എംഎം കമ്മത്ത്
കൊച്ചി:
പ്രേക്ഷകര്‍ ആകാംക്ഷയോടെ കാത്തിരിക്കുന്ന മമ്മുട്ടി ചിത്രം 'ദി പ്രീസ്റ്റ്' മാര്‍ച്ച് 11 ന് തീയേറ്ററുകളില്‍ എത്തും.
നവാഗതനായ ജോഫിന്‍ ടി ചാക്കോ സംവിധാനം ചെയ്ത ചിത്രത്തിന്റെ റിലീസ് തിയേറ്ററുകളില്‍ സെക്കന്റ് ഷോക്ക് ഉള്ള അനുമതി സര്‍ക്കാര്‍ നിഷേധിച്ചതോടെ മാറ്റിവെച്ചിരുന്നു.
സിനിമ തീയേറ്ററുകളില്‍ സെക്കന്‍ഡ് ഷോ അനുവദിക്കുന്ന കാര്യത്തില്‍ നിലനിന്നിരുന്ന എല്ലാ അനിശ്ചിതത്വങ്ങള്‍ക്കും വിരാമമിട്ട് കൊണ്ട് തീയേറ്ററുകളുടെ പ്രവര്‍ത്തന സമയം ക്രമീകരിച്ച് ഇന്ന് സര്‍ക്കാര്‍ ഉത്തരവ് പുറപ്പെടുവിച്ചതോടെ
നിര്‍മ്മാതാക്കള്‍ ചിത്രത്തിന്റെ റിലീസ് ഡേറ്റ് അറിയിക്കുകയായിരുന്നു.
ആദ്യം മാര്‍ച്ച് 4 നാണ് ചിത്രത്തിന്റെ റിലീസ് പ്രഖ്യാപിച്ചിരുന്നത്. എന്നാല്‍ പല രാജ്യങ്ങളിലെയും തിയേറ്ററുകള്‍ അടഞ്ഞുകിടക്കുന്നതിനാലും കേരളത്തിലെ തിയേറ്ററുകളില്‍ ദിവസേന നാല് ഷോകള്‍ നടത്താന്‍ കഴിയാത്തതിനാലുമാണ് റിലീസ് നീട്ടിയിരുന്നത്.
സംവിധായകന്‍ ജോഫിന്‍ ടി ചാക്കോ ഫേസ്ബുക്ക് പേജിലൂടെ ചിത്രത്തിന്റെ റിലീസ് നീട്ടിയതിനെ കുറിച്ച് വെളിപ്പെടുത്തിയിട്ടുണ്ടായിരുന്നു.
ഇപ്പോള്‍ ഇതാ മാര്‍ച്ച് 11 ന് 'ദി പ്രീസ്റ്റ്' തീയേറ്ററുകളില്‍ റിലീസ് ഡേറ്റ്് മെഗാസ്റ്റാര്‍ മമ്മുട്ടി തന്റെ ഫേസ് ബുക്ക് പേജിലൂടെ ഒരു പുതിയ പോസ്റ്ററും പങ്കുവെച്ച് അറിയിച്ചിരിക്കുകയാണ്.
മമ്മൂട്ടിയും മഞ്ജുവാര്യരും ആദ്യമായി ഒരുമിച്ചെത്തുന്ന ത്രില്ലര്‍ ചിത്രമാണ് 'ദി പ്രീസ്റ്റ്'. മമ്മൂട്ടിക്കും മഞ്ജു വാര്യര്‍ക്കുമൊപ്പം 'കൈദി' ഫെയിം ബേബി മോണിക്ക, നിഖില വിമല്‍, ശ്രീനാഥ് ഭാസി, മധുപാല്‍, ജഗദീഷ്, എന്നിവരും ചിത്രത്തില്‍ പ്രധാന വേഷത്തിലെത്തുന്നുണ്ട്.
വൈദികന്റെ വേഷത്തിലാണ് മമ്മുട്ടി എത്തുന്നത്. ആന്റോ ജോസഫ് ഫിലിം കമ്പനിയും ആര്‍.ഡി ഇല്ലുമിനേഷന്‍സ് പ്രസന്‍സിന്റെയും ബാനറില്‍ ആന്റോ ജോസഫും, ബി ഉണ്ണികൃഷ്ണനും വി.എന്‍ ബാബുവും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രത്തിന്റെ കഥ സംവിധായകന്റേത് തന്നെയാണ്. തിരക്കഥയൊരുക്കിയിരിക്കുന്നത് ദീപു പ്രദീപും ശ്യാം മേനോനും ചേര്‍ന്നാണ്.
Online PR - CNA
