അഞ്ജു അഷറഫ്-
കൊച്ചി:
സംവിധായകന്‍ ലാല്‍ജോസ് അഭിനയിക്കുന്ന ആദ്യ തമിഴ് ചിത്രമാണ് 'ജിപ്‌സി'. ജോക്കര്‍ എന്ന സിനിമയിലൂടെ ദേശീയ അവാര്‍ഡ് നേടിയ രാജു മുരുകന്‍ സംവിധാനം ചെയ്ത സിനിമയില്‍ ജീവയാണ് നായകന്‍.
ലാല്‍ ജോസിനെ കൂടാതെ മലയാളത്തില്‍ നിന്ന് സണ്ണിവെയ്‌നും 'ജിപ്‌സി'യില്‍ അഭിനയിക്കുന്നുണ്ട്. കുറേക്കാലത്തിനു ശേഷം ജീവ അവതരിപ്പിക്കുന്ന വളരെ വ്യത്യസ്തമായ ഒരു കഥാപാത്രമാണ് 'ജിപ്‌സി'യിലെ നായകവേഷം. സിനിമയില്‍ നായികയുടെ അച്ഛന്റെ വേഷമാണ് ലാല്‍ജോസിന്.
ലാല്‍ജോസ് ഇപ്പോള്‍ ദുബായ് റാസല്‍ഖൈമയില്‍ 'മ്യാവു' എന്ന സിനിമയുടെ ഷൂട്ടിംഗിലാണ്. ഇക്ബാല്‍ കുറ്റിപ്പുറം തിരക്കഥയെഴുതി ലാല്‍ജോസ് സംവിധാനം ചെയ്യുന്ന സിനിമയുടെ ഷൂട്ടിങ്ങിനിടയില്‍ 'ജിപ്‌സി'യെക്കുറിച്ച് സംസാരിക്കുകയുണ്ടായി.
മലയാളത്തില്‍ പല സിനിമകളിലും അഭിനയിച്ചിട്ടുണ്ടെങ്കിലും മറ്റൊരു ഭാഷയില്‍ ആദ്യമായിട്ടാണ് അഭിനയിക്കുന്നത്. 'ജിപ്‌സി' ഒരു പാന്‍ ഇന്ത്യന്‍ സിനിമയാണ്.
മലയാളത്തില്‍ നിന്നു ഞാനും സണ്ണി വെയ്‌നും പിന്നെ ബോളിവുഡില്‍ നിന്നും തെലുങ്കില്‍ നിന്നും നിരവധി ആര്‍ട്ടിസ്റ്റുകള്‍ ചിത്രത്തിലഭിനയിക്കുന്നുണ്ട്. സിനിമയിലുടനീളം നില്‍ക്കുന്ന ശക്തമായ ഒരു കഥാപാത്രമാണ് നായികയുടെ അച്ഛന്‍ വേഷം. നല്ല ക്യാരക്ടര്‍ ആണ്. സംവിധായകന്‍ രാജു മുരുകനെയോ അവരുടെ ടീമിനെയോ എനിക്ക് മുന്‍ പരിചയമില്ല. ഫേസ്ബുക്കില്‍ എന്റെ ഫോട്ടോ കണ്ടു, 'സണ്‍ഡേ ഹോളിഡേ' എന്ന സിനിമ കണ്ടിട്ടൊക്കെയാണ് അവര്‍ എന്നെ വിളിച്ചത്. സിനിമയില്‍ ഞാന്‍ തന്നെയാണ് ഡബ്ബ് ചെയ്തത്.
'ജിപ്‌സി' കേരളത്തില്‍ റിലീസ് ചെയ്യുന്നത് ഇപ്പോഴാണ്. ഇതിന്റെ തെലുങ്ക് ഡബ്ബിങ് ഒ ടി ടി പ്ലാറ്റ്‌ഫോമില്‍ നേരത്തെ റിലീസ് ചെയ്തതാണെന്നും ലാല്‍ ജോസ് പറഞ്ഞു.
