സി എന്‍ എ-
കൊച്ചി:
അച്ഛനും സഹോദരനും പിന്നാലെ മോഹന്‍ലാലിന്റെ മകള്‍ വിസ്മയ മോഹന്‍ലാലും പൊതുരംഗത്തേക്ക് വരികയാണ്. മോഹന്‍ലാലും പ്രണവും അഭിനയരംഗത്ത് ആണ് നിലയുറപ്പിച്ചത്. പക്ഷെ വിസ്മയ മോഹന്‍ലാല്‍ ചിത്രരചനയുടെയും എഴുത്തിന്റെയും വഴിയിലാണ്. തായ് ആയോധന കലയിലും പ്രാവീണ്യം നേടിയിട്ടുണ്ട്.
തായ് ആയോധന കല അഭ്യസിക്കുന്നതിന്റെ വീഡിയോകള്‍ വിസ്മയ ഇന്‍സ്റ്റഗ്രാം പേജില്‍ പങ്കുവെച്ചിരുന്നു. അതു വലിയൊരു ചര്‍ച്ചക്ക് തന്നെ കാരണമായി. സിനിമകളില്‍ സജീവമല്ലെങ്കില്‍ കൂടി ഏറെ ആരാധകരുള്ള താരപുത്രിയാണ് വിസ്മയ.
ഇന്‍സ്റ്റാഗ്രാമില്‍ സജീവമായ വിസ്മയയ്ക്ക് നിരവധി ഫോളോവേഴ്‌സുണ്ട്. താന്‍ വരച്ച ചിത്രങ്ങളും തന്റെ മാര്‍ഷല്‍ ആര്‍ട്‌സ് പരിശീലന വീഡിയോകളുമൊക്കെ പലപ്പോഴായി വിസ്മയ പങ്കുവെച്ചിട്ടുണ്ട്.
ഇതില്‍ നിന്നെല്ലാം വ്യത്യസ്തമായി പുതിയൊരു മേഖലയിലേക്ക് കൂടി വിസ്മയ എത്തി ചേരുകയാണ്. എഴുത്തിനെയും വായനയുടേയും ലോകത്തുനിന്നു, വിസ്മയയുടെ സാഹിത്യ അഭിരുചി പ്രകടമാകുന്ന പുസ്തകം പ്രണയദിനത്തില്‍ പുറത്തിറങ്ങുമെന്ന് അറിയിച്ചിരിക്കുകയാണ് മോഹന്‍ലാല്‍.
ഒരു അച്ഛന്‍ എന്ന നിലയില്‍ അഭിമാനത്തോടെയാണ് മകള്‍ എഴുതിയ പുസ്തകം ഫെബ്രുവരി 14ന് പുറത്തിറങ്ങുന്ന കാര്യം പ്രഖ്യാപിക്കുന്നതെന്നും മോഹന്‍ലാല്‍ ഫേസ്ബുക്കില്‍ കുറിച്ചു.
വിസ്മയയുടെ കവിതകളും ചിത്രങ്ങളും ഉള്‍പ്പെടുന്ന പുസ്തകത്തിന് 'ഗ്രെയിന്‍സ് ഓഫ് സ്റ്റാര്‍ഡസ്റ്റ്' എന്നാണ് പേരിട്ടിരിക്കുന്നത്.
പെന്‍ഗ്വിന്‍ ബുക്‌സാണ് പുസ്തകം പുറത്തിറക്കുന്നത്. ഇന്‍സ്റ്റഗ്രാമിലൂടെ വിസ്മയയും ഈ വിവരം അറിയിക്കുകയുണ്ടായി.
ഇന്ത്യയില്‍ എവിടെയും പുസ്തകം ലഭിക്കുമെന്നും ഓണ്‍ലൈനായി ബുക്ക് ചെയ്യാമെന്നും പ്രണവ് മോഹന്‍ലാല്‍ അനിയത്തിക്ക് ആശംസ അറിയിച്ച്‌കൊണ്ട് ഇന്‍സ്റ്റഗ്രാമില്‍ കുറിക്കുകയുണ്ടായി.
