CNA
തിരു:
പതിമൂന്നാമത് രാജ്യാന്തര ഹ്രസ്വചലച്ചിത്ര മേളയില്‍ മികച്ച ലോങ് ഡോക്യൂമെന്ററിക്കുള്ള പുരസ്‌കാരം 'അറ്റ് ഹോം വാക്കിങ്' നേടി.
മനുഷ്യ ജീവിതത്തിന്റെ വേഗതയേയും പുരോഗതിയേയും അന്വേഷിക്കുന്നതാണ് ചിത്രത്തിന്റെ പ്രമേയം. 'മൈ മദര്‍സ് ഗേള്‍ ഫ്രണ്ട്' ആണ് മേളയിലെ മികച്ച കഥാചിത്രം. മറാത്തി സംവിധായകനായ അരുണ്‍ ഫുലാര ആണ് ചിത്രത്തിന്റെ സംവിധായകന്‍.
സ്ത്രീകളുടെ മേലുള്ള പുരുഷാധിപത്യം ചര്‍ച്ചചെയ്യുന്ന 'ടെസ്റ്റിമോണി ഓഫ് അന'യാണ് മേളയിലെ മികച്ച ഷോര്‍ട്ട് ഡോക്കുമെന്ററി. സച്ചിന്‍ ധീരജ് മുടിഗോണ്ടയാണ് ചിത്രം ഒരുക്കിയത്.
'ദി ലാസ്റ്റ് മാന്‍' ലോങ് ഡോക്യൂമെന്ററി വിഭാഗത്തില്‍ രണ്ടാം സ്ഥാനം നേടി. ദക്‌സിന്‍ കുമാര്‍ ബജ്‌റംഗി ആണ് ചിത്രത്തിന്റെ സംവിധായകന്‍.
രണ്ടാമത്തെ മികച്ച ഷോര്‍ട്ട് ഡോക്യൂമെന്ററിക്കുള്ള പുരസ്‌ക്കാരം മലയാള ചിത്രമായ 'മാറ്റിവച്ച പങ്ക്', 'റാപ്പര്‍' എന്നീ ചിത്രങ്ങള്‍ പങ്കിട്ടു. 'കല്‍സുബൈ' എന്ന ചിത്രം ഈ വിഭാഗത്തില്‍ ജൂറിയുടെ പ്രത്യേക പരാമര്‍ശം നേടി.
കൗമാരങ്ങളുടെ സവിശേഷ ജീവിതം അടയാളപ്പെടുത്തിയ 'ക്യാറ്റ് ഡോഗ്' ആണ് ഷോര്‍ട്ട് ഫിക്ഷന്‍ വിഭാഗത്തില്‍ മികച്ച രണ്ടാമത്തെ ചിത്രമായത്. അഷ്മിത ഗുഹയാണ് ചിത്രത്തിന്റെ സംവിധായിക. 'സൈക്കിള്‍' എന്ന ചിത്രം ഈ വിഭാഗത്തില്‍ ജൂറിയുടെ പ്രത്യേക പരാമര്‍ശം നേടി.
മാക്മര്‍ സംവിധാനം ചെയ്ത 'ബേണും രാജ് ഗോവിന്ദ് സംവിധാനം ചെയ്ത 'അണ്‍ സീന്‍ വോയ്‌സസുമാണ് മികച്ച ക്യാമ്പസ് ചിത്രത്തിനുള്ള പുരസ്‌ക്കാരം പങ്കിട്ടത്.
നിഖില്‍ എസ് പ്രവീണ്‍ ആണ് മേളയിലെ മികച്ച ഡോക്യൂമെന്ററി ഛായാഗ്രാഹകന്‍.
'എ ബിഡ് ഫോര്‍ ബംഗാളിന്റെ എഡിറ്റര്‍ ഋതു പര്‍ണസാഹാ ലോങ് ഡോക്യൂമെന്ററി വിഭാഗത്തില്‍ മികച്ച ചിത്ര സംയോജകനായി തെരഞ്ഞെടുക്കപ്പെട്ടു.
ലോങ്ങ് ഡോക്യൂമെന്ററി വിഭാഗത്തില്‍ 'ഹോം അഡ്രസ്സ്', 'വണ്‍സ് അപ്പോണ്‍ എ വില്ലേജ്' എന്നീ ചിത്രങ്ങള്‍ ജൂറി പരാമര്‍ശം നേടി.
ചടങ്ങില്‍ ഇത്തവണത്തെ ലൈഫ് ടൈം അച്ചീവ്‌മെന്റ് പുരസ്‌കാരം നേടിയ രഞ്ജന്‍ പാലിത്തിനു വേണ്ടി നാച്ചിമുത്തു പുരസ്‌കാരം ഏറ്റുവാങ്ങി.
Courtesy : Kerala State Chalachitra Academy
