എഎസ് ദിനേശ്-
കൊച്ചി :
മണ്മറഞ്ഞ പ്രശസ്ത സംവിധായകനായ ഐ.വി. ശശിയുടെ സ്മരണാര്ഥം 'ഫസ്റ്റ് ക്ലാപ്പ്' എന്ന സാംസ്ക്കാരിക സംഘടന സംഘടിപ്പിച്ച പ്രഥമ IV Sasi Film Award 2020 യുടെയും ഷോര്ട്ട് ഫിലിം ജനറല്, ക്യാമ്പസ്, പ്രവാസി വിഭാഗങ്ങളുടെയും, മ്യൂസിക്കല് ആല്ബം ഫെസ്റ്റിവലിന്റെയും വിജയികളെ സംഘടനയുടെ YouTube Channel ലൂടെ പ്രഖ്യാപിച്ചു.
2019 ല് റിലീസ് ചെയ്ത main stream feature film കളില് നിന്ന് മികച്ച നവാഗത സംവിധായകനെയും മികച്ച രണ്ടാമത്തെ നവാഗത സംവിധാകനെയുമാണ് ജൂറി ഈ അവാര്ഡിനായി തിരഞ്ഞെടുത്തത്. സംവിധാനം ഒഴികെയുള്ള ഇതര ചലച്ചിത്ര തലങ്ങളില് മികവേറിയ പ്രകടനം കാഴ്ച്ച വെച്ച ഒരു നവാഗത പ്രതിഭയെ കൂടി അവാര്ഡിന് പരിഗണിക്കണമെന്ന ജൂറിയുടെ പ്രത്യേക പരാമര്ശം പരിഗണിച്ച് ഇത്തവണ ഈ വിഭാഗത്തിലേക്ക് പരിഗണിച്ചത് മികച്ച പുതുമുഖ നടിയെയാണ്. തിരക്കഥാകൃത്ത് ജോണ് പോള്, സംവിധായകന് റോഷന് ആന്ഡ്രൂസ്, നിര്മ്മാതാവ് VBK Menon എന്നിവരടങ്ങിയ ജൂറിയാണ് വിജയികളെ തിരഞ്ഞെടുത്തത്.
വിധി പ്രഖ്യാപനം നടത്തിയത് പ്രശസ്ത സംവിധായകരായ ഹരിഹരന്, പ്രിയദര്ശന്, പ്രശസ്ത ചലച്ചിത്ര നടി മഞ്ജു വാര്യര് എന്നിവരാണ് '2019ലെ മികച്ച നവാഗത സംവിധായകനുള്ള ഐ.വി. ശശി ചലച്ചിത്ര പുരസ്ക്കാരത്തിന് അര്ഹനായത് 'ഹെലന്' എന്ന ചിത്രത്തിന്റെ സംവിധാന മികവിന് മാത്തുക്കുട്ടി സേവ്യറാണ്. വിധി പ്രഖ്യാപനം നിര്വ്വഹിച്ചത് പ്രശസ്ത സംവിധായകന് ഹരിഹരന്.
മികച്ച രണ്ടാമത്തെ നവാഗത സംവിധായകനുള്ള പുരസ്ക്കാരം 'ഉയരെ' എന്ന ചിത്രത്തിന്റെ സംവിധായകന് മനു അശോകിനാണ് ലഭിച്ചത്. ജേതാവിനെ പ്രഖ്യാപിച്ചത് സംവിധായകന് പ്രിയദര്ശനാണ്. മികച്ച നടിക്കുള്ള ജൂറിയുടെ പ്രത്യേക പരാമര്ശത്തിനര്ഹയായത് 'ഹെലന്', 'കുമ്പളങ്ങി നൈറ്റ്സ്' എന്നീ ചിത്രകളിലെ മികച്ച പ്രകടനത്തിന് അന്നാ ബെന് ആണ്. ഈ അവാര്ഡിന്റെ വിധി പ്രഖ്യാപനം നിര്വ്വഹിച്ചത് പ്രശസ്ത ചലച്ചിത്ര നടി മഞ്ജുവാര്യരാണ്.
മികച്ച നവാഗത സംവിധായകന് 50000 രൂപയും കലാ സംവിധായകന് ശ്രീ നേമം പുഷ്പരാജ് രൂപകല്പ്പന ചെയ്ത ശില്പവും പ്രശസ്തി പത്രവുമാണ് പുരസ്ക്കാരമായി ലഭിക്കുക. രണ്ടാം സ്ഥാനത്തിനര്ഹനായ നവാഗത സംവിധായകന് ശില്പവും പ്രശസ്തി പത്രവും ലഭിക്കും. ജൂറിയുടെ പ്രത്യേക പരാമര്ശത്തിനര്ഹയായ നടിക്ക് ലഭിക്കുക ചലച്ചിത്ര രംഗത്തെ തലമുറകളുടെ ഗുരുനാഥനായ സംവിധായകന് KG ജോര്ജ്ജിന്റെ പേരില് ചലച്ചിത്ര മലയാള കൂട്ടായ്മയായ KG George Cetnre for Cinema യുടെ പേരില് നല്കുന്ന ശില്പവും പ്രശസ്തിപത്രവുമാണ്. ഈ അവാര്ഡ് സ്പോണ്സര് ചെയ്യുന്നത് സംവിധായകന് ശ്യാംദറിന്റെ സ്ഥാപനമായ Westford Institute of Film & Television Technology ആണ്.
ഐ.വി.ശശിയുടെ ശിഷ്യന്മാരായ ജോമോന്, പത്മകുമാര്, ഷാജൂണ് കാര്യാല് എന്നിവരാണ് ഐ.വി. ശശി ചലച്ചിത്ര പുരസ്ക്കാരത്തിന്റെയും ഷോര്ട്ട് ഫിലിം, മ്യൂസിക്കല് ആല്ബം പുരസ്ക്കാരങ്ങളുടെയും രക്ഷാധികാരികള്.
കോവിഡിന് ശേഷം എറണാകുളത്ത് വെച്ച് സംഘടിപ്പിക്കുന്ന വര്ണ്ണശബളമായ ചടങ്ങില് വെച്ച് പുരസ്ക്കാര ദാനം നിര്വ്വഹിക്കാന് സംഘടന തീരുമാനിച്ചിട്ടുണ്ട്.
ഐ.വി. ശശിയുടെ പത്നിയും പ്രമുഖ നടിയുമായ സീമയുടെ അനുഗ്രഹാശിസുകളോടെ നടത്തിയ ചടങ്ങില് ഫസ്റ്റ് ക്ലാപ്പിന്റെ പ്രസിഡന്റ് ജസ്റ്റിന് തച്ചില്, ഫെഫ്ക പ്രസിഡന്റ് സിബി മലയില്, ഫെഫ്ക, AIFEC എന്നിവയുടെ ജനറല് സെക്രട്ടറി ബി. ഉണ്ണികൃഷ്ണന്, കേരള സംസ്ഥാന ചലച്ചിത്ര അക്കാഡമിയുടെ ചെയര്മാന് കമല്, മാക്ട ചെയര്മാന് ജയരാജ്, ഫെഫ്ക ഡയറക്ടേഴ്സ് യൂണിയന് പ്രസിഡന്റ് രഞ്ജി പണിക്കര്, ജനറല് സെക്രട്ടറി ജി. എസ്. വിജയന്, നിര്മ്മാതാക്കളായ പി. വി. ഗംഗാധരന്, ലിബര്ട്ടി ബഷീര്, കേരള ഫിലിം പ്രൊഡ്യൂസേഴ്സ് അസോസിയേഷന് പ്രസിഡന്റ് എം. രഞ്ജിത്ത്, ഫിലിം ഡിസ്ട്രിബ്യൂട്ടേഴ്സ് അസോസിയേഷന് പ്രസിഡന്റ് സിയാദ് കോക്കര്, അമ്മ ജനറല് സെക്രട്ടറി ഇടവേള ബാബു എന്നിവര് ആശംസകള് അര്പ്പിച്ചു. വരും വര്ഷങ്ങളില് ചലച്ചിത്ര രംഗത്തെ സാങ്കേതിക പ്രവര്ത്തകരെയും നടീ നടന്മാരെയും മികവിന്റെ അടിസ്ഥാനത്തില് ഐ.വി.ശശി ചലച്ചിത്ര പുരസ്ക്കാരത്തിന് പരിഗണിക്കുവാന് ഫസ്റ്റ് ക്ലാപ്പ് തീരുമാനിച്ചിട്ടുണ്ട്.
മ്യൂസിക്ക് ആല്ബം വിഭാഗത്തില് ഏറ്റവും നല്ല ഗാനരചയിതാവിനുള്ള പുരസ്ക്കാരം 'ഓണമാണ്' എന്ന ഗാനം എഴുതിയ കവിപ്രസാദ് ഗോപിനാഥിന് ലഭിച്ചു. ചലച്ചിത്രഗാന രചയിതാവ് ബി. ഹരി നാരായണന് ഈ പുരസ്ക്കാരം പ്രഖ്യാപിച്ചു. ബെസ്റ്റ് മ്യൂസിക്ക് ഡയറക്ടര്ക്കുള്ള അവാര്ഡ് 'റിത്വ' എന്ന ആല്ബത്തിന്റെ മ്യൂസിക്ക് ഡയറക്ടര് സുദീപ് പാലനാട് കരസ്ഥമാക്കി. സംഗീത സംവിധായകന് സെജോ ജോണ് ഈ പുരസ്കാരം പ്രഖ്യാപിച്ചു. ഏറ്റവും നല്ല ആല്ബം ഡയറക്ടര്ക്കുളള പുരസ്ക്കാരം സംവിധായകന് ജിബു ജേക്കബ് പ്രഖ്യാപിച്ചു. ചന്ദ്രേട്ടായനം എന്ന ആല്ബത്തിന്റെ ഡയറക്ടര് ആദിത്യ ചന്ദ്രശേഖരനാണ് ഈ പുരസ്ക്കാരം ലഭിച്ചത്. കാപ്പിച്ചാന് നിര്മ്മിച്ച 'ഓണമാണ്' എന്ന ഗാനം ഏറ്റവും നല്ല ആല്ബത്തിനുള്ള അവാര്ഡ് കരസ്ഥമാക്കി. പ്രശസ്ത സംഗീത സംവിധായകന് ഗോപി സുന്ദര് ഈ അവാര്ഡ് പ്രഖ്യാപിച്ചു.
ക്യാമ്പസ് വിഭാഗത്തില് മികച്ച സംവിധായകനായി കെ. ആര്. നാരായണന് ഇന്സ്റ്റിറ്റിയൂട്ട് ഓഫ് വിഷ്വല് സയന്സ് ആന്റ് ആര്ട്ട്സിലെ ഷജിന് സാം തെരഞ്ഞെടുക്കപ്പെട്ടു. സംവിധായകന് ജി. മാര്ത്താണ്ഡന് ഈ അവാര്ഡ് പ്രഖ്യാപിച്ചു. മികച്ച ക്യാമ്പസ് ഷോര്ട്ട് ഫിലിമായി കെ. ആര്. നാരായണന് ഇന്സ്റ്റിറ്റിയൂട്ട് ഓഫ് വിഷ്വല് സയന്സ് ആന്റ് ആര്ട്ട്സിലെ വിദ്യാര്ത്ഥികള് നിര്മ്മിച്ച 'ഭ്രമണം' തെരഞ്ഞെടുക്കപ്പെട്ടു. സംവിധായകന് മധു സി. നാരായണന് ഈ അവാര്ഡ് പ്രഖ്യാപിച്ചു.
പ്രവാസി വിഭാഗത്തിലെ മികച്ച ഫിലിമായി തെരഞ്ഞെടുക്കപ്പെട്ട ദൗഫല് അന്തിക്കാട് നിര്മ്മിച്ച 'കടലാഴം' എന്ന ചിത്രത്തിനുള്ള പുരസ്ക്കാരം സംവിധായിക വിധു വിന്സന്റ് പ്രഖ്യാപിച്ചു. മികച്ച പ്രവാസി ഷോര്ട്ട് ഫിലിം സംവിധായകനായി 'ജാന്വി' എന്ന ഷോര്ട്ട് ഫിലിമിന്റെ സംവിധായകന് രഞ്ജീഷ് മുണ്ടയ്ക്കല് തെരഞ്ഞെടുക്കപ്പെട്ടു. സംവിധായകന് സുന്ദര്ദാസ് ഈ പുരസ്ക്കാരം പ്രഖ്യാപിച്ചു.
ജനറല് വിഭാഗത്തില് 'അതിര്' എന്ന ഷോര്ട്ട് ഫിലിമില് നല്ല പ്രകടനം കാഴ്ച്ചവച്ച നന്ദിതാദാസ് ജൂറിയുടെ പ്രത്യേക പരാമര്ശത്തിന് അര്ഹയായി. സംവിധായകന് ജോമോന് ഈ പുരസ്ക്കാരം പ്രഖ്യാപിച്ചു. മികച്ച നടിയായി മഹാരാഷ്ട്രയില് നിന്നുള്ള RJP ഫിലിംസ് നിര്മ്മിച്ച 'Sorry for Your Loss' എന്ന ഷോര്ട്ട് ഫിലിമിലെ അഭിനയത്തിന് വീരാ ദസ്തൂരി തെരഞ്ഞെടുക്കപ്പെട്ടു. പ്രശസ്ത നടി മിയ ജോര്ജ്ജ് ഈ അവാര്ഡ് പ്രഖ്യാപിച്ചു. ഏറ്റവും നല്ല നടനായി 'പേര് മുസ്താക് അലി' എന്ന ചിത്രത്തിലൂടെ തെരഞ്ഞെടുക്കപ്പട്ട ഷിജു പവിത്രനുളള അവാര്ഡ് പ്രശസ്ത നടന് ജോജു ജോര്ജ്ജ് പ്രഖ്യാപിച്ചു. മികച്ച എഡിറ്റര്ക്കുള്ള അവാര്ഡ് പ്രശസ്ത ഫിലിം എഡിറ്റര് ഇ. എസ്. സൂരജ് പ്രഖ്യാപിച്ചു. 'ഹരിച്ചാലും ഗുണിച്ചാലും ഒന്ന്' എന്ന ഷോര്ട്ട് ഫിലിമിന്റെ എഡിറ്റര് ഫിന് ജോര്ജ്ജ് ഈ അവാര്ഡിന് അര്ഹനായി. മികച്ച ഛായാഗ്രാഹകനുളള പുരസ്ക്കാരം പ്രശസ്ത ഛായാഗ്രാഹകന് അളഗപ്പന് പ്രഖ്യാപിച്ചു. കള്ട്ട് കമ്പനി പ്രൊഡക്ഷന്സിന്റെ ബാനറില് കിരണ് തങ്കച്ചന് നിര്മ്മിച്ച 'അതിര്' എന്ന ഷോര്ട്ട് ഫിലിമിലൂടെ മൃദുല് എസ് ഈ അവാര്ഡിന് അര്ഹനായി. മികച്ച തിരക്കഥാകൃത്തിനുള്ള പുരസ്ക്കാരം 'അതിര്' എന്ന ഷോര്ട്ട് ഫിലിമിന്റെ തിരക്കഥ രചിച്ച മൃദുല് എസ്, വിനായക് എസ് എന്നിവര് പങ്കിട്ടു. നടനും സംവിധായകനുമായ മധുപാല് ഈ അവാര്ഡ് പ്രഖ്യാപിച്ചു. മികച്ച സംവിധായകനായി 'അതിര്' സംവിധാനം ചെയ്ത ഫാസില് റസാഖ് തെരഞ്ഞെടുക്കപ്പെട്ടു. യുവ സംവിധായകന് മിഥുന് മാനുവല് തോമസ് ഈ പുരസ്ക്കാരം പ്രഖ്യാപിച്ചു. മികച്ച ചിത്രമായി തെരഞ്ഞെടുക്കപ്പെട്ട, സോണി സാം നിര്മ്മിച്ച് നഹാസ് സംവിധാനം ചെയ്ത 'ഹരിച്ചാലും ഗുണിച്ചാലും ഒന്ന്' എന്ന ഷോര്ട്ട് ഫിലിമിനുള്ള അവാര്ഡ് ജൂറി ചെയര്മാന് ലിജോ ജോസ് പല്ലിശേരി പ്രഖ്യാപിച്ചു.