്‍ശനങ്ങളെ കുറിച്ചും രാഷ്ട്രീയത്തെക്കുറിച്ചും മതത്തെ കുറിച്ചുമെല്ലാം പലരും പല രീതിയില്‍ വ്യാഖ്യാനിച്ചു കണ്ടു. വാരിയം കുന്നത്ത് കുഞ്ഞുമുഹമ്മദ് ഹാജി ആരായിരുന്നു.. ? അതെക്കുറിച്ചാണ് ഈ നാല് സിനിമയിലും പരാമര്‍ശിക്കുന്നത്.
വാരിയം കുന്നത്ത് കുഞ്ഞുമുഹമ്മദ് ഹാജിയെക്കുറിച്ച് ഇപ്പോള്‍ പുതിയ നീക്കം നടത്തിയിരിക്കുന്നത് സംവിധായകന്‍ അലി അക്ബര്‍ ആണ്. 'മമ ധര്‍മ്മ' എന്ന നിര്‍മ്മാണകമ്പനി ജനകീയ പങ്കാളിത്തത്തോടെ നിര്‍മ്മിക്കുന്ന സിനിമയുടെ പേര് '1921' എന്നാണ്. സിനിമയുടെ തിരക്കഥ മൂകാംബികയില്‍ സമര്‍പ്പിച്ചുവെന്നും അമ്മയുടെ അനുഗ്രഹത്തോടെ റെക്കോര്‍ഡിങ് തുടങ്ങിയെന്നും അലി അക്ബര്‍ ഫേസ്ബുക്കില്‍ കുറിച്ചു. സിനിമയിലെ ഗാനങ്ങള്‍ക്ക് സംഗീതമൊരുക്കുന്നത് ഹരി വേണുഗോപാലാണ്.
ഡിസംബര്‍ അവസാനത്തോടെ പി ടി കുഞ്ഞുമുഹമ്മദ് സംവിധാനം ചെയ്യുന്ന സിനിമയുടെ പ്രവര്‍ത്തനങ്ങള്‍ക്ക് തുടക്കമാകുമെന്ന് കേള്‍ക്കുന്നു. ആഷിക് അബുവിന്റെ ചിത്രവുമായി ബന്ധപ്പെട്ട പ്രവര്‍ത്തനങ്ങളുടെ വിശദാംശങ്ങളൊന്നും പുറത്തുവിട്ടിട്ടില്ലെങ്കിലും 2021ല്‍ വാരിയംകുന്നത്തിന്റെ ചിത്രീകരണം ആരംഭിക്കുമെന്നാണ് അറിയുന്നത്. ഇബ്രാഹിം വെങ്ങരയുടെ സിനിമയെക്കുറിച്ചുള്ള കാര്യങ്ങളും ഉടനെ അറിയാനാവും.
പണ്ടുകാലത്ത് സിനിമ റിലീസ് ആകുന്നതിനു തൊട്ടു മുന്‍പ് ഒരു നോട്ടീസ് ഇറങ്ങും. അതിന്റെ ഒരു വശത്ത് അഭിനേതാക്കളുടെ പടങ്ങളും മറുവശത്ത് സിനിമയെ കുറിച്ചുള്ള ചെറിയൊരു കഥാസാരവും കാണും. കഥാസാരത്തിന്റെ ത്തിന്റെ അവസാനത്തില്‍ ഇങ്ങനെ എഴുതിയിട്ടുണ്ടാവും, ശേഷം സ്‌ക്രീനില്‍...
