സി എന്‍ എ-
ചെന്നൈ:
തമിഴ് നടന്‍ വിജയ്യുടെ പേരിലുള്ള രാഷ്ട്രീയ പാര്‍ട്ടി രൂപീകരണത്തില്‍ നിന്ന് പിന്മാറിയതായി അച്ഛന്‍ എസ്.എ ചന്ദ്രശേഖര്‍. പാര്‍ട്ടി രജിസ്റ്റര്‍ ചെയ്യാന്‍ നല്‍കിയ അപേക്ഷ പിന്‍വലിക്കുന്നതിനായി തെരഞ്ഞെടുപ്പ് കമ്മീഷന് കത്തയച്ചതായും ചന്ദ്രശേഖര്‍ വ്യക്തമാക്കി. വിജയ് രാഷ്ട്രീയത്തിലേക്ക് വരുമെന്നും ബിജെപിയിലേക്ക് പോകില്ലെന്നും കഴിഞ്ഞമാസം വിജയ്യുടെ അച്ഛന്‍ പ്രഖ്യാപിച്ചിരുന്നു. ഏറെകുറെ അത് ശരിവയ്ക്കുന്ന തരത്തിലായിരുന്നു കാര്യങ്ങള്‍ നീങ്ങിയത്. സമീപകാലത്ത് റിലീസ് ചെയ്ത വിജയുടെ 'മെര്‍സല്‍' പോലുള്ള സിനിമകള്‍ ഇളയദളപതി രാഷ്ട്രീയത്തിലേക്ക് ഇറങ്ങുന്നതിന്റെ സൂചനയായി പലരും കാണുകയും ചെയ്തു. വിജയ്യുടെ ഫാന്‍സായ 'ഓള്‍ ഇന്ത്യ വിജയ് മക്കള്‍ ഇയക്കം' എന്ന പേരിലാണ് രാഷ്ട്രീയ പാര്‍ട്ടി രജിസ്റ്റര്‍ ചെയ്യാന്‍ തീരുമാനിച്ചത്. ഇത് തമിഴ്‌നാട്ടില്‍ വലിയ ചര്‍ച്ചക്ക് വേദിയാവുക ചെയ്തു. എന്നാല്‍ അച്ഛന്‍ രൂപീകരിക്കുന്ന രാഷ്ട്രീയ പാര്‍ട്ടിയുമായി തനിക്ക് യാതൊരു ബന്ധവും ഇല്ലെന്നുപറഞ്ഞ് വിജയ് രംഗത്ത് വന്നതോടെ കാര്യങ്ങള്‍ കലങ്ങി മറിഞ്ഞു. തമിഴകത്ത് ഉരുണ്ടുകൂടിയ രാഷ്ട്രീയ സംവാദങ്ങളെ വിജയ് വളരെ കരുതലോടെയാണ് നേരിട്ട്. എന്റെ പിതാവ് എസ്.എ. ചന്ദ്രശേഖര്‍ ഒരു രാഷ്ട്രീയ പാര്‍ട്ടി രജിസ്റ്റര്‍ ചെയ്യുന്നതായി മാധ്യമങ്ങളിലൂടെ അറിഞ്ഞു. അച്ഛന്‍ ആരംഭിച്ച പാര്‍ട്ടിയില്‍ അണിചേരാനോ പ്രവര്‍ത്തിക്കാനോ ആരാധകരോട് ഞാന്‍പറയില്ല. എനിക്കും എന്റെ ഫാന്‍സ് അസോസിയേഷനും ഇതുമായി യാതൊരു ബന്ധവുമില്ല. എന്റെ ചിത്രമോ ഓള്‍ ഇന്ത്യാ വിജയ് മക്കള്‍ ഇയക്കംഎന്ന സംഘടനയുടെ പേരോ രാഷ്ട്രീയ കാര്യത്തിനുവേണ്ടി ഉപയോഗിക്കാന്‍ പാടില്ലെന്ന് വ്യക്തമാക്കിക്കൊണ്ട് വിജയ് വാര്‍ത്താകുറിപ്പ് ഇറക്കുകയും ചെയ്തു. പാര്‍ട്ടി രൂപീകരിക്കുക തന്റെ തീരുമാനമാണെന്ന് മുമ്പ് പ്രഖ്യാപിച്ച എസ്.എ. ചന്ദ്രശേഖര്‍ വിജയ്യുടെ കൂടെ നില്‍ക്കുന്നവര്‍ കുഴപ്പക്കാരാണെന്ന് പറയാനും മടിച്ചില്ല. ഇപ്പോള്‍ വിജയ്യുടെ പേരില്‍ രാഷ്ട്രീയ പാര്‍ട്ടി രൂപീകരണം എന്ന തീരുമാനം അദ്ദേഹംതിരുത്താന്‍ തയ്യാറായിരിക്കുന്നു. ഇതോടെ വിജയ്‌യും വിജയ്യുടെ പേരിലുള്ള രാഷ്ട്രീയ പാര്‍ട്ടിയും എന്നുള്ള എല്ലാ അഭ്യൂഹങ്ങള്‍ക്കും വിരാമമായി എന്നുവേണം കരുതാന്‍.
