സി എന്‍ എ-
കൊച്ചി:
കേരള രാജ്യാന്തര ചലച്ചിത്രമേളയുടെ സെക്കന്റ് എഡിഷന്‍ നാളെ കൊച്ചിയില്‍ തിരിതെളിയും.
17ന് വൈകീട്ട് ആറു മണിക്ക് സാംസ്‌കാരിക വകുപ്പ് മന്ത്രി എ കെ ബാലന്‍ മേളയുടെ ഉദ്ഘാടന കര്‍മ്മം ഓണ്‍ലൈനായി നിര്‍വഹിക്കും. പ്രധാന വേദിയായ സരിത തീയേറ്റര്‍ സാമൂച്ചയത്തില്‍ നടക്കുന്ന ചടങ്ങില്‍ ടി. ജെ. വിനോദ് എംഎല്‍എ അധ്യക്ഷത വഹിക്കും. എം.എല്‍.എ മാരായ പി.ടി തോമസ്, എം.സ്വരാജ്, കെ.ജെ മാക്‌സി, ജോണ്‍ ഫെര്‍ണാണ്ടസ് എന്നിവര്‍ ആശംസയര്‍പ്പിച്ച് സംസാരിക്കും. ഫെസ്റ്റിവല്‍ ബുള്ളറ്റിന്റെ പ്രകാശനകര്‍മ്മം മേയര്‍ എം. അനില്‍കുമാര്‍ ഫെഫ്ക ജനറല്‍ സെക്രട്ടറി ബി. ഉണ്ണിക്കൃഷ്ണന് നല്‍കികൊണ്ട് നിര്‍വഹിക്കും.
ഐ എഫ് എഫ് കെ പിന്നിട്ട രണ്ടര പതിറ്റാണ്ടിന്റെ സൂചകമായി 25 ദീപനാളങ്ങള്‍ തെളിയിച്ചു കൊണ്ടാണ് മേളയ്ക്ക് തുടക്കം കുറിക്കുന്നത്. മുതിര്‍ന്ന സംവിധായകന്‍ കെ ജി ജോര്‍ജ് തെളിക്കുന്ന തിരി നാളം മലയാള ചലച്ചിത്ര രംഗത്തെ 24 യുവ പ്രതിഭകളി ലേക്ക് കൈമാറും. ചലച്ചിത്ര അക്കാദമി ചെയര്‍മാന്‍ കമല്‍, വൈസ് ചെയര്‍പേഴ്‌സണ്‍ ബീന പോള്‍, സെക്രട്ടറി സി അജോയ് ചലച്ചിത്രസംഘടനാ പ്രതിനിധികള്‍ എന്നിവര്‍ ചടങ്ങില്‍ പങ്കെടുക്കും.
മേളയുടെ ഉദ്ഘാടന ചിത്രമായി ജാസ്മില സബാനിക്ക് സംവിധാനം ചെയ്ത ബോസ്‌നിയന്‍ ചിത്ര 'Quo Vadis, Aida?' പ്രദര്‍ശിപ്പിക്കും. ബോസ്‌നിയന്‍ വംശഹത്യയുടെ പിന്നാമ്പുറങ്ങള്‍ ആവിഷ്‌കരിക്കുന്ന ചിത്രം മികച്ച വിദേശ ഭാഷ ചിത്രത്തിനുള്ള ഓസ്‌കര്‍ ചുരുക്കപ്പട്ടികയില്‍ ഇടം നേടിയിട്ടുണ്ട്.
കോവിഡ് മാനദണ്ഡങ്ങള്‍ പാലിച്ച് തെര്‍മല്‍ സ്‌കാനിങ് ഉള്‍പ്പെടെ കര്‍ശന പ്രതിരോധ നടപടികള്‍ സ്വീകരിച്ചാണ് ഉദ്ഘാടന ചടങ്ങ് നടത്തുന്നത്.
