CNA
കൊച്ചി:
മലയാള സിനിമയുടെ ചരിത്രത്തില്‍ ആദ്യമായി രണ്ടു നായക്കുട്ടികള്‍ ചേര്‍ന്ന് 'നജസ്സ്' എന്ന സിനിമയുടെ പോസ്റ്റര്‍ പ്രകാശനം ചെയ്തു. നജസ്സ് An inpure story യുടെ സെക്കന്റ് ലുക്ക് പോസ്റ്റര്‍ പ്രകാശന കര്‍മ്മമാണ്, കൊച്ചിയിലെ പ്രമുഖ പെറ്റ് ഷോയായ പാം സമ്മിറ്റില്‍ വച്ച് നടന്നത്. നജസ്സില്‍ പ്രധാന കഥാപാത്രമായി അഭിനയിച്ച കുവിയും മറ്റൊരു നായകുട്ടിയായ ട്യൂട്ടും ചേര്‍ന്നാണ് 'നജസ്സി'ന്റെ സെക്കന്റ് ലുക്ക് പോസ്റ്റര്‍ പ്രകാശനം ചെയ്തത്.
ചടങ്ങില്‍ ചിത്രത്തിന്റെ നിര്‍മ്മാതാവും, ഗാനരചയിതാവുമായ മുരളി നീലാംബരി, പ്രശസ്ത നടന്‍ കൈലാഷ്, അമ്പിളി ഔസേപ്പ് സംവിധായകന്‍ ശ്രീജിത്ത് പൊയില്‍ക്കാവ്, പബ്ലിസിറ്റി കോര്‍ഡിനേറ്റര്‍ വിഷ്ണു രാംദാസ് എന്നിവര്‍ സംസാരിച്ചു. നായിക വേഷം അവതരിപ്പിച്ച നായ കുവിയെ കൈലാഷും കുവിയുടെ ട്രെയിനറായ അജിത്ത് മാധവനെ അമ്പിളി ഔസേപ്പും പൊന്നാട അണിയിച്ച് ആദരിച്ചു. സ്‌നേഹത്തിന്റെയും സാഹോദര്യത്തിന്റെയും പുതിയ വാതായനങ്ങള്‍ തുറക്കുന്ന പ്രതീകമായി മാറി ചടങ്ങ്.
അനവധി ദേശീയ അന്തര്‍ ദേശീയ ചലച്ചിത്രമേളകളില്‍ അംഗീകാരം നേടിയ 'നജസ്സ് 'സാമൂഹിക പ്രസക്തിയുടെ പുതിയ ചിന്തകള്‍ ഉണര്‍ത്താന്‍ ശ്രമിക്കുന്നതാവുമെന്ന് സംവിധായകന്‍ ശ്രീജിത്ത് പൊയില്‍ക്കാവ് പറഞ്ഞു.
'വരി: ദി സെന്റന്‍സ്' എന്ന ചിത്രത്തിലൂടെ സംസ്ഥാന അവാര്‍ഡ് ജേതാവായ ശ്രീജിത്ത് പൊയില്‍ക്കാവ് സംവിധാനം ചെയ്യുന്ന നജസ്സില്‍
മനുഷ്യ മനസ്സിന്റെ ആന്തരിക കലാപങ്ങളെ ഹൃദയസ്പര്‍ശിയായി അവതരിപ്പിക്കുന്നു. ഡോക്ടര്‍ മനോജ് ഗോവിന്ദന്‍ നിര്‍മിക്കുന്ന ഈ ചിത്രത്തില്‍ മുരളി നീലാംബരി,പ്രകാശ് സി നായര്‍ എന്നിവര്‍ സഹനിര്‍മ്മാതാക്കളാണ്. നീലാംബരി പ്രൊഡക്ഷന്‍സ് വൈഡ് സ്‌ക്രീന്‍ മീഡിയ പ്രൊഡക്ഷന്‍സ് എന്നിവര്‍ സംയുക്തമായിട്ടാണ് നജസ്സ് അവതരിപ്പിക്കുന്നത്.
നായയുടെ കഥാപാത്രത്തെയും, മനുഷ്യ കഥാപാത്രങ്ങളെയും സമന്വയിപ്പിക്കുന്ന അപൂര്‍വമായ പ്രതിനിധാനവും, മികച്ച സാങ്കേതിക ഘടനകളും ഗൗരവമായി ഈ ചിത്രത്തില്‍ വിലയിരുത്തപ്പെടുന്നു. നിരവധി അന്താരാഷ്ട്ര ചലച്ചിത്രമേളകളില്‍ മികച്ച ചിത്രത്തിനുള്ള പുരസ്‌കാരങ്ങളും പ്രേക്ഷക ശ്രദ്ധയും നേടിക്കഴിഞ്ഞ 'നജസ്സ്', മെയ് 29ന് പ്രദര്‍ശനത്തിനെത്തും.
Online PR - CinemaNewsAgency.Com
