സി എന്‍ എ-
കൊച്ചി:
നടി ആന്‍ അഗസ്റ്റിനും ഛായാഗ്രാഹകന്‍ ജോമോന്‍ ടി ജോണും വിവാഹമോചിതരാകുന്നു.
ഒരുമിച്ച് പോകാന്‍ കഴിയാത്ത സാഹചര്യത്തിലാണ് ഇരുവരും വേര്‍പിരിയാന്‍ തീരുമാനിച്ചത്. വിവാഹ മോചന വാര്‍ത്ത ജോമോന്‍ ടി ജോണ്‍ സ്ഥിരീകരിച്ചതായി മനോരമ ഓണ്‍ലൈന്‍ റിപ്പോര്‍ട്ട് ചെയ്തു.
ചേര്‍ത്തല കുടുംബ കോടതിയില്‍ ആണ് വിവാഹമോചനം ആവശ്യപ്പെട്ടു കൊണ്ടുള്ള ഹര്‍ജി ജോമോന്‍ സമര്‍പ്പിച്ചത്. ഹര്‍ജി പരിഗണിച്ച കോടതി ആന്‍ അഗസ്റ്റിന് നോട്ടീസ് അയച്ചു. ഫെബ്രുവരി ഒമ്പതിനു കുടുംബ കോടതിയില്‍ ഹാജരാകാനാണ് നിര്‍ദ്ദേശം.
നടന്‍ അഗസ്റ്റിന്റെ മകളും നടിയുമായ ആന്‍ അഗസ്റ്റിനും ഛായാഗ്രാഹകന്‍ ജോമോന്‍ ടി ജോണും 2014 ലാണ് വിവാഹിതരായത്. 'എല്‍സമ്മ എന്ന ആണ്‍കുട്ടി' എന്ന ചിത്രത്തിലൂടെയാണ് ആന്‍ അഗസ്റ്റിന് സിനിമയിലെത്തിയത്.
തുടര്‍ന്ന് ഒരുപിടി നല്ല ചിത്രങ്ങളുടെ ഭാഗമാകാന്‍ ആന്‍ അഗസ്റ്റിന് കഴിഞ്ഞെങ്കിലും വിവാഹശേഷം അഭിനയ വേദിയില്‍ നിന്ന് മാറി നില്‍ക്കുകയായിരുന്നു. സിനിമയില്‍ തിളങ്ങി നില്‍ക്കുന്ന സമയത്താണ് ആന്‍ അഗസ്റ്റിന് ക്യാമറാമാന്‍ ജോമോനുമായി പ്രണയത്തില്‍ ആയതും വിവാഹത്തിലെത്തിയതും. രണ്ടു വര്‍ഷത്തോളം നീണ്ട പ്രണയത്തിനൊടുവില്‍ 2014 ലായിരുന്നു വിവാഹം.
ഇന്ത്യയിലെ തന്നെ പ്രമുഖ ഛായാഗ്രാഹകരില്‍ ഒരാളാണ് ജോമോന്‍ ടി ജോണ്‍. 'ചാപ്പാകുരിശ്' എന്ന ചിത്രത്തിലൂടെ സ്വതന്ത്ര ഛായാഗ്രാഹകനായി മാറിയ ജോമോന്‍ മലയാളത്തിനു പുറമേ ഹിന്ദി, തമിഴ് സിനിമകളിലും ശ്രദ്ധേയനാണ്.
രോഹിത് ഷെട്ടി സംവിധാനം ചെയ്യുന്ന രണ്‍വീര്‍ സിംഗ് ചിത്രത്തിലാണ് ഇപ്പോള്‍ ജോമോന്‍ പ്രവര്‍ത്തിക്കുന്നത്.
അടുത്തിടെ പൊതുവേദികളിലും മറ്റും ആന്‍ അഗസ്റ്റിന് പ്രത്യക്ഷപ്പെട്ടിരുന്നു. കഴിഞ്ഞ കുറച്ചു കാലമായി സോഷ്യല്‍ മീഡിയകളിലും സജീവമായ ആന്‍ നിരവധി ചിത്രങ്ങളും പങ്കു വച്ചിരുന്നു. കൂടുതലും തനിച്ചുള്ള ചിത്രങ്ങളാണ് പങ്കുവച്ചത്.
