Editor - MM Kamath
കൊച്ചി:
ഫഹദ് ഫാസില്‍ 'പുഷ്പ' എന്ന അല്ലു അര്‍ജുന്‍ ചിത്രത്തിലൂടെ തെലുങ്കിലേക്ക് അരങ്ങേറ്റം കുറിക്കുകയാണ്. അല്ലു അര്‍ജുന്‍ ടൈറ്റില്‍ കഥാപാത്രത്തെ അവതരിപ്പിക്കുന്ന ചിത്രത്തില്‍ 'ഭന്‍വര്‍ സിംഗ് ശെഖാവത്' എന്ന എന്ന ഐപിഎസ് ഓഫീസര്‍ ആണ് ഫഹദ് അവതരിപ്പിക്കുന്ന പ്രതിനായക കഥാപാത്രം.
ചിത്രത്തിലെ അല്ലുവിന്റെ ക്യാരക്ടര്‍ ലുക്ക് നേരത്തേ പുറത്തു വിട്ടിരുന്നു. ഇപ്പോഴിതാ ആരാധകര്‍ ഏറെ ആകാംക്ഷയോടെ കാത്തിരുന്ന, ഫഹദ് ഫാസിലിന്റെ ഫസ്റ്റ് ലുക്കും പുറത്തുവിട്ടിരിക്കുകയാണ്.
മുടി മുഴുവന്‍ കളഞ്ഞ ബാള്‍ഡ് ലുക്കിലാണ് ഫഹദ് ചെയ്യുന്ന കഥാപാത്രം. അക്രമങ്ങള്‍ക്കും അനീതിക്കും കൂട്ടു നില്‍ക്കുന്ന പൊലീസ് ഉദ്യോഗസ്ഥനാണ് 'ഭന്‍വര്‍ സിംഗ് ശെഖാവത്' എന്ന് അണിയറ പ്രവര്‍ത്തകര്‍ പറയുന്നു.
കള്ളക്കടത്തുകാരന്‍ 'പുഷ്പരാജ്' എന്ന കഥാപാത്രത്തെയാണ് അല്ലു അര്‍ജുന്‍ അവതരിപ്പിക്കുന്നത്.
സുകുമാര്‍ സംവിധാനം ചെയ്യുന്ന 'പുഷ്പ' ആക്ഷന്‍ ത്രില്ലര്‍ ഗണത്തില്‍ പെടുന്ന ഒന്നാണ്. 'ആര്യ', 'ആര്യ 2' എന്നീ മെഗാഹിറ്റുകള്‍ക്ക് ശേഷം അല്ലു അര്‍ജുനും സൂപ്പര്‍ സംവിധായകന്‍ സുകുമാറും ഒന്നിക്കുന്ന ചിത്രം കൂടിയാണ് 'പുഷ്പ'. സംവിധായകന്റേതാണ് രചനയും.
തെലുങ്ക് കൂടാതെ തമിഴ്, ഹിന്ദി, കന്നഡ, മലയാളം ഭാഷകളിലും ചിത്രം റിലീസ് ചെയ്യും. രണ്ട് ഭാഗങ്ങളിലായി ഒരുങ്ങുന്ന ചിത്രത്തിന്റെ ആദ്യ ഭാഗമാണ് ഈ വര്‍ഷം ഡിസംബറില്‍ റിലീസാവുക.
രശ്മിക മന്ദാനയാണ് അല്ലുവിന്റെ നായിക. ധനഞ്ജയ്, സുനില്‍, അജയ് ഘോഷ് എന്നിവരാണ് ചിത്രത്തില്‍ മറ്റു താരങ്ങള്‍.
250 കോടി രൂപ ചെലവിട്ടാണ് ചിത്രം ഒരുക്കുന്നത്.
മൈത്രി മൂവി മേക്കേഴ്‌സ്, മുട്ടം സെട്ടി മീഡിയ എന്നീ ബാനറുകളില്‍ നവീന്‍ യെര്‍ണേനി, വൈ രവി ശങ്കര്‍ എന്നിവരാണ് നിര്‍മ്മാണം.
ഛായാഗ്രഹണം- മിറോസ്ലാവ് കൂബ ബ്രോസെക്, എഡിറ്റിംഗ്- കാര്‍ത്തിക ശ്രീനിവാസ്, സംഗീതം- ദേവി ശ്രീ പ്രദാസ്, സൗണ്ട് എന്‍ജിനീയര്‍- ഓസ്‌കര്‍ ജേതാവ് റസൂല്‍ പൂക്കുട്ടി.
