അഞ്ജു അഷറഫ്-
കൊച്ചി:
ചലച്ചിത്ര മേളയുടെ മൂന്നാം ദിനത്തില്‍ പ്രദര്‍ശിപ്പിച്ച ജയരാജ് സംവിധാനം ചെയ്ത 'ഹാസ്യം' എന്ന ചിത്രത്തിന് വലിയ ജനപിന്തുണയാണ് ലഭിച്ചത്.
ജയരാജ് സംവിധാനം ചെയ്യുന്ന 'നവരസ' പരമ്പരയിലെ എട്ടാമത്തെ ചിത്രമാണ് 'ഹാസ്യം'. മൃതദേഹങ്ങള്‍ മെഡിക്കല്‍ കോളേജുകള്‍ക്ക് എത്തിച്ചു കൊടുക്കുന്ന ഒരു ഇടനിലക്കാരന്റെ കഥയാണ് സിനിമയുടെ പ്രമേയം. മനുഷ്യന്‍ ഏറ്റവും ഭയക്കുന്ന മരണം എന്ന വികാരത്തിന്റെ വേറിട്ടൊരു ആവിഷ്‌കാരമാണ് 'ഹാസ്യം'. തിരുവനന്തപുരത്ത് നടന്ന മേളയുടെ ഒന്നാം എഡിഷനിലും ചിത്രം പ്രേക്ഷക പ്രതികരണം നേടിയിരുന്നു. മത്സര വിഭാഗത്തിലാണ് ചിത്രം പ്രദര്‍ശിപ്പിക്കുന്നത്.
'മെമ്മറി ഹൗസ്', 'ദെയര്‍ ഈസ് നോ ഈവിള്‍', 'ഡെസ്റ്ററോ', 'ക്രോണിക്കല്സ് ഓഫ് സ്‌പെയ്‌സ്', 'ലോണ്‍ലി റോക്ക്' തുടങ്ങിയവയാണ് ഇതോടൊപ്പം പ്രദര്‍ശിപ്പിക്കുന്ന മറ്റ് മത്സര ചിത്രങ്ങള്‍.
'അറ്റെന്‍ഷന്‍ പ്ലീസ്', 'സി യു സൂണ്‍', 'വാങ്ക്', ബിരിയാണി എന്നീവയായിരുന്നു മൂന്നാം ദിനം പ്രദര്‍ശനത്തിനെത്തിയ മലയാള ചിത്രങ്ങള്‍.
ഇന്നും കേരളത്തില്‍ നിലനില്‍ക്കുന്ന ജാതി വ്യവസ്ഥ സ്വപനങ്ങള്‍ക്ക് എങ്ങനെ വിലങ്ങുതടിയാകുന്നു എന്ന് 'അറ്റെന്‍ഷന്‍ പ്ലീസ്' അനാവരണം ചെയ്യുന്നു. നിരവധി രാജ്യാന്തര ചലച്ചിത്ര മേളകളിലെ പ്രദര്‍ശനത്തിന് ശേഷമെത്തിയ 'ബിരിയാണി' കാണാന്‍ വന്‍ ജനത്തിരക്കാണ് അനുഭവപ്പെട്ടത്. കാവ്യാ പ്രകാശ് സംവിധാനം ചെയ്ത 'വാങ്കും മികച്ച പ്രേക്ഷക പ്രതികരണം നേടുകയുണ്ടായി.
'യെല്ലോ ക്യാറ്റ്', 'ദി മാന്‍ ഹൂ സോള്‍ഡ് ഹിസ് സ്‌കിന്‍', 'വൈഫ് ഓഫ് സ്‌പൈ' എന്നീ ചിത്രങ്ങള്‍ ലോക സിനിമ വിഭാഗത്തില്‍ നിന്നും പ്രദര്‍ശിപ്പിച്ചു. ഒരു വ്യക്തിയില്‍നിന്നും മഹത്തായ കലാസൃഷ്ടിയിലേക്ക് രൂപമാറ്റം വന്ന മനുഷ്യന്റെ കഥയായ 'മാന്‍ ഹൂ സോള്‍ഡ് ഹിസ് സ്‌കിന്‍' എന്ന ചിത്രവും മൂന്നാം ദിനത്തിന്റെ ആകര്‍ഷണമായി.
