സി എന് എ-
തിരു:
25ആമത് രാജ്യാന്തര ചലച്ചിത്ര മേളക്ക് ഇന്ന് തിരിതെളിയും. കോവിഡ് പശ്ചാലത്തില് ആദ്യമായി നാലിടങ്ങളിലായി നടക്കുന്ന മേളയുടെ ഉദ്ഘടാനം തിരുവനന്തപുരത്തു നിശാഗന്ധി ഓഡിറ്റോറിയത്തില് വൈകീട്ട് ആറിന് മുഖ്യമന്ത്രി പിണറായി വിജയന് നിര്വ്വഹിക്കും.
മന്ത്രി എ.കെ. ബാലന് അധ്യക്ഷനാകുന്ന ചടങ്ങില് സ്പീക്കര് പി. ശ്രീരാമകൃഷ്ണന് മുഖ്യാതിഥിയാകും. എം.എല്.എമാരായ വി. കെ. പ്രശാന്ത്, എം. മുകേഷ്, ചലച്ചിത്ര അക്കാഡമി മുന് ചെയര്മാന് ടി. കെ. രാജീവ് കുമാര് എന്നിവര് ചടങ്ങില് പങ്കെടുക്കും.
ഉദ്ഘാടന ചടങ്ങില് ക്ഷണിക്കപ്പെട്ട അതിഥികള്ക്കും റിസര്വ് ചെയ്ത ഡെലിഗേറ്റുകള്ക്കും മാത്രമാണ് പ്രവേശനം.
ഇത്തവണത്തെ ലൈഫ് ടൈം അച്ചീവ്മെന്റ് നേടിയ ഷീന്ലുക് ഗൊദാര്ദിനുവേണ്ടി സംവിധായകന് അടൂര് ഗോപാലകൃഷ്ണന് പുരസ്കാരം ഏറ്റുവാങ്ങും. കോവിഡിന്റെ പശ്ചാത്തലത്തില് ഗൊദാര്ദിനു ചടങ്ങില് നേരിട്ട് എത്താന് കഴിയാത്തതിനാലാണിത്.
തുടര്ന്ന് ജി.പി. രാമചന്ദ്രന് രചിച്ച ഗൊദാര്ദ് പലയാത്രകള് എന്ന പുസ്തകം മേയര് ആര്യാ രാജേന്ദ്രന് ജില്ലാ പഞ്ചായത്തു പ്രസിഡന്റ് അഡ്വ. സുരേഷ്കുമാറിന് നല്കിയും ഫെസ്റ്റിവല് ബുള്ളറ്റിന് കെ.ടി.ഡി.സി. ചെയര്മാന് എം.വിജയകുമാര് കില ചെയര്മാന് വി. ശിവന്കുട്ടിക്കു നല്കിയും പ്രകാശനം ചെയ്യും.
സാംസ്കാരിക വകുപ്പ് സെക്രട്ടറി റാണി ജോര്ജ്, ചലച്ചിത്രഅക്കാഡമി ചെയര്മാന് കമല്, വൈസ് ചെയര് പേഴ്സണ് ബീനാ പോള്, സെക്രട്ടറി അജോയ് ചന്ദ്രന് എന്നിവര് പങ്കെടുക്കും.
ജാസ്മില സബാനിക് സംവിധാനം ചെയ്ത ബോസ്നിയന് ചിത്രം 'ക്വോ വാഡിസ്, ഐഡ'യാണ് ഉദ്ഘാടന ചിത്രം.
അന്തരിച്ച കൊറിയന് സംവിധായകന് കിം കി ഡുക്ക്, അര്ജന്റീനിയന് സംവിധായകന് ഫെര്ണാണ്ടോ സോളനാസ്, ഇര്ഫാന് ഖാന്, രാമചന്ദ്രബാബു, ഷാനവാസ് നരണിപ്പുഴ, സൗമിത്ര ചാറ്റര്ജി, ഭാനു അത്തയ്യ, സച്ചി, അനില് നെടുമങ്ങാട്, ഋഷികപൂര് എന്നീ പ്രതിഭകളുടെ ചിത്രങ്ങളും മേളയുടെ ഭാഗമാകും.
2500 പാസുകളാണ് തിരുവനന്തപുരത്തെ മേളയില് അനുവദിച്ചിട്ടുള്ളത്. കോവിഡ് നെഗറ്റീവ് സര്ട്ടിഫിക്കറ്റുള്ളവര്ക്കുമാത്രമാണ് പ്രവേശനം. നഗരത്തിലെ ആറു തിയേറ്ററുകളിലായി 2164 ഇരിപ്പിടങ്ങളാണുള്ളത്. മുപ്പതിലേറെ രാജ്യങ്ങളില്നിന്നുള്ള 80 ചിത്രങ്ങള് പ്രദര്ശനത്തിനെത്തും.
അതില് ലോകസിനിമാ വിഭാഗത്തില് ഇത്തവണ പ്രദര്ശിപ്പിക്കുന്നത് 22 ചിത്രങ്ങള്.
പൂര്ണമായും കോവിഡ് മാനദണ്ഡങ്ങള് പാലിച്ചാണ് മേള നടത്തുന്നത്.
കൊച്ചിയില് ഫെബ്രുവരി 17 മുതല് 21 വരെയും തലശ്ശേരിയില് ഫെബ്രുവരി 23 മുതല് 27 വരെയും പാലക്കാട് മാര്ച്ച് 1 മുതല് 5 വരെയും ആണ് മേളനടക്കുന്നത്.
മേളയില് തലേദിവസം മുന്കൂട്ടി റിസര്വ് ചെയ്തവര്ക്ക് മാത്രമാണ് സിനിമകള് കാണാന് അവസരം. കോവിഡ് നെഗറ്റീവ് സര്ട്ടിഫിക്കറ്റ് നിര്ബന്ധമാണ്.