CNA
കൊച്ചി:
ദീപു അന്തിക്കാട് സംവിധാനം ചെയ്യുന്ന പുതിയ ചിത്രത്തിന് ആരംഭം കുറിച്ചു.
കൊച്ചി നെടുമ്പാശ്ശേരി വിമാനത്താവള്ളത്തിനു സമീപമുള്ള പോര്‍ട്ട് മുസ്സിരിസ് ഹോട്ടലില്‍ വച്ചാണ് ദീപു അന്തിക്കാട് സംവിധാനം ചെയ്യുന്ന പുതിയ ചിത്രത്തിന് ആരംഭം കുറിച്ചത്.
യു.എഫ്.ഐ. മോഷന്‍ പിക്‌ച്ചേഴ്‌സിനു വേണ്ടി കിഷോര്‍ വാര്യത്ത് (യു.എസ്.എ), ലഷ്മി നാഥ് ക്രിയേഷന്‍സിനു വേണ്ടി സുധീഷ് പിള്ള, സെലിബ്രാന്റ്‌സിനു വേണ്ടി ഷിബു അന്തിക്കാട് എന്നിവര്‍ ചേര്‍ന്ന് നിര്‍മ്മിക്കുന്ന പുതിയ ചിത്രമാണ് ഇവിടെ ആരംഭിച്ചത്.
ഷാബു അന്തിക്കാടാണ് എക്‌സിക്കുട്ടീവ് പ്രൊഡ്യൂസര്‍. ലൈന്‍ പ്രൊഡ്യൂസര്‍- ഇമേജസ് ആഡ് ഫിലിംസ്.
നാമകരണം ചെയ്തിട്ടില്ലാത്ത ഈ ചിത്രത്തിന്റെ ആരംഭം കുറിച്ചത് തികച്ചും ലളിതമായ ചടങ്ങോടെയാണ്.
അണിയറ പ്രവര്‍ത്തകരും ബന്ധുമിത്രാദികളും മാത്രം പങ്കെടുത്ത ഈ ചടങ്ങില്‍ നിര്‍മ്മാതാവ് കിഷോര്‍ വാര്യത്തിന്റെ മാതാവ് ശ്രീമതി രാധാ മേനോന്‍ ആദ്യ ഭദ്രദീപം തെളിയിച്ചതോടെയാണ് തുടക്കമിട്ടത്.
നടന്‍ ഗുരു സോമസുന്ദരം, സുധീഷ് പിള്ള, ബിജു മേനോന്‍, അലന്‍സിയര്‍, ഛായാഗ്രാഹകന്‍ ലോകനാഥന്‍, സംവിധായകന്‍ ദീപു അന്തിക്കാട് എന്നിവര്‍ ഈ ചടങ്ങ് പൂര്‍ത്തീകരിച്ചു.
തുടര്‍ന്ന് ശ്രീമതി ആശാ കിഷോര്‍ സ്വിച്ചോണ്‍ കര്‍മ്മവും നിവേദിതാഷിബു ഫസ്റ്റ് ക്ലാപ്പും നല്‍കി.
പൂജാ ചടങ്ങുകള്‍ക്കു ശേഷം എയര്‍പോര്‍ട്ടില്‍ ബിജു മേനോന്‍, ഗുരു സോമസുന്ദരം, അലന്‍സിയര്‍, പ്രശാന്ത് അലക്‌സാണ്ടര്‍, ശ്യാം എന്നിവരടങ്ങുന്ന രംഗങ്ങള്‍ ചിത്രീകരിച്ചു.
തികഞ്ഞ ഫാമിലി ജോണര്‍ ചിത്രമായ 'ലക്കി സ്റ്റാര്‍' എന്ന ചിത്രത്തിനു ശേഷം ഹൈറേഞ്ച് പശ്ചാത്തലത്തില്‍ അരങ്ങേറുന്ന ഒരു സസ്‌പെന്‍സ് ത്രില്ലറാണ് ഈ ചിത്രം.
അവതരണത്തില്‍ തികച്ചും വ്യത്യസ്ഥമായ ഒരു സമീപനമാണ് ഈ ചിത്രത്തിനു വേണ്ടി സംവിധായകന്‍ ദീപു അന്തിക്കാട് സ്വീകരിച്ചിരിക്കുന്നത്.
തുടക്കം മുതല്‍ ഒടുക്കം വരേയും പ്രേക്ഷകനെ ഉദ്വേഗത്തിന്റെ മുള്‍മുനയില്‍ നിര്‍ത്തിയാണ് ഈ ചിത്രത്തിന്റെ അവതരണം.
ബിജു മേനോനും ഗുരു സോമസുന്ദരവുമാണ് ഈ ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്.
ദിവ്യാ പിള്ളയാണ് നായിക. ഷീലുഏബ്രഹാം, ശാന്തി പ്രിയ ('ദൃശ്യം2' ഫെയിം), സി ജോയ് വര്‍ഗീസ്, ഋഷി സുരേഷ്, ശിവരാജ്, വൈശാഖ് ('തണ്ണീര്‍മത്തന്‍ ദിനങ്ങള്‍' ഫെയിം) എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
ശ്രീജിത്ത് ഉണ്ണികൃഷ്ണന്റേതാണ് ഗാനങ്ങള്‍. ലോകനാഥന്‍ ഛായാഗ്രഹണവും ഷമീര്‍ മുഹമ്മദ് എഡിറ്റിംഗും നിര്‍വ്വഹിക്കുന്നു.
കലാസംവിധാനം- അപ്പുണ്ണി സാജന്‍, മേക്കപ്പ്- റോണക്‌സ് സേവ്യര്‍, കോസ്റ്റ്യൂം ഡിസൈന്‍- നയന ശ്രീകാന്ത്, ചീഫ് അസ്സോസ്സിയേറ്റ് ഡയറക്ടര്‍- നിധിന്‍ മൈക്കിള്‍,
അസ്സോസ്സിയേറ്റ് ഡയറക്ടേര്‍സ്- അമൃത ശിവദാസ്, അഭിലാഷ് എസ്. പാറോല്‍, സഹസംവിധാനം- കിരണ്‍ അശോകന്‍, സ്വപ്നാ വിമല്‍, ശരത്ത്.എസ്.
പ്രൊഡക്ഷന്‍ എക്‌സിക്കുട്ടീവ്- ഷെമീജ് കൊയിലാണ്ടി, പ്രൊഡക്ഷന്‍ കണ്‍ട്രോളര്‍- ജാവേദ് ചെമ്പ്.
പീരുമേട്, വണ്ടിപ്പെരിയാര്‍, കുമളി, തേക്കടി ഭാഗങ്ങളിലായി ഈ സിനിമയുടെ ചിത്രീകരണം പൂര്‍ത്തിയാകും.
- വാഴൂര്‍ ജോസ്.
ഫോട്ടോ- സിബി ചീരന്‍.
Online PR - CinemaNewsAgency.Com
