അഞ്ജു അഷറഫ്-
കൊച്ചി:
ശ്രീറാം രാഘവന് സംവിധാനം ചെയ്തു ബോളിവുഡില് സൂപ്പര് ഹിറ്റ് വിജയം നേടിയ ക്ലാസിക് ചിത്രം 'അന്ധാദുന്' മലയാളത്തിലേക്ക് റീമേക്ക് ചെയ്യുന്നു.
പ്രശസ്ത ഛായാഗ്രാഹകനായ രവി കെ ചന്ദ്രന് സംവിധാനം ചെയ്യുന്ന 'ഭ്രമം' എന്ന ചിത്രത്തില് പൃഥ്വിരാജാണ് നായകന്. ഉണ്ണി മുകുന്ദന്, ശങ്കര്, ജഗദീഷ്, സുധീര് കരമന, മമത മോഹന്ദാസ്, രാശി ഖന്ന, സുരഭി ലക്ഷ്മി, അനന്യ എന്നിവരാണ് മറ്റ് പ്രധാന അഭിനേതാക്കള്.
ഇതേ സിനിമയുടെ തമിഴ്, തെലുങ്ക് ചിത്രീകരണം തുടങ്ങിക്കഴിഞ്ഞു. തമിഴില് പ്രശാന്തും തെലുങ്കില് നിധിനും നായക കഥാപാത്രങ്ങളെ അവതരിപ്പിക്കുന്നു.
2018ല് ബോളിവുഡില് ഈ സിനിമയുടെ നിര്മ്മാണ ചര്ച്ചകള് നടക്കുമ്പോള് നായകന്മാരില് ആദ്യ പേരുകാരന് മലയാളത്തിന്റെ ദുല്ഖര് സല്മാനായിരുന്നു. മണിരത്നം സംവിധാനം ചെയ്ത 'ഒ കെ കണ്മണി' എന്ന തമിഴ് ചിത്രമാണ് ശ്രീറാം രാഘവന്റെയും സംഘത്തിന്റെയും മുന്നില് ദുല്ഖറിനെ എത്തിച്ചത്.
'അന്ധാദുന്' സിനിമയില് ദുല്ഖറിനെ നായകനായി തീരുമാനിക്കുകയും മുംബൈയില് നിന്ന് ബന്ധപ്പെടാന് ശ്രമിക്കുകയും ചെയ്തു. പക്ഷെ ആ സമയത്ത് ദുല്ഖറിന്റെ തിരക്കുകള് കാരണം ഹിന്ദി സിനിമയില് ജോയിന്റ് ചെയ്യാന് കഴിയാതെ പോയി.
ദുല്ഖറിന്റെ ഡേറ്റ് പ്രോബ്ലം കാരണം മറ്റു നടന്മാരിലേക്ക് അന്വേഷണം നീളുകയും ആയുഷ്മാന് ഖുറാനക്ക് നറുക്ക് വീഴുകയും ചെയ്തു. അന്ധനായ ഒരു പിയാനോ ആര്ട്ടിസ്റ്റിന്റെ കഥ പറയുന്ന സിനിമയില് ആയുഷ്മാന് ഖുറാന അവതരിപ്പിച്ച കഥാപാത്രം ഏറെചര്ച്ച ചെയ്യപ്പെടുകയും ആ വര്ഷത്തെ മികച്ച നടനുള്ള ദേശീയ പുരസ്ക്കാരം ഉള്പ്പെടെ നിരവധി അംഗീകാരങ്ങള് അദ്ദേഹത്തിന് ലഭിക്കുകയും ചെയ്തു. കൂടാതെ മികച്ച ഹിന്ദി ചിത്രത്തിനും അവലംബിത തിരക്കഥയ്ക്കുള്ള പുരസ്കാരവും 'അന്ധാദുന്'ന് ലഭിച്ചു.
32 കോടി മുടക്കി നിര്മിച്ച സിനിമ രാജ്യത്തിനകത്തും പുറത്തുനിന്നുമായി 456 കോടി കളക്ട് ചെയ്തുവെന്ന് മാത്രമല്ല നിരൂപക പ്രശംസ നേടുകയും ചെയ്തു. അടുത്ത കാലത്തു ഹിന്ദി സിനിമമേഖലയില് ഉണ്ടായ വലിയ മൂവ്മെന്റായിരുന്നു 'അന്ധാദുന്'.
വിവിധ ഭാഷകളിലേക്ക് വലിയ തുകക്കാണ് റൈറ്റ്സ് വിറ്റിരിക്കുന്നത്. പൃഥ്വിരാജ് അഭിനയിക്കുന്ന ഭ്രമത്തിന്റെ (അന്ധാദുന്) ചിത്രീകരണം ജനുവരി 27ന് എറണാകുളത്ത് ചിത്രീകരണം ആരംഭിക്കും.
പ്രശസ്ത ഛായാഗ്രാഹകനും സംവിധായകനുമായ രവി കെ ചന്ദ്രനോടൊപ്പം 'ഭ്രമ'ത്തില് അണിനിരക്കുന്ന ടെക്നീഷ്യന്മാര്...
എഡിറ്റിംഗ്- ശ്രീകര് പ്രസാദ്, തിരക്കഥ,സംഭാഷണം- ശരത് ബാലന്, സംഗീത സംവിധാനം- ജാക്സ് ബിജോയ്, അസ്സോസിയേറ്റ് ഡയറക്ടര്- ജിത്തു അഷ്റഫ്, സൂപ്പര്വൈസിങ് പ്രൊഡ്യൂസര്- അശ്വതി നടുത്തൊടി, ലൈന് പ്രൊഡ്യൂസര്- ബാദുഷ എന് എം, പ്രൊഡക്ഷന് കണ്ട്രോളര്- ജിനു പി കെ, സ്റ്റീല്സ്- ബിജിത് ധര്മടം, മേക്കപ്പ്- റണ്സ് സേവിയര്, നിര്മ്മാണം- എ പി ഇന്റര്നാഷണല്, എക്സിക്യൂട്ടീവ് പ്രൊഡ്യൂസര്- ഓപ്പണ് ബുക്ക് പ്രൊഡക്ഷന്, ടൈറ്റില് ഡിസൈന്- ആനന്ദ് രാജേന്ദ്രന്, വാര്ത്താപ്രചരണം- എ എസ് ദിനേശ്.