CNA
കൊച്ചി:
രണ്ട് വ്യാഴവട്ടത്തിലേറെ കാലം മലയാള സിനിമാ ലോകത്ത് മനസ്സും ജീവിതവും സമര്പ്പിച്ച പ്രശസ്ത സിനിമ പി ആര് ഒ എ എസ് ദിനേശ് എഴുതിയ 'നമസ്കാരം ദിനേശാണ് പി ആര് ഒ' എന്ന പുസ്തകം പ്രകാശനം ചെയ്തു. AMMA ജനറല് സെക്രട്ടറി നടന് സിദ്ദീഖ്, ഫെഫ്ക ജനറല് സെക്രട്ടറി സംവിധായകന് ബി ഉണ്ണികൃഷ്ണന് നല്കി പ്രകാശന കര്മ്മം നിര്വ്വഹിച്ചു.
എറണാകുളം Y M C A ഹാളില് വെച്ച് നടന്ന ചടങ്ങില് സംവിധായകന് സിബി മലയില് മുഖ്യാതിഥി ആയിരുന്നു.
സംവിധായകരായ എം പത്മകുമാര്, പി കെ ബാബുരാജ്, വ്യാസന് എടവനക്കാട്, തിരക്കഥാകൃത്ത് ജിനു ഏബ്രഹാം, എറണാകുളം പ്രസ് ക്ലബ്ബ് സെക്രട്ടറി ഹരികുമാര് എം ആര്, റാണി ശരണ് എന്നിവര് ആശംസകള് നേര്ന്ന് സംസാരിച്ചു. വിവേക് മുഴക്കുന്ന് പുസ്തകത്തെ പരിചയപ്പെടുത്തി സംസാരിച്ചു. ചലച്ചിത്ര രംഗത്തെ പ്രമുഖര് ചടങ്ങില് സന്നിഹിതരായിരുന്നു.
അനു കുരിശിങ്കല് സ്വാഗതവും സി വി ഹരീന്ദ്രന് നന്ദിയും രേഖപ്പെടുത്തി.
അക്കേരിപ്പറമ്പില് സദാനന്ദ പ്രഭു ദിനേശ് എന്നാണ് മുഴുവന് പേര്. ഇതുവരെ ആയിരത്തിലധികം സിനിമകളുടെ പി ആര് ഒ ആയി പ്രവര്ത്തിച്ചിട്ടുണ്ട്.
കൊങ്കിണി ഭാഷ സംസാരിക്കുന്ന ഗൗഡസാരസ്വത ബ്രാഹ്മണ സമുദായത്തില്പെട്ട ദിനേശ് പ്രഭു മലയാളത്തില് ബിരുദാനാന്തര ബിരുധദാരിയാണ്. കൊച്ചിന് പ്രസ്സ് അക്കാദമിയുടെ ആദ്യ ബാച്ചിലെ ജേര്ണലിസം വിദ്യാര്ത്ഥിയായിരുന്ന ദിനേശന് പക്ഷെ സിനിമാ വാര്ത്താ ലോകത്ത് നിലയുറപ്പിക്കാനായിരുന്നു നിയോഗം.
1997 ല് ശ്രീകുമാര് അരൂക്കുറ്റി തിരക്കഥ എഴുതി എന്.ബി. രഘുനാഥ് സംവിധാനം ചെയ്ത 'ആറ്റുവേല'യെന്ന ചിത്രത്തിലൂടെയാണ് ദിനേശിന്റെ പി.ആര്.ഒ. ജീവിതത്തിന് തുടക്കം. 'ഹരിഹരന്പിള്ള ഹാപ്പിയാണ്', 'ദാദാ സാഹിബ്', 'തച്ചിലേടത്തു ചുണ്ടന്', തുടങ്ങിയ മോഹന്ലാലും മമ്മൂട്ടിയും നായകന്മാരായ ചിത്രങ്ങളില് പി.ആര്.ഒ ആയതോടെ അദ്ദേഹം സിനിമാ ലോകത്ത് ശ്രദ്ധേയനായി.
മാക്ടയില് ട്രഷററും മാക്ടസൊസൈറ്റിയില് പ്രസിന്റുമായി പ്രവര്ത്തിച്ചിട്ടുണ്ട്. പി.ആര്.ഒ. ജീവിതം കാല്നൂറ്റാണ്ട് തികച്ചതിന്റെ ഓര്മ്മക്കായി മാധ്യമസുഹൃത്തുക്കള്ക്കും മറ്റുമായി ഒരു ഡയറി പുറത്തിറക്കിയിരുന്നു. ഇതിന്റെ പ്രകാശനം പ്രശസ്ത സിനിമാ താരം മഞ്ജു വാര്യരാണ് നിര്വ്വഹിച്ചത്.
നിരവധി പുരസ്കാരങ്ങളും ഇതിനകം അദ്ദേഹത്തെ തേടിയെത്തിയിട്ടുണ്ട്. 2004 ല് ആദ്യമായി പി.ആര്.ഒ മാര്ക്ക് ഏര്പ്പെടുത്തിയ മികച്ച പി.ആര്.ഒയ്ക്കുള്ള ജേസി ഫൗണ്ടേഷന് അവാര്ഡ്, 2022ലെ കലാഭവന് മണിസ്മാരക അവാര്ഡ്, ബിഗ് സ്ക്രീന് പുരസ്ക്കാരം, മലനാട് ടിവി അവാര്ഡ് എന്നിവ അവയില് ചിലത് മാത്രം.