അഞ്ജു അഷറഫ്-
കൊച്ചി:
ഇരുപത്തിയഞ്ചാമത് ഐ എഫ് എഫ് കെ ചലച്ചിത്രമേളയുടെ ഒന്നാംഘട്ടം ഫെബ്രുവരി 14 ന് പൂര്ത്തിയാകും.
10 മുതല് 14 വരെയാണ് തിരുവനന്തപുരത്തെ തീയേറ്ററുകളില് സിനിമകളുടെ പ്രദര്ശനം. ഇക്കുറി ചലച്ചിത്രമേള നാല് മേഖലകളിലായിട്ടാണ് നടക്കുന്നത്.
മേളയുടെ ഒന്നാംഘട്ടം തിരുവനന്തപുരത്ത് പൂര്ത്തിയാകുന്നതോടെ ഫെബ്രുവരി 17 ന് കൊച്ചിയില് രണ്ടാംഘട്ടം ആരംഭിക്കും. മൂന്നാംഘട്ടം തലശ്ശേരിയിലും നാലാംഘട്ടം പാലക്കാടും ആണ്.
സെക്കന്ഡ് എഡിഷന് 17 മുതല് 21 വരെയാണ് കൊച്ചിയില് നടക്കുക. ചലച്ചിത്ര സാങ്കേതിക പ്രവര്ത്തകരുടെ സാംസ്കാരിക കൂട്ടായ്മയായ മാക്ടയും ചലച്ചിത്ര തൊഴിലാളി സംഘടനയായ ഫെഫ്കയും താര സംഘടനയായ അമ്മയും ചേര്ന്നാണ് കൊച്ചിയില് നടക്കുന്ന ഐഎഫ്എഫ്കെ മേളയുടെ ചുക്കാന് പിടിക്കുന്നത്. 17ന് ആരംഭിക്കുന്ന IFFK സെക്കന്റ് എഡിഷന് വന്വിജയമാക്കി മാറ്റുന്നതിനുവേണ്ടി ശക്തമായ പ്രചരണങ്ങളും പ്രവര്ത്തനങ്ങളും ചലച്ചിത്ര, രാഷ്ട്രീയ, സാംസ്കാരിക, മാധ്യമ പ്രവര്ത്തകരുടെ കൂട്ടായ്മയില് തെരഞ്ഞെടുക്കപ്പെട്ട സംഘാടക സമിതി ആരംഭിച്ചുകഴിഞ്ഞു. കൊച്ചിയിലെ ചലച്ചിത്ര ആസ്വാദകരും മേളയെ വരവേല്ക്കാന് ഒരുങ്ങിക്കഴിഞ്ഞു.
എറണാകുളം ബാനര്ജി റോഡിലെ സരിത, സവിത, സംഗീത തീയേറ്റര് ക്യാമ്പസായിരിക്കും ചലച്ചിത്ര മേളയുടെ മുഖ്യവേദി. ശ്രീധര്, പത്മ, കവിത എന്നിങ്ങനെ മൊത്തം ആറ് തീയേറ്ററുകളിലാണ് സിനിമ പ്രദര്ശിപ്പിക്കുന്നത്.
കൊച്ചിയില് ചലച്ചിത്ര മേള ആരംഭിക്കുന്ന ഫെബ്രുവരി 17ന് പ്രശസ്ത സംവിധായകന് കെ.ജി. ജോര്ജ് വിളക്ക് തെളിച്ചു ഉത്ഘാടനം ചെയ്യും. മലയാള സിനിമയിലെ മുതിര്ന്ന സംവിധായാകന് കെ ജി ജോര്ജ് തെളിക്കുന്ന തിരി നാളം യുവതലമുറയിലെ ഇരുപത്തിനാല് ചലച്ചിത്ര പ്രതിഭകളിലേക്ക് പകരുന്നതോടെ 25 ആമത് IFFK യുടെ സെക്കന്റ് എഡിഷന് തുടക്കമാകും. അഞ്ചു ദിവസം നീണ്ടു നില്ക്കുന്ന മേള 21ന് അവസാനിക്കും.