സി എന്‍ എ-
തിരു:
ബുദ്ധിമുട്ടിലായ കലാകാരന്‍മാര്‍ക്ക് ആവശ്യമായ എല്ലാ സഹായവും ലഭ്യമാക്കാന്‍ വേണ്ട നടപടി സര്‍ക്കാര്‍ സ്വീകരിക്കുമെന്നും കലാകാരന്‍മാരുടെ പ്രയാസം സര്‍ക്കാര്‍ ഉള്‍ക്കൊണ്ടിട്ടുണ്ടെന്നും മുഖ്യമന്ത്രി പിണറായി വിജയന്‍ പറഞ്ഞു.
തിരുവനന്തപുരം മാസ്‌ക്കറ്റ് ഹോട്ടലില്‍ സാംസ്‌കാരിക സിനിമാ രംഗത്തെ പ്രമുഖരുമായി ആശയവിനിമയം നടത്തുകയായിരുന്നു അദ്ദേഹം.
കലാകാരന്‍മാര്‍ക്ക് ഇപ്പോള്‍ ചില സഹായങ്ങള്‍ സര്‍ക്കാര്‍ നല്‍കിയിട്ടുണ്ട്. കൂടുതല്‍ സഹായം നല്‍കാനും മടിയില്ല. അവശ കലാകാരന്‍മാര്‍ക്ക് പെന്‍ഷന്‍ ലഭിക്കുന്നതിന് അപേക്ഷ സമര്‍പ്പിക്കുന്നതിന് ബുദ്ധിമുട്ടുകളുണ്ടെങ്കില്‍ അക്കാര്യം പരിശോധിക്കും. കേരളത്തിനൊരു സിനിമ നയം രൂപീകരിക്കുന്നത് പരിഗണിക്കുമെന്നും മുഖ്യമന്ത്രി അറിയിച്ചു. കേരളത്തിന്റെ പൈതൃകങ്ങള്‍ സംരക്ഷിക്കേണ്ടതിനെ സര്‍ക്കാര്‍ ഗൗരവത്തോടെയാണ് കാണുന്നത്.
പൈതൃക കേന്ദ്രങ്ങള്‍ നശിക്കാന്‍ പാടില്ല. ഇതുമായി ബന്ധപ്പെട്ട പ്രശ്‌നങ്ങള്‍ ചര്‍ച്ച ചെയ്യും. കലാകാരന്‍മാര്‍ക്ക് പരിപാടികള്‍ അവതരിപ്പിക്കുന്നതിന് തലസ്ഥാനത്തെ ഹാളുകള്‍ ചെറിയ വാടകയ്ക്ക് വിട്ടു നല്‍കണമെന്ന നിര്‍ദ്ദേശം പരിഗണിക്കുമെന്നും മുഖ്യമന്ത്രി പറഞ്ഞു.
ഉത്‌സവ സീസണ്‍ നഷ്ടപ്പെടുന്നതു മൂലം കലാകാരന്‍മാര്‍ മിക്കവരും ബുദ്ധിമുട്ടിലാണെന്നും 200ല്‍ കൂടുതല്‍ പേര്‍ എത്തുമെന്ന പേടിയില്‍ പല ക്ഷേത്രക്കമ്മിറ്റികളും കലാപരിപാടികള്‍ നടത്തുന്നതിന് വിമുഖത കാട്ടുന്നതായും സംവാദത്തില്‍ ചിലര്‍ ചൂണ്ടിക്കാട്ടി.
മാസ്‌ക്ക് ധരിക്കുന്നതില്‍ ശ്രദ്ധിക്കുന്നുണ്ടെങ്കിലും ശാരീരികാകലം പാലിക്കുന്നതില്‍ വലിയ കുറവുണ്ടായിട്ടുണ്ട്. പോലീസ് വിചാരിച്ചാല്‍ മാത്രം ഉത്‌സവ സ്ഥലത്തെ ആളുകളെ നിയന്ത്രിക്കാനാവില്ല. ഇപ്പോഴത്തെ ജാഗ്രത ശക്തിപ്പെടുത്തേണ്ടിവരുമെന്ന് മുഖ്യമന്ത്രി പറഞ്ഞു.
എം.ടി വാസുദേവന്‍ നായര്‍, അടൂര്‍ ഗോപാലകൃഷ്ണന്‍, എം. കെ. സാനു, എം. മുകുന്ദന്‍, ശ്രീകുമാരന്‍ തമ്പി, എന്‍. എസ്. മാധവന്‍, ഷാജി എന്‍. കരുണ്‍, സക്കറിയ, മമ്മൂട്ടി, പൃഥ്വിരാജ്, മഞ്ജു വാര്യര്‍, പ്രൊഫ. വി. മധുസൂദനന്‍ നായര്‍, മേതില്‍ ദേവിക, രഞ്ജിത്ത്, മട്ടന്നൂര്‍ ശങ്കരന്‍കുട്ടി, ഡോ. കെ. ഓമനക്കുട്ടി, സൂര്യ കൃഷ്ണമൂര്‍ത്തി, സി. ജെ. കുട്ടപ്പന്‍, പാര്‍വതി തിരുവോത്ത്, പി. ജയചന്ദ്രന്‍, വസന്തകുമാര്‍ സാംബശിവന്‍ എന്നിവര്‍ ഓണ്‍ലൈന്‍ സംവിധാനത്തിലൂടെ സംസാരിച്ചു.
സാംസ്‌കാരിക വകുപ്പ് പ്രിന്‍സിപ്പല്‍ സെക്രട്ടറി റാണി ജോര്‍ജ് സ്വാഗതവും ചലച്ചിത്ര അക്കാഡമി ചെയര്‍മാന്‍ കമല്‍ നന്ദിയും പറഞ്ഞു.
