CNA
കോട്ടയം:
മുതിര്‍ന്ന മാധ്യമ പ്രവര്‍ത്തകനും ചലച്ചിത്ര നിരൂപകനും അധ്യാപകനുമായ എ. സഹദേവന്‍ (ആണ്ടൂര്‍ സഹദേവന്‍) അന്തരിച്ചു. 72 വയസായിരുന്നു.
കോട്ടയത്തെ സ്വകാര്യ ആശുപത്രിയില്‍ ചികിത്സയിലിരിക്കെയായിരുന്നു അന്ത്യം.
1982 ല്‍ മാതൃഭൂമിയില്‍ ചേര്‍ന്ന സഹദേവന്‍ അവിടെ അസിസ്റ്റന്റ് എഡിറ്ററായി. ചിത്രഭൂമിയിലും മാതൃഭൂമി ദിനപത്രത്തിലും വിവിധ ചുമതലകള്‍ വഹിച്ചു.
2003ല്‍ ഇന്ത്യാവിഷന്‍ തുടക്കത്തില്‍ പ്രോഗ്രാം കണ്‍സല്‍ട്ടന്റായി ദൃശ്യമാധ്യമരംഗത്തേക്ക് ചുവടുവച്ചു.
കലാമൂല്യമുള്ള വിദേശ സിനിമകളെ നിരൂപണം ചെയ്യുന്ന '24 ഫ്രെയിംസ്' ഏറെ ജനശ്രദ്ധ നേടിയിരുന്നു.
2016ല്‍ ഇന്ത്യയുടെ അന്താരാഷ്ട്ര ഫിലിം ഫെസ്റ്റിവലില്‍ അന്താരാഷ്ട്ര ഡോക്യുമെന്ററി വിഭാഗത്തില്‍ ജൂറിയായും പ്രവര്‍ത്തിച്ചിരുന്നു.
1996ലെ പാമ്പന്‍ മാധവന്‍ പുരസ്‌കാരം, 2010ലെ സംസ്ഥാന ടെലിവിഷന്‍ അവാര്‍ഡ് ടെലിവിഷന്‍ ചേംബറിന്റെ അവാര്‍ഡ് എന്നിവ നേടി. കാണാതായ കഥകള്‍ എന്ന സമാഹാരത്തില്‍ അദ്ദേഹത്തിന്റെ കഥകള്‍ പ്രസിദ്ധീകരിച്ചിട്ടുണ്ട്.
പ്രസ് അക്കാദമി ഫാക്കല്‍റ്റിയായിരുന്ന അദ്ദേഹം മാസ്‌കോം പ്രഫസറായി 5 വര്‍ഷമായി പ്രവര്‍ത്തിച്ചു വരികയായിരുന്നു.
പാലക്കാട് പുതുശേരി സ്വദേശിയായായ അദ്ദേഹം കോഴിക്കാട് കരുവശേരിയിലാണ് താമസം.
ഭാര്യ ചെങ്കുളത്ത് പുഷ്പ. മകള്‍ ചാരുലേഖ.
മൃതദേഹം ഒറ്റപ്പാലം കയറംപാറ പാലിയില്‍ മഠത്തിന് സമീപമുള്ള സഹോദരിയുടെ ശ്രീകൈലാസം വീട്ടില്‍ എത്തിക്കും.
സംസ്‌കാരം തിരുവില്വാമല പാമ്പാടി ഐവര്‍ മഠം ശ്മശാനത്തില്‍ മാര്‍ച്ച് 28 വൈകീട്ട് മൂന്നിന്.
