CNA
കോഴിക്കോട്:
മലബാര്‍, സിനിമയുടെ ഏറെ വളക്കൂറുള്ള പ്രദേശമാണ്. എന്നാല്‍ സിനിമയുമായി ബന്ധപ്പെട്ട ചടങ്ങുകള്‍ ഏറെയും നടക്കുന്നത് വ്യവസായ നഗരമായ കൊച്ചിയിലും.
പതിവു രീതിയില്‍ നിന്നും മാറി ഒരു പുതിയ സിനിമയുടെ പ്രഖ്യാപനം ചിങ്ങം ഒന്നാം തീയതി (ആഗസ്റ്റ് പതിനേഴ്) ബുധനാഴ്ച്ച വൈകുന്നേരം കോഴിക്കോട് ഗോകുലം ഗലേ റിയാ മാളില്‍ അരങ്ങേറി.
കോഴിക്കോട്ടെ ചലച്ചിത്ര പ്രേമികള്‍ക്ക് ആവേശം പകര്‍ന്നു കൊണ്ട് ഹൃദ്യമായ ഒരു സായം സന്ധ്യയായിരുന്നു ഇവിടെ അരങ്ങേറിയത്.
മലയാളത്തിലെ ഏറ്റം മികച്ച ചലച്ചിത്ര നിര്‍മ്മാണ സ്ഥാപനമായ ഗോകുലം മൂവീസിന്റെ ബാനറില്‍ ഗോകുലം ഗോപാലന്‍ നിര്‍മ്മിക്കുന്ന 'ബ്രൂസ് ലി' എന്ന ചിത്രത്തിന്റെ പ്രഖ്യാപനമാണ് തിങ്ങിനിറഞ്ഞ പ്രേക്ഷകരുടെ നീണ്ട കരഘോഷങ്ങള്‍ക്കിടയില്‍ നടന്നത്.
മലയാള സിനിമയിലെ എക്കാലത്തേയും മെഗാഹിറ്റായ 'പുലി മുരുകന്‍' എന്ന ചിത്രത്തിന്റെ അണിയറ ശില്‍പികളായ വൈശാഖും ഉദയ് കൃഷ്ണയുമാണ് ഈ ചിത്രത്തിന്റെ സംവിധായകനും തിരക്കഥാകൃത്തും.
പാന്‍ ഇന്‍ഡ്യന്‍ സിനിമയായി വലിയ മുതല്‍മുടക്കോടെ ഒരുക്കുന്ന ഈ ചിത്രത്തിലൂടെ മലയാളത്തിലെ യുവനായകനും അക്ഷന്‍ രംഗങ്ങളില്‍ അതീവ മികവു പുലര്‍ത്തുന്നതുമായ ഉണ്ണി മുകുന്ദനാണ് 'ബ്രൂസ് ലി' എന്ന ടൈറ്റില്‍ കഥാപാത്രത്തെ അവതരിപ്പിച്ചു കൊണ്ട് മുന്‍ നിരയിലേക്കു കടന്നു വരുന്നത്.
സൂപ്പര്‍ താരപരിവേഷത്തിന് ഏറ്റവും അനുയോജ്യമായ ഒരു കഥാപാത്രമായിരിക്കും 'ബ്രൂസ് ലി'.
കോഴിക്കോട്ടു നടന്ന ചടങ്ങില്‍ ഗോകുലം മൂവി സ് ഉടമ ഗോകുലം ഗോപാലനാണ് ടൈറ്റില്‍ ലോഞ്ച് നടത്തിയത്.
എന്നും മികച്ച സിനിമകള്‍ നിര്‍മ്മിക്കുകയെന്നതാണ് ഗോകുലം മൂവീസ് ലക്ഷ്യമിടുന്നതെന്ന് ഗോകുലം ഗോപാലന്‍ തദവസരത്തില്‍ പറഞ്ഞു.
മുളകുപാടം ഫിലിംസുമായി സഹകരിച്ച് നിര്‍മ്മിക്കുന്ന 'ഒറ്റക്കൊമ്പന്‍' എന്ന ചിത്രത്തിന്റെ പ്രഖ്യാപനവും ഈ ചടങ്ങില്‍ വച്ച് ഗോകുലം ഗോപാലന്‍ നടത്തി.
ടോമിച്ചന്‍ മുളകുപാടം, ബിഗ് ബോസ് താരം ഡോ. റോബിന്‍ രാധാകൃഷ്ണന്‍, പി .വി. ഗംഗാധരന്‍, മുന്‍ മന്ത്രി സി.കെ. നാണു, ചലച്ചിത്ര താരങ്ങളായ ദുര്‍ഗാ കൃഷ്ണ, ചാന്ദ്‌നി ശ്രീധര്‍ എന്നിവരും ഉണ്ണി മുകുന്ദന്‍, വൈശാഖ്, ഉദയ്കൃഷ്ണ, ബൈജു ഗോപാലന്‍, ഛായാഗ്രാഹകന്‍ ഷാജികുമാര്‍, കൃഷ്ണമൂര്‍ത്തി തുടങ്ങിയവരും ചടങ്ങില്‍ പങ്കെടുത്തു.
ദേശത്തിനും ഭാഷക്കും അതിര്‍വരമ്പുകളില്ലാതെ ഏതു ഭാഷക്കാര്‍ക്കും ദേശക്കാര്‍ക്കും ഒരു പോലെ ആസ്വദിക്കുവാന്‍ പോരും വിധത്തിലുള്ള ഒരു ചിത്രമായിട്ടാണ് ഈ ചിത്രത്തെ അവതരിപ്പിക്കുന്നതെന്ന് സംവിധായകന്‍ വൈശാഖ് വെളിപ്പെടുത്തി.
അക്ഷന്‍ രംഗങ്ങളില്‍ ലോകമെമ്പാടും ആള്‍ക്കാര്‍ 'ഹീറോ' ആയി കാണുന്ന 'ബ്രൂസ് ലി'യുടെ ആക്ഷന്‍ രംഗങ്ങളോട് കടപിടിക്കും വിധത്തിലുള്ള ഒരു സമ്പൂര്‍ണ്ണ ആക്ഷന്‍ ചിത്രമായിരിക്കുമിതെന്ന് തിരക്കഥാകൃത്ത് ഉദയ് കൃഷ്ണയും പറഞ്ഞു.
ഇന്‍ഡ്യന്‍ സിനിമയിലെ വന്‍കിട ചിത്രങ്ങള്‍ക്ക് സംഘട്ടനമൊരുക്കി പ്രശസ്തി നേടിയ രാം ലഷ്മണന്മാരാണ് ഈ ചിത്രത്തിന്റെ സംഘട്ടനം കൈകാര്യം ചെയ്യുന്നത്.
'EVERY ACTION HAS CONSEQUENCES' എന്ന ടാഗ് ലൈനോടെയാണ് ഈ ചിത്രം എത്തുന്നത്.
ഉണ്ണി മുകുന്ദനെ നായകനാക്കി 'മല്ലു സിംഗ്' എന്ന ചിത്രം സംവിധാനം ചെയ്ത്, പന്ത്രണ്ടു വര്‍ഷങ്ങള്‍ക്കു ശേഷമാണ് ഒരു ചിത്രം സംവിധാനം ചെയ്യുന്നതെന്ന് വൈശാഖ് ഓര്‍മ്മപ്പെടുത്തി.
ഉണ്ണി മുകുന്ദനു പുറമേ ബോളിവുഡ്, തമിഴ്, തെലുങ്ക്, കന്നഡ ഭാഷകളിലെ അഭിനേതാക്കളാണ് ഈ ചിത്രത്തില്‍ അണിനിരക്കുന്നത്.
മലയാളത്തില്‍ നിന്നും ഉണ്ണി മുകുന്ദന്‍ മാത്രമേ അഭിനയിക്കുന്നുള്ളു.
എഡിറ്റിംഗ്- ഷമീര്‍ മുഹമ്മദ്, ഛായാഗ്രഹണം- ഷാജികുമാര്‍, കലാസംവിധാനം- ഷാജി നടുവില്‍, മേക്കപ്പ്- ജിതേഷ് പൊയ്യ, കോസ്റ്റ്യൂം ഡിസൈന്‍- സുജിത് സുധാകര്‍, കോ-പ്രൊഡ്യൂസേര്‍സ്- ബൈജു ഗോപാലന്‍- വി.സി. പ്രവീണ്‍, എക്‌സിക്കുട്ടീവ് പ്രൊഡ്യൂസര്‍- കൃഷ്ണമൂര്‍ത്തി, പ്രൊഡക്ഷന്‍ കണ്‍ട്രോളര്‍- സിദ്ദു പനയ്ക്കല്‍.
മലയാളപ്പിറവിയായ നവംബര്‍ മാസം ഒന്നാം തീയതി ഈ ചിത്രത്തിന്റെ ചിത്രീകരണമാരംഭിക്കും.
മുംബൈ, പൂന, ഗോവ, പോണ്ടിച്ചേരി എന്നിവിടങ്ങളിലായിട്ടാണ് ചിത്രീകരണം പൂര്‍ത്തിയാകുന്നത്.
- വാഴൂര്‍ ജോസ്.
ഫോട്ടോ- പ്രേംലാല്‍ പട്ടാഴി.
Online PR - CinemaNewsAgency.Com
