അഞ്ജു അഷറഫ്-
കൊച്ചി:
ശ്രീ ഗോകുലം മൂവീസിന്റെ ബാനറില് ഗോകുലം ഗോപാലന് നിര്മ്മിക്കുന്ന 'പത്തൊമ്പതാം നൂറ്റാണ്ട്', 'നാലാംതൂണ്' എന്നീ രണ്ട് സിനിമകളുടെ പൂജ എറണാകുളത്ത് ഗോകുലം കണ്വെന്ഷന് സെന്ററില് നടന്നു. ചലച്ചിത്ര രംഗത്തെ പ്രമുഖര് പങ്കെടുത്ത ചടങ്ങില് കേരള നിയമസഭാ സ്പീക്കര് പി. ശ്രീരാമകൃഷ്ണന് മുഖ്യാതിഥിയായിരുന്നു.
പ്രശസ്ത സംവിധായകന് വിനയന് ഒരുക്കുന്ന ചരിത്രപശ്ചാത്തലമുള്ള 'പത്തൊമ്പതാം നൂറ്റാണ്ട്' എന്ന സിനിമയില് യുവനടന് സിജു വില്സണ് ആണ് നായകന്. ഖയാത് ലോഹര് ആണ് നായിക.
രണ്ടാമത്തെ ചിത്രമായ 'നാലാംതൂണ്' അജയ് വാസുദേവ് സംവിധാനം ചെയ്യുന്നു. സുരേഷ് ബാബുവിന്റെ തിരക്കഥയില് ആസിഫ് അലിയാണ് നായകന്. ഇതില് ആദ്യം ചിത്രീകരണം ആരംഭിക്കുന്ന 'പത്തൊമ്പതാം നൂറ്റാണ്ടിന്റെ സ്വിച്ചോണും പൂജ ചടങ്ങിനോടനുബന്ധിച്ച് നടക്കുകയുണ്ടായി. ആദ്യ ഷോട്ടിന് സ്പീക്കര് പി. ശ്രീരാമകൃഷ്ണന് ക്ലാപ്പ് ബോര്ഡ് കാണിച്ചു. ഗോകുലം ഗോപാലന് സ്വിച്ചോണ് നിര്വഹിച്ചു. സിനിമയുടെ ഷൂട്ടിംഗ് ഫെബ്രുവരി ഒന്നിന് ആരംഭിക്കും.
മധ്യ കേരളത്തിലെ ജനങ്ങള് അനുഭവിച്ച അസമത്വവും താഴ്ന്ന ജാതിയില് പെട്ടവരുടെ ദുഃഖവും ദുരിതവും നിറഞ്ഞ ജീവിത യാഥാര്ത്ഥ്യങ്ങളാണ് 'പത്തൊമ്പതാം നൂറ്റാണ്ടിന്റെ പ്രമേയമെന്ന് തിരക്കഥാകൃത്തും സംവിധായകനുമായ വിനയന് പറഞ്ഞു. പാര്ശ്വവല്ക്കരിക്കപ്പെട്ടവരുടെ കഥകള് മുമ്പും ഞാന് സിനിമയാക്കിയിട്ടുണ്ട്. അതെല്ലാം ജനങ്ങള് സ്വീകരിച്ചിട്ടുണ്ട്.
ചരിത്രകാരന്മാര് തമസ്കരിക്കപ്പെട്ട സാമൂഹ്യ നായകനാണ് വേലായുധപണിക്കര്. ശ്രീനാരായണ ഗുരുവിനു മുമ്പ് താണ ജാതിക്കാര്ക്ക് വേണ്ടി സമരം ചെയ്ത് അവര്ക്കുവേണ്ടി പോരാടിയും മുന്നില് നിന്ന് ശബ്ദിക്കുകയും നയിക്കുകയും ചെയ്ത സാഹസികനായ പോരാളിയായ നായകനാണ് വേലായുധപ്പണിക്കര്. ഇന്നത്തെ തലമുറക്ക് അറിയാത്ത പഴയ കാലഘട്ടത്തെ കുറിച്ച് പഠിക്കാന് കഴിയുന്ന സിനിമയാണ് 'പത്തൊമ്പതാം നൂറ്റാണ്ട്'. ഈ സിനിമയില് എന്റെ കൂടെ നിരവധി മികച്ച ടെക്നീഷ്യന്മാരുണ്ടെന്നും അമ്പതോളം അഭിനേതാക്കള് വിവിധ കഥാപാത്രങ്ങളെ അവതരിപ്പിക്കുന്നുണ്ടെന്നും വിനയന് പറഞ്ഞു.
കോവിഡ് കാലത്തെ രാഷ്ട്രീയം ചര്ച്ച ചെയ്യുന്ന സിനിമയാണ് അജയ് വാസുദേവ് സംവിധാനം ചെയ്യുന്ന 'നാലാംതൂണ്'. മഹാമാരിക്കെതിരെ ഭയവിഹ്വലരായ ജനം ഒന്നാകെ പോരാടി നില്ക്കുമ്പോള് ഇവിടുത്തെ മാധ്യമങ്ങള് സൃഷ്ടിച്ച വാര്ത്തകള് എത്രത്തോളം അപഹാസ്യമാണ്. ആ വിഷയം ചര്ച്ച ചെയ്യുന്ന പൊളിറ്റിക്കല് ത്രില്ലര് ചിത്രമാണ് 'നാലാംതൂണ്' എന്ന് തിരക്കഥാകൃത്ത് സുരേഷ് ബാബു പറഞ്ഞു.
ആസിഫ് അലി, സുരാജ് വെഞ്ഞാറമ്മൂട്, നിത പിള്ള എന്നിവരാണ് നാലാം തൂണിലെ പ്രധാന അഭിനേതാക്കള്.
സ്പീക്കര് പി. ശ്രീരാമകൃഷ്ണന്, ഗോകുലം ഗോപാലന്, സംവിധായകന് ജോഷി, സീനിയര് നടന് രാഘവന്, ആര്. ശ്രീകണ്ഠന് നായര്, മ്യൂസിക് ഡയറക്ടര് എം. ജയചന്ദ്രന് എന്നിവര് ആശംസകള് നേര്ന്നു.
സ്റ്റില്സ്: സലീഷ് പെരിങ്ങോട്ടുകര