സി എന് എ-
കൊച്ചി:
'വെള്ളം' ചിത്രത്തിന്റെ വ്യാജ പതിപ്പ് സമൂഹ മാധ്യമങ്ങളിലൂടെ ഡൗണ്ലോഡ് ചെയ്തു പ്രചരിപ്പിക്കുന്നവര്ക്കെതിരെ നിയമ നടപടിയുമായി മുന്നോട്ടു പോകുമെന്ന് ചിത്രത്തിന്റെ നിര്മ്മാതാക്കള്.
ചിത്രത്തിന്റെ വ്യാജ പതിപ്പ് പുറത്തിറങ്ങിയതിനു പിന്നാലെ നടത്തിയ പത്ര സമ്മേളനത്തിലാണ് ഇക്കാര്യം നിര്മ്മതാക്കളില് ഒരാളായ രഞ്ജിത് മണബ്രക്കാട്ട് മാധ്യമങ്ങളോട് പങ്കുവച്ചത്.
ജയസൂര്യ നായകനായി പ്രജേഷ് സെന് സംവിധാനം ചെയ്ത 'വെള്ളം' മികച്ച പ്രേക്ഷകാഭിപ്രായത്തോടെ തീയറ്ററുകളില് പ്രദര്ശനം തുടരുന്നതിനിടയിലാണ് ചിത്രം യുട്യൂബ്, ടെലിഗ്രാം തുടങ്ങിയ പല മാധ്യമങ്ങളിലൂടെ ചോര്ന്നത്.
അനധികൃതമായി ചിത്രം ചോര്ത്തി പ്രചരിപ്പിച്ചവര്ക്കെതിരെ പോലീസ് നിയമ നടപടികള് സ്വീകരിച്ചു വരുകയാണ്.
ഇതിനിടയില് ഫെബ്രുവരി 6ന് കൊച്ചി കലൂരുള്ള നന്ദിലത്തു ജി മാര്ട്ടില് ചിത്രം ഡൗണ്ലോഡ് ചെയ്തു പ്രദര്ശിപ്പിച്ചതായി കണ്ടെത്തി. ഇതിന്റെ വീഡിയോ സഹിതം എറണാകുളം നോര്ത്ത് പോലീസ് സ്റ്റേഷനില് നിര്മ്മാതാക്കളില് ഒരാളായ രഞ്ജിത് മണബ്രക്കാട്ട് പരാതി നല്കിയിട്ടുണ്ട്.
ഫ്രണ്ട്ലി പ്രോഡക്ഷന്സിന്റെ ബാനറില് ജോസ്ക്കുട്ടി മഠത്തില്, രഞ്ജിത് മണബ്രക്കാട്ട്, യദു കൃഷ്ണ എന്നിവര് ചേര്ന്നാണ് വെള്ളം നിര്മ്മിച്ചത്.
കോവിഡില് തകര്ന്ന സിനിമാ വ്യവസായം തിരികെ വരാന് ഏറെ നഷ്ട്ടങ്ങള് സഹിച്ചു തീയറ്ററില് എത്തിച്ച ചിത്രമാണ് 'വെള്ളം'. നിലവില് 180 ലേറെ തീയറ്ററുകളില് ചിത്രം വിജയകരമായി പ്രദര്ശനം തുടരുമ്പോഴാണ് ഇത്തരത്തില് ഒരു തിരിച്ചടി നേരിടേണ്ടി വന്നത്.
യുവാക്കളുടെ വലിയൊരു സംഘം ചിത്രങ്ങള് ചോര്ത്തുന്നതിനു പിന്നില് പ്രവര്ത്തിക്കുന്നുണ്ട്. ഇതിനെതിരെ കര്ശന നടപടികള് സര്ക്കാര് സ്വീകരിക്കണമെന്നും നിര്മ്മാതാവ് രഞ്ജിത് മണബ്രക്കാട്ട് പത്ര സമ്മേളനത്തിലൂടെ ആവശ്യപ്പെട്ടു.