സി എന്‍ എ-
ചെന്നൈ:
നയന്‍താര കേന്ദ്രകഥാപാത്രമായി അഭിനയിച്ച തമിഴിലെ ഹിറ്റ് ചിത്രം 'കോലമാവ് കോകില' ബോളിവുഡിലേക്ക് റീമേക്ക് ചെയ്യുന്നു. നയന്‍താര ചെയ്ത കേന്ദ്രകഥാപാത്രത്തെ ഹിന്ദിയില്‍ അവതരിപ്പിക്കുന്നത് ജാന്‍വി കപൂറാണ്. സിദ്ധാര്‍ത്ഥ സെന്‍ ഗുപ്തയാണ് ചിത്രം ബോളിവുഡില്‍ ഒരുക്കുന്നത്.
മിഡില്‍ക്ലാസ് കുടുംബത്തില്‍ നിന്നും വരുന്ന ഒരു പെണ്‍കുട്ടിക്ക് പെട്ടെന്ന് പണം സമ്പാദിക്കുന്നതിനായി ഡ്രഗ് റാക്കറ്റിന്റെ കണ്ണിയാകേണ്ടി വരുന്നതും
അസാധാരണമായ ചില സാഹചര്യങ്ങള്‍ നേരിടേണ്ടി വരുന്നതും അതിനെ അവള്‍ എങ്ങനെ അതിജീവിക്കുന്നു എന്നതുമാണ് ചിത്രത്തിന്റെ പ്രമേയം.
എല്ലാത്തരം ആളുകള്‍ക്കും ആസ്വാദകരമാകുന്ന രീതിയില്‍ ഉത്തരേന്ത്യന്‍ പശ്ചാത്തലത്തിലാകും ചിത്രം ഒരുക്കുക. പഞ്ചാബിലാകും 45 ദിവസം നീണ്ട് നില്‍ക്കുന്ന ചിത്രത്തിന്റെ ആദ്യ ഷെഡ്യൂള്‍. പിന്നീട് വിവിധയിടങ്ങളിലായി ചിത്രീകരണം പൂര്‍ത്തിയാക്കാനാണ് തീരുമാനം.
ജാന്‍വി ഇതുവരെ ചെയ്തതില്‍ നിന്നും തികച്ചും വ്യത്യസ്തമായ, തീര്‍ത്തും നോണ്‍ ഗ്ലാമറസ് ലുക്കിലാകും ചിത്രത്തില്‍ പ്രത്യക്ഷപ്പെടുക. ചിത്രത്തിലെ ചില ആക്ഷന്‍ രംഗങ്ങള്‍ക്കു വേണ്ടിയുള്ള തയ്യാറെടുപ്പുകളും പരിശീലനവും ജാന്‍വി ആരംഭിച്ചതായാണ് വിവരം.
2018ലാണ് നെല്‍സണ്‍ ദിലീപ് കുമാര്‍ തമിഴില്‍ 'കോലമാവ് കോകില' സംവിധാനം ചെയ്തത്.
