സി എന്‍ എ-
കോട്ടയം:
പ്രശസ്ത തിരക്കഥാകൃത്തും സംവിധായകനുമായ ഡെന്നിസ് ജോസഫ് അന്തരിച്ചു.
ഹൃദയാഘാതത്തെ തുടര്‍ന്ന് കോട്ടയത്തെ സ്വകാര്യ ആശുപത്രിയിലായിരുന്നു അന്ത്യം. മലയാള സിനിമയിലെ എക്കാലത്തെയും വമ്പന്‍ ഹിറ്റുകളുടെ തിരക്കഥാകൃത്താണ് വിടവാങ്ങിയത്.
1985ല്‍ ജേസി സംവിധാനം ചെയ്ത 'ഈറന്‍ സന്ധ്യ' എന്ന സിനിമയുടെ തിരക്കഥ എഴുതിയാണ് ചലച്ചിത്രരംഗത്ത് പ്രവേശിച്ചത്.
'നിറക്കൂട്ട്', 'ന്യൂദല്‍ഹി', 'രാജാവിന്റെ മകന്‍', 'കോട്ടയം കുഞ്ഞച്ചന്‍', 'ശ്യാമ', 'നമ്പര്‍ 20 മദ്രാസ് മെയില്‍', 'ആകാശദൂത്', 'എഫ്‌ഐആര്‍' തുടങ്ങിയ ചിത്രങ്ങളുടെ തിരക്കഥ ഡെന്നീസ് ജോസഫ് ആയിരുന്നു.
'മനു അങ്കിള്‍' എന്ന സിനിമയിലൂടെ സംവിധായകനായി. മനു അങ്കിളിന് പുറമേ 'അഗ്രജന്‍', 'തുടര്‍കഥ', 'അപ്പു', 'അഥര്‍വ്വം' എന്നീ അഞ്ചു സിനിമകള്‍ സംവിധാനം ചെയ്തിട്ടുണ്ട്.
1988 ല്‍ ആദ്യമായി സംവിധാനം ചെയ്ത മനു അങ്കിള്‍ എന്ന ചിത്രത്തിലൂടെ കുട്ടികളുടെ ചിത്രത്തിനുള്ള കേരള സംസ്ഥാന ചലച്ചിത്ര അവാര്‍ഡും ദേശീയ ചലച്ചിത്ര അവാര്‍ഡും കരസ്ഥമാക്കിയിരുന്നു.
സംവിധായകരായ ജോഷി, തമ്പി കണ്ണന്തനം തുടങ്ങിയവരുടെ എക്കാലത്തെയും ഹിറ്റ് സിനിമകള്‍ എഴുതിയത് ഡെന്നീസ് ജോസഫ് ആയിരുന്നു.
കോട്ടയം ജില്ലയിലെ ഏറ്റുമാനൂരില്‍ 1957 ഒക്ടോബര്‍ 20 ന് എം എന്‍ ജോസഫിന്റെയും ഏലിയാമ്മ ജോസഫിന്റെയും മകനായി ജനിച്ചു.
ഏറ്റുമാനൂര്‍ ഗവണ്‍മെന്റ് ഹൈസ്‌കൂളില്‍നിന്ന് സ്‌കൂള്‍ വിദ്യാഭ്യാസവും കുറവിലങ്ങാട് ദേവമാതാ കോളെജില്‍ നിന്നും ബിരുദവും നേടി. പിന്നീട് ഫാര്‍മസിയില്‍ ഡിപ്ലോമയും കരസ്ഥമാക്കി.
പ്രിയദര്‍ശന്‍ സംവിധാനം ചെയ്ത 'ഗീതാഞ്ജലി'യാണ് ഡെന്നിസിന്റെതായി അവസാനമായി തിയേറ്ററില്‍ എത്തിയ ചിത്രം.
ഒമര്‍ ലുലു സംവിധായകനാവുന്ന 'പവര്‍ സ്റ്റാര്‍' എന്ന ചിത്രത്തിന്റെ തിരക്കഥാകൃത്ത് ഡെന്നീസ് ജോസഫ് ആയിരുന്നു.
ഭാര്യ: ലീന. മക്കള്‍: എലിസബത്ത്, റോസി, ജോസ്.
