Editor- MM Kamath
കൊച്ചി:
പുരസ്‌കാരങ്ങള്‍ വാരിക്കൂട്ടിയ വിനോദ് കൃഷ്ണ തിരക്കഥയെഴുതി സംവിധാനം ചെയ്ത 'ഈലം' എന്ന ചിത്രത്തിന്റെ ഒഫീഷ്യല്‍ ട്രെയ്‌ലര്‍ റിലീസായി.
വിനോദ്കൃഷ്ണയുടെ തന്നെ 'ഈലം' എന്ന ചെറുകഥയെ ആസ്പദമാക്കി, മെസപ്പൊട്ടോമിയന്‍ സംസ്‌കാരത്തിന്റെ ഉത്ഭവകേന്ദ്രമായ ഈലം എന്ന പ്രദേശത്തെ ഒരു മദ്യശാലയില്‍ നടക്കുന്ന വിചിത്ര മനോഭാവങ്ങളുടെ കഥയാണ് 'ഈലം' പറയുന്നത്.
എഴുത്തുകാരന്‍, നടന്‍, നിര്‍മ്മാതാവ് എന്നിങ്ങനെ വ്യത്യസ്ത മേഖലകളില്‍ വ്യക്തിമുദ്ര പതിപ്പിച്ച തമ്പി ആന്റണിയാണ് ചിത്രത്തില്‍ പ്രധാന കഥാപാത്രത്തെ അവതരിപ്പിച്ചിരിക്കുന്നത്. ഏഴ് ഗെറ്റപ്പുകളിലാണ് അദ്ദേഹം ചിത്രത്തിലെത്തുന്നത്.
തമ്പി ആന്റണിക്ക് പുറമെ കവിത നായര്‍ ചിത്രത്തില്‍ കേന്ദ്രകഥാപാത്രമാകുന്നുണ്ട്. ജെ കെ ജോസ് മഠത്തില്‍, രാധാകൃഷ്ണന്‍ തലച്ചങ്ങാട്, കാതറിന്‍, പ്രശസ്ത മോഡല്‍ ഏഞ്ചല്‍ തോമസ് തുടങ്ങിയവരും ചിത്രത്തില്‍ കഥാപാത്രങ്ങളാക്കുന്നുണ്ട്.
ഈഗോ പ്ലാനറ്റിന്റെ ബാനറില്‍ ജയ മേനോന്‍, ഷിജി മാത്യു ചെറുകര, വിനയന്‍ നായര്‍ എന്നിവര്‍ ചേര്‍ന്നാണ് 'ഈലം' നിര്‍മ്മിക്കുന്നത്.
മലയാള സിനിമയുടെ ചരിത്രത്തില്‍ ആദ്യമായാണ് മദ്യശാലയില്‍ നടക്കുന്ന ഒരു ദിവസത്തെ സംഭവങ്ങള്‍ ചലച്ചിത്രമാക്കുന്നത്.
ചിത്രത്തില്‍ പച്ച നിറത്തിനു പ്രാമുഖ്യം കൊടുത്തുള്ള തീമാണ് ഉപയോഗിച്ചിരിക്കുന്നത്. കഥാപാത്രങ്ങള്‍ക്കൊന്നും പേരില്ല എന്ന പ്രത്യേകതയും ഈലത്തിനുണ്ട്.
ക്യാമറ- തരുണ്‍ ഭാസ്‌കരന്‍, എഡിറ്റിംഗ്- ഷൈജല്‍ പി.വി, കലാസംവിധാനം- പ്രേംകുമാര്‍ കോട്ടക്കല്‍, സംഗീതം- രമേശ് നാരായണ്‍.
അജീഷ് ദാസന്റെ വരികള്‍ ആലപിച്ചിരിക്കുന്നത് ഷഹബാസ് അമനാണ്. പശ്ചാത്തല സംഗീതം- ബിജിബാല്‍, വസ്ത്രാലങ്കാരം- സുനില്‍ ജോര്‍ജ്, അസോസിയേറ്റ് ഡയറക്ടര്‍- അനുഷ് മോഹന്‍, പി.ആര്‍.ഒ- എ.എസ്. ദിനേശ്.
Online PR - CinemaNewsAgency.Com
