ന്യൂസ് ഡെസ്‌ക്-
തൊടുപുഴ:
തമിഴിലെ പ്രശസ്ത നടന്‍ വിജയ് സേതുപതി വീണ്ടും മലയാളത്തിലെത്തി. മലയാളവുമായി വിജയസേതുപതിക്ക് പ്രത്യേകമായൊരു അടുപ്പമുള്ളതുകൊണ്ട് കൂടിയാണ് രണ്ടാമത്തെ വരവ്. 'മാര്‍ക്കോണി മത്തായി' എന്ന ആദ്യചിത്രത്തില്‍ ജയറാമിനൊപ്പമാണ് അഭിനയിച്ചെങ്കിലുംസിനിമ വേണ്ടത്ര ശ്രദ്ധിക്കപ്പെട്ടില്ല. നവാഗത സംവിധായിക ഇന്ദു വി.എസ് ഒരുക്കുന്ന സാമൂഹ്യപ്രസക്തിയുള്ള ചിത്രമാണ് '19(1)(a)'. സിനിമയുടെ പ്രാധാന്യവും കഥാപാത്രത്തിന്റെ പൂര്‍ണതയും മനസ്സിലാക്കി തന്നെയാവണം വിജയ് സേതുപതിയുടെ രണ്ടാം വരവ്. അഭിനയപ്രാധാന്യമുള്ള കഥാപാത്രങ്ങളിലൂടെ തമിഴില്‍ ചരിത്രം കുറിച്ച നടനാണ് വിജയസേതുപതി. മലയാളത്തിലെ മികച്ച നടന്‍മാരായ ഇന്ദ്രജിത്തും ഇന്ദ്രന്‍സും ആണ് വിജയസേതുപതിയുടെ ഒപ്പമുള്ള മറ്റ് രണ്ട് പ്രധാന നടന്‍മാര്‍. നിത്യ മേനോനാണ് നായിക. ഹിന്ദിയും ഇംഗ്ലീഷും ഉള്‍പ്പെടെ വിവിധഭാഷാ ചിത്രങ്ങളില്‍ അഭിനയിച്ചു ഇന്ത്യന്‍ സിനിമയിലെ തന്നെ വളരെ പോപ്പുലറായ നടിമാരിലൊരാളാണ് നിത്യാമേനോന്‍. മലയാളത്തില്‍ നിത്യാമേനോന്‍ ആദ്യമായി അഭിനയിക്കുന്നത് 2008ല്‍ ആകാശഗോപുരം എന്ന സിനിമയിലാണ്. 2019ല്‍ 'പ്രാണ', 'കോളാമ്പി' എന്നീ ചിത്രങ്ങളില്‍ അഭിനയിച്ചു. കഴിഞ്ഞ പന്ത്രണ്ട് വര്‍ഷങ്ങള്‍ക്കിടയില്‍ നിത്യാമേനോന്‍ മലയാളത്തില്‍ അഭിനയിക്കുന്ന ഇരുപതാമത്തെ സിനിമയാണ് '19(1)(a)'. മറ്റു ഭാഷാ ചിത്രങ്ങളുടെ കണക്കുവേറെയാണ്. തനിക്ക് ഇഷ്ടപ്പെടുന്ന നല്ല കഥയും അഭിനയപ്രാധാന്യമുള്ള കഥാപാത്രവും ഉണ്ടെങ്കില്‍ മാത്രം അഭിനയിക്കാന്‍ തയ്യാറാവുന്ന അപൂര്‍വം നടിമാരില്‍ ഒരാളാണ് നിത്യാമേനോന്‍.അഭിനയിച്ച സിനിമകളുടെ എണ്ണം കുറവാണെങ്കിലും കഥാപാത്രങ്ങള്‍ ശ്രദ്ധിക്കപ്പെട്ടവയാണ്. ആര്‍ട്ടിക്കിള്‍ '19(1)(a)' ഇന്ത്യന്‍ ഭരണഘടന അനുവദിച്ച മൗലിക അവകാശമാണ് ഈ നിയമം. ഇന്ത്യന്‍ പൗരന്‍മാര്‍ക്ക് അഭിപ്രായ സ്വാതന്ത്ര്യം നല്‍കുന്നു. സിനിമയുടെ തിരക്കഥ എഴുതിയിരിക്കുന്നത് സംവിധായിക ഇന്ദു വി എസ് തന്നെയാണ്. ചായാഗ്രഹണം- മനീഷ് മാധവന്‍, എഡിറ്റിങ്- വിജയ് ശങ്കര്‍, സംഗീതം- ഗോവിന്ദ് വസന്തന്‍, പ്രൊഡക്ഷന്‍ കണ്‍ട്രോളര്‍- അലക്‌സ് കുര്യന്‍, ആന്റോ ജോസഫ് ഫിലിം കമ്പനിയുടെ ബാനറില്‍ ആന്റോജോസഫ് നിര്‍മിക്കുന്ന '19(1)(a)'യുടെ ചിത്രീകരണം തൊടുപുഴയില്‍ പുരോഗമിക്കുന്നു. പ്രധാന അഭിനേതാക്കളായ വിജയസേതുപതി നിത്യാമേനോന്‍ ഇന്ദ്രജിത്ത് ഇന്ദ്രന്‍സ് എന്നിവര്‍ ലൊക്കേഷനില്‍ എത്തിയിട്ടുണ്ട്.
