സി എന് എ-
തൃശ്ശൂര്:
നടനും എഴുത്തുകാരനുമായ മാടമ്പ് കുഞ്ഞുകുട്ടന് (മാടമ്പ് ശങ്കരന് നമ്പൂതിരി) അന്തരിച്ചു. 81 വയസായിരുന്നു.
കൊവിഡ് ബാധയെ തുടര്ന്ന് ചികില്സയിലിരിക്കെ തൃശൂരിലെ സ്വകാര്യ ആശുപത്രിയിലായിരുന്നു അന്ത്യം.
ഒന്പതിലധികം നോവലുകളും അഞ്ച് തിരക്കഥകളും എഴുതിയിട്ടുണ്ട്.
ജയരാജ് സംവിധാനം ചെയ്ത 'കരുണം' എന്ന സിനിമയുടെ തിരക്കഥയ്ക്ക് 2000 ത്തില് ദേശീയ അവാര്ഡ് ലഭിച്ചു. കരുണം എന്ന സിനിമയ്ക്ക് പുറമെ 'മകള്ക്ക്', 'സഫലം', 'ഗൗരീശങ്കരം', 'ദേശാടനം' തുടങ്ങിയ ചിത്രങ്ങള്ക്ക് തിരക്കഥയൊരുക്കി.
മഹാഭാരതത്തിലെ അശ്വത്ഥാമാവിനെപ്പോലെ അശാന്തമായ ആത്മാവുമായി അലയുന്ന കുഞ്ഞുണ്ണി എന്ന കഥാപാത്രത്തെ കേന്ദ്രമാക്കി എഴുതിയ 'അശ്വത്ഥാമാവ്', കുറിയേടത്തു താത്രിയുടെ ജീവിതകഥയെ അടിസ്ഥാനമാക്കി രചിച്ച 'ഭ്രഷ്ട്' തുടങ്ങിയ നോവലുകളിലൂടെ ശ്രദ്ധേയനാണ് മാടമ്പ് കുഞ്ഞുകുട്ടന്. 'മഹാപ്രസ്ഥാനം', 'എന്തൊരോ മഹാനുഭാവലു', 'പാതാളം', 'കോളനി', 'ഉത്തരകോളനി', 'പോത്ത്', 'നിഷാദം', 'അവിഘ്നമസ്തു മാരാരാശ്രീ', 'ദേവഭൂമി', 'ഓം ശാന്തി:ശാന്തി:ശാന്തി', 'അമൃതസ്യപുത്ര:' തുടങ്ങിയവ പ്രധാന നോവലുകളാണ്.
'മഹാപ്രസ്ഥാനം' എന്ന നോവലിന് കേരള സാഹിത്യ അക്കാദമി അവാര്ഡ് ലഭിച്ചു(1983).
'പരിണാമം' എന്ന ചിത്രത്തിന്റെ തിരക്കഥയ്ക്ക് ഇസ്രയേല് അശദോദ രാജ്യാന്ത ചലച്ചിത്രമേള പുരസ്കാരം, 'തോറ്റങ്ങള്' എന്ന സീരിയലിന്റെ തിരക്കഥയ്ക്ക് സംസ്ഥാന സര്ക്കാര് പുരസ്കാരം(1999).
'ആനചന്തം', 'പോത്തന് വാവ', 'വടക്കുംനാഥന്', 'അഗ്നിനക്ഷത്രം', 'കാറ്റുവന്നു വിളിച്ചപ്പോള്', 'കരുണം', 'അഗ്നിസാക്ഷി', 'ചിത്രശലഭം', 'ദേശാടനം', 'ആറാംതമ്പുരാന്', 'അശ്വത്ഥാമാവ്' തുടങ്ങിയ സിനിമകളില് അഭിനയിച്ചു.
2001 ല് നിയമസഭാ തിരഞ്ഞെടുപ്പില് ബിജെപി പിന്തുണയോടെ കൊടുങ്ങല്ലൂരില് മത്സരിച്ചു.
1942 ജൂണ് 21ാം തീയതി തൃശൂര് ജില്ലയിലെ കിരാലൂരില് മാടമ്പ് മനയിലായിരുന്നു ജനനം. അച്ഛന്: ശങ്കരന് നമ്പൂതിരി, അമ്മ: സാവിത്രി അന്തര്ജനം.
ഭാര്യ: പരേതയായ സാവിത്രി അന്തര്ജനം. മക്കള്: ഹസീന, ജസീന.