CNA
മങ്കട:
സിനിമാ നിര്‍മാണത്തിന്റെ വിവിധ ഘട്ടങ്ങളും സാങ്കേതികതകളും പരിചയപ്പെടുത്തുന്ന ഫസ്റ്റ് ഷോട്ട് ശില്‍പ്പശാല വിദ്യാര്‍ഥികള്‍ക്ക് നവ്യാനുഭവമായി.
മലപ്പുറം ഡയറ്റും എസ്.സി. ഡിപ്പാര്‍ട്ട്‌മെന്റും ചേര്‍ന്നാണ് തെരഞ്ഞെടുത്ത വിദ്യാലയങ്ങളിലെ 10 വീതം കുട്ടികള്‍ക്ക് ഷോര്‍ട്ട് ഫിലിം നിര്‍മ്മാണത്തില്‍ പരിശീലനം നല്‍കിയത്.
മങ്കട ബ്ലോക്ക് തല ശില്‍പ്പശാല പ്രോജക്ട് കോഡിനേറ്റര്‍ എ.പി. ബിജു ഉദ്ഘാടം ചെയ്തു.
ബാലസാഹിത്യകാരനും ചലച്ചിത്രപ്രവര്‍ത്തകനുമായ എം. കുഞ്ഞാപ്പ നയിച്ച പരിശീലനത്തില്‍ അസിസ്റ്റന്റ് എഡിറ്ററും സ്റ്റില്‍ ഫോട്ടോഗ്രാഫറുമായ പി. പ്രമോദ്, ഷോര്‍ട് ഫിലിം സംവിധായകന്‍ നിഷാദ് മരക്കാര്‍, ചലച്ചിത്ര പ്രവര്‍ത്തകരായ എം. സഗീര്‍, ബാദുഷ ഫഹദ്, സലീത് ആനമങ്ങാട് എന്നിവര്‍ ക്ലാസെടുത്തു.
ക്യാമ്പിലെ പരിശീലകര്‍ പിന്നണിയില്‍ പ്രവര്‍ത്തിച്ച ഹ്രസ്വ ചിത്രങ്ങള്‍ The cage (സംവിധാനം : ഡോ. എസ്.കെ. സുരേഷ് കുമാര്‍), Shero (സംവിധാനം: നിഷാദ് മരക്കാര്‍ ), മീഡിയ വണ്‍ അക്കാദമി ഫോട്ടോഗ്രഫി വിദ്യാര്‍ഥിനി എം. മുബഷിറ ക്യാമറ ചെയ്ത ബര്‍ത്തായ്ക്ക (സംവിധാനം : അഷ്ഫാഖ്), ശശിക്കും വാശി (സംവിധാനം : ബൈജു ദാസ്) എന്നീ ഹ്രസ്വചിത്രങ്ങള്‍ പ്രദര്‍ശിപ്പിച്ചു.
ഡയറ്റ് ലക്ചറര്‍ കെ. സുശീലന്‍ ക്യാമ്പിന് നേതൃത്വം നല്‍കി.
കുട്ടികള്‍ രചിക്കുന്ന സ്‌ക്രിപ്റ്റ് ഉപയോഗിച്ച് ചിത്രീകരണവും പോസ്റ്റ് പ്രൊഡക്ഷനും അടക്കമുള്ള പ്രവര്‍ത്തനങ്ങള്‍ക്ക് ഇതേ ടീം സഹായിക്കും. ഫസ്റ്റ് ഷോട്ട് പ്രോജക്ടിലൂടെ കുട്ടികള്‍ നിര്‍മ്മിക്കുന്ന 50 ലേറെ സിനിമകളുള്‍പ്പെടുത്തിയ ചലച്ചിത്രമേളയോടെയാണ് മലപ്പുറത്തിന്റെ ഈ തനതു പദ്ധതി സമാപിക്കുക.
ഫോട്ടോ: മങ്കട ചേരിയം ബി.ആര്‍.സിയില്‍ നടന്ന ഫസ്റ്റ് ഷോട്ട് ഷോര്‍ട്ട് ഫിലിം ശില്‍പ്പശാലയില്‍ എഴുത്തുകാരനും ചലച്ചിത്ര പ്രവര്‍ത്തകനുമായ എം. കുഞ്ഞാപ്പ പരിശീലനം നല്‍കുന്നു.
Online PR - CinemaNewsAgency.Com
