CNA
കൊച്ചി:
ഹോളിവുഡ് സൂപ്പര് ഹീറോ സിനിമകള് കണ്ട് കൊതിച്ചിരുന്ന മലയാളികള്ക്ക് മുന്നില് മലയാളികളുടെ സ്വന്തം സൂപ്പര് ഹീറോ ചിത്രമായി അവതരിച്ച 'മിന്നല് മുരളി'ക്ക് വീണ്ടും ഒരു അഭിമാന നേട്ടം.
സിനിമയില് ഷിബു എന്ന കഥാപാത്രമായി സിനിമാപ്രേമികളുടെ മനസ്സില് ഇടം നേടിയ നടന് ഗുരു സോമസുന്ദരത്തിന് ഏഷ്യന് അക്കാദമി ക്രിയേറ്റീവ് അവാര്ഡ്സില് മികച്ച നടനുള്ള പുരസ്കാരം (Best actor in a lead role - national winner) ലഭിച്ചിരിക്കുകയാണ്.
'മിന്നല് മുരളി' സംവിധാനം ചെയ്ത ബേസില് ജോസഫിന് മികച്ച സംവിധായകനുള്ള ഏഷ്യന് അക്കാദമി പുരസ്കാരവും ലഭിച്ചു. മികച്ച വിഷ്വല് എഫ്.എക്സ് ഫീച്ചര് ഫിലിമിനുള്ള പുരസ്കാരവും മിന്നല് മുരളിക്കാണ് ലഭിച്ചിരിക്കുന്നത്.
ഏഷ്യ - പസഫിക് റീജിയണിലെ 16 രാജ്യങ്ങളില് നിന്നുമുള്ള സിനിമകളും ടെലിവിഷന് പരമ്പരകളും പരിഗണിച്ചതില് നിന്നാണ് ഇന്ത്യയില് നിന്നും 'മിന്നല് മുരളി' ഈ അഭിമാന നേട്ടം സ്വന്തമാക്കിയിരിക്കുന്നത്. 52-ാം സംസ്ഥാന ചലച്ചിത്ര അവാര്ഡ്സ്, സൈമ അവാര്ഡ്സ് ഉള്പ്പെടെ നിരവധി പുരസ്കാരങ്ങള് ഇതിനകം മിന്നല് മുരളി ടീം സ്വന്തമാക്കി കഴിഞ്ഞിട്ടുണ്ട്. അതിന് പിന്നാലെയാണിപ്പോള് വീണ്ടും അംഗീകാരം തേടിയെത്തിയിരിക്കുന്നത്.
2011- മുതല് സിനിമാലോകത്ത് സജീവമായുള്ളയാളാണ് ഗുരു സോമസുന്ദരം. ആരണ്യകാണ്ഡം എന്ന തമിഴ് ചിത്രമായിരുന്നു ആദ്യമായി അഭിനയിച്ചത്. ജിഗര്തണ്ട, ജോക്കര് തുടങ്ങിയ സിനിമകളിലൂടെ ഏറെ ശ്രദ്ധേയനായി. 2015-ല് കോഹിന്നൂര് എന്ന മലയാളം സിനിമയിലും അഭിനയിച്ചിട്ടുണ്ട്. മിന്നല് മുരളിയിലൂടെ മലയാളികള്ക്ക് ഏറെ പ്രിയപ്പെട്ടവനായി മാറിയ അദ്ദേഹം ചട്ടമ്പി എന്ന സിനിമയിലും അഭിനയിച്ചിരുന്നു. നാലാം മുറ, ചേര, കാപ്പ, ഇന്ദിര, നീരജ തുടങ്ങിയ മലയാളം സിനിമകളും ഗുരു സോമസുന്ദരം അഭിനയിച്ച് പുറത്തിറങ്ങാനായിരിക്കുന്നുണ്ട്.
ഏഷ്യന് അക്കാദമി ക്രിയേറ്റീവ് അവാര്ഡ്സില് തായ്ലന്ഡ്, ഫിലിപ്പൈന്സ്, സൗത്ത് കൊറിയ, ഹോങ് കോങ്, ജപ്പാന്, സിങ്കപ്പൂര്, ഇന്തോനേഷ്യ, ചൈന, ഓസ്ട്രേലിയ എന്നിവിടങ്ങളില് നിന്നുള്ള നടന്മാരും പുരസ്കാരത്തിന് അര്ഹരായിട്ടുണ്ട്.
'ബാംഗ്ലൂര് ഡേയ്സ്', 'മുന്തിരിവള്ളികള് തളിര്ക്കുമ്പോള്', 'പടയോട്ടം' എന്നീ ചിത്രങ്ങള്ക്ക് ശേഷം വീക്കെന്ഡ് ബ്ലോക്ക്ബസ്റ്റേഴ്സിന്റെ ബാനറില് സോഫിയ പോളാണ് 2021 ഡിസംബറില് നെറ്റ്ഫ്ലിക്സിലൂടെ പ്രദര്ശനത്തിനെത്തിയ 'മിന്നല് മുരളി' നിര്മ്മിച്ചത്.
ടൊവിനോ തോമസ് നായക വേഷത്തിലെത്തിയ ചിത്രം മലയാളം, തമിഴ്, തെലുങ്ക്, ഹിന്ദി എന്നിങ്ങനെ നാല് ഭാഷകളിലായാണ് പുറത്തിറങ്ങിയിരുന്നത്.
പി ആര് ഒ- എ.എസ് ദിനേശ്.
Online PR - CinemaNewsAgency.Com