അഞ്ജു അഷറഫ്-
കൊച്ചി:
സ്ത്രീകള്‍ ധാരാളമായി ചലച്ചിത്ര രംഗത്തു വരികയും കഥ പറയാന്‍ തയ്യാറാവുന്നതും സിനിമ മേഖലയില്‍ വലിയ മാറ്റം കൊണ്ടുവരുമെന്ന് പ്രശസ്ത ഫിലിം എഡിറ്റര്‍ ബീനാപോള്‍. ഇരുപത്തഞ്ചാമത് അന്താരാഷ്ട്ര ചലച്ചിത്ര മേളയില്‍ മാധ്യമ പ്രതിനിധികളോട് സംസാരിക്കുകയായിരുന്നു ബീനപോള്‍.
പുരുഷമേധാവിത്വം നിലനില്‍ക്കുന്ന സമൂഹത്തില്‍ പുരുഷന്‍ പറയുന്ന കഥ സ്ത്രീകള്‍ക്ക് വേണ്ടിയുള്ളതാവില്ല. സിനിമ മാറ്റത്തിന്റെ വഴിയിലാണ്. 'ഗ്രേറ്റ് ഇന്ത്യന്‍ കിച്ചണ്‍' പോലുള്ള സിനിമകള്‍ അതിനു തെളിവാണ്.
വര്‍ഷങ്ങളായി ചലച്ചിത്ര മേളയുമായി ബന്ധപ്പെട്ട് പ്രവര്‍ത്തിക്കുന്നുണ്ട്. ഓരോ മേളയും പുതിയ അനുഭവങ്ങളും പുതിയ പാഠങ്ങളും സമ്മാനിക്കുന്നുണ്ട്. സിനിമാ നിര്‍മ്മാണത്തിലുള്ള താല്‍പര്യമാണ് എഡിറ്റിംഗ് പഠിക്കാന്‍ പൂനെ ഫിലിം ഇന്റ്റിട്യൂട്ടില്‍ എന്നെ എത്തിച്ചത്. എഡിറ്റിംഗ് ദൃശ്യാനുഭവം ആവുമ്പോഴാണ് സിനിമ മനോഹരമാവുന്നത്.
സിനിമയില്‍ സ്ത്രീകളുടെ തൊഴില്‍ നീതി ഉറപ്പ് വരുത്താനും കൂടുതല്‍ വനിതകളെ ഈ മേഖലയിലേയ്ക്ക് കൊണ്ടുവരാനും WCC പല പദ്ധതികളും നടപ്പാക്കുന്നുണ്ടെന്ന് സംഘടനയുടെ ഭാരവാഹി എന്ന നിലയില്‍ ബീനപോള്‍ പറഞ്ഞു.
വീട്ടമ്മമാര്‍ക്ക് സേവനത്തിനു ശമ്പളം കൊടുക്കുന്ന ആശയത്തോട് വളരെ പോസിറ്റീവ് ആയാണ് അവര്‍ പ്രതികരിച്ചത്.
സിനിമയുടെ ഓണ്‍ലൈന്‍ റിലീസ് തിയേറ്റര്‍ വ്യവസായത്തെ ബാധിക്കില്ലെന്നും ആളുകള്‍ തിയേറ്ററില്‍ സിനിമ കാണുവാനാണ് ഇഷ്ടപ്പെടുന്നതെന്നും ബീന പോള്‍ പറയുന്നു.
