പിആര്‍ സുമേരന്‍-
കോഴിക്കോട്:
മലയാളത്തിന്റെ വാനമ്പാടി കെ എസ് ചിത്ര പാടിയ 'നീലവാനം താലമേന്തി പോരുമോ വാര്‍മുകിലേ' ഈ ഗാനം സൂപ്പര്‍ഹിറ്റായി സോഷ്യല്‍ മീഡിയയില്‍ ശ്രദ്ധേയമാകുമ്പോള്‍ 'പെര്‍ഫ്യൂം' എന്ന പുതിയ സിനിമയ്ക്ക് വേണ്ടി ഗാനം എഴുതിയതിന്റെ സന്തോഷത്തിലാണ് കൊയിലാണ്ടി സ്വദേശിനി അഡ്വ. ശ്രീരഞ്ജിനി. പ്രശസ്ത സംവിധായകന്‍ ഹരിദാസ് സംവിധാനം ചെയ്ത 'പെര്‍ഫ്യൂം' എന്ന ചിത്രത്തിലൂടെയാണ് അഭിഭാഷകയായ ശ്രീരഞ്ജിനി ആദ്യമായി മലയാള ചലച്ചിത്ര ഗാനരംഗത്തേക്ക് കടന്നുവരുന്നത്. പ്രശസ്ത സംഗീത സംവിധായകന്‍ രാജേഷ് ബാബു കെ യാണ് ശ്രീരഞ്ജിനിയെ ഈ രംഗത്തേക്ക് കൊണ്ടുവരുന്നത്.
ചെറിയ ഇടവേളയ്ക്ക് ശേഷം മലയാളികളുടെ വാനമ്പാടി കെ എസ് ചിത്ര പാടിയ ഈ ഗാനത്തിന് വലിയ സ്വീകാര്യതയാണ് ഇപ്പോള്‍ ലഭിച്ചുകൊണ്ടിരിക്കുന്നത്. എക്‌സൈസ് സര്‍ക്കിള്‍ ഇന്‍സ്‌പെക്ടറായ സജിത്ത് കുമാര്‍ സംഗീതം നല്‍കി, ജി വേണുഗോപാല്‍ പാടിയ 'എന്‍മിഴികള്‍' സംഗീത ആല്‍ബത്തിന് ഗാനരചന നിര്‍വ്വഹിച്ചുകൊണ്ടാണ് ശ്രീരഞ്ജിനി ഈ രംഗത്തേക്ക് കടന്നുവരുന്നത്. വിനീത് ശ്രീനിവാസന് വേണ്ടി മറ്റൊരു സിനിമയിലും ശ്രീരഞ്ജിനി പാട്ടെഴുതിയിരുന്നു. കൂടാതെ ഒട്ടേറെ കവിതകളും പാട്ടുകളും എഴുതിയിട്ടുണ്ട്. കെ എസ് ചിത്രയും, പി.കെ സുനില്‍കുമാര്‍ കോഴിക്കോടും ചേര്‍ന്നാണ് ഇപ്പോള്‍ സൂപ്പര്‍ഹിറ്റായി മാറിയ ശ്രീരഞ്ജിനിയുടെ ഈ റൊമാന്റ്റിക് ഗാനം ആലപിച്ചത്.
'സിനിമയില്‍ പാട്ട് എഴുതാന്‍ എനിക്ക് അവസരം നല്‍കിയത് പ്രമുഖ സംഗീത സംവിധായകന്‍ രാജേഷ് ബാബു കെ. ആണ്. എന്റെ നന്ദിയും, കടപ്പാടും ഞാന്‍ അറിയിക്കുന്നു.' ശ്രീരഞ്ജിനി സിനിമ ന്യൂസ് ഏജന്‍സിയോട് പറഞ്ഞു. ശ്രീരഞ്ജിനി കോഴിക്കോട് ബാറിലെ അഭിഭാഷകയാണ്. വിദേശത്ത് ജോലി ചെയ്യുന്ന മാടക്കാപ്പള്ളില്‍ സുധാകൃഷ്ണനാണ് ശ്രീരഞ്ജിനിയുടെ ഭര്‍ത്താവ്. വിദ്യാര്‍ത്ഥികളായ ശ്യാം കൃഷ്ണ, പല്ലവി കൃഷ്ണ എന്നിവരാണ് മക്കള്‍.
മലയാളികളുടെ പ്രിയതാരങ്ങളായ ടിനി ടോം, പ്രതാപ് പോത്തന്‍, കനിഹ എന്നിവരാണ് പെര്‍ഫ്യൂമിലെ കേന്ദ്രകഥാപാത്രങ്ങള്‍. മോത്തി ജേക്കബ് പ്രൊഡക്ഷന്‍സും നന്ദന മുദ്ര ഫിലിംസും സംയുക്തമായി ഒരുക്കുന്ന പെര്‍ഫ്യൂം മോത്തി ജേക്കബ് കൊടിയാത്ത്, സുധി എന്നിവര്‍ ചേര്‍ന്നാണ് ചിത്രത്തിന്റെ നിര്‍മ്മാണം.
പിആര്‍ഒ- പിആര്‍ സുമേരന്‍.
