സി എന്‍ എ-
എരുമേലി:
ഫഹദ് ഫാസിലും ദിലീഷ് പോത്തനും കൈകോര്‍ക്കുന്ന 'ജോജി'യുടെ ചിത്രീകരണം എരുമേലിയില്‍ പൂര്‍ത്തിയായി.
ദിലീഷ് പോത്തന്‍ സംവിധാനം ചെയ്ത കഴിഞ്ഞ ചിത്രങ്ങളിലും ഫഹദ് ഫാസില്‍ തന്നെയായിരുന്നു നായകന്‍. സിനിമയുമായി ബന്ധപ്പെട്ട ഒരു വാര്‍ത്തയും പുറത്തു പോകാതെ കോവിഡ് പ്രോട്ടോകോള് നിയമങ്ങള്‍ പാലിച്ചു കൊണ്ടായിരുന്നു ചിത്രീകരണം.
ഏറ്റവുമൊടുവില്‍ അണിയറപ്രവര്‍ത്തകര്‍ക്കൊപ്പമുള്ള ചിത്രങ്ങള്‍ പങ്കുവെച്ചു കൊണ്ടാണ് സിനിമയുടെ ഷൂട്ടിങ് പൂര്‍ത്തീകരിച്ച വിവരം ദിലീഷ് പോത്തന്‍ പ്രഖ്യാപിച്ചത്.
കോട്ടയം, എരുമേലി എന്നിവിടങ്ങളിലായിരുന്നു ഷൂട്ടിംഗ്. ദിലീഷ് പോത്തന്‍ സംവിധാനം ചെയ്യുന്ന സിനിമയുടെ തിരക്കഥാ രചന നിര്‍വ്വഹിച്ചിരിക്കുന്നത് ശ്യാം പുഷ്‌കരനാണ്. ഛായാഗ്രഹണം ഷൈജു ഖാലിദ്.
ഫഹദ് ഫാസില്‍, ഷമ്മി തിലകന്‍, ബാബുരാജ്, ഉണ്ണിമായ എന്നിവര്‍ക്കൊപ്പം പുതുമുഖങ്ങളും പ്രധാന കഥാപാത്രങ്ങളെ അവതരിപ്പിക്കുന്നു. ഭാവന സ്റ്റുഡിയോസ്, വര്‍ക്കിംഗ് ക്ലാസ് ഹീറോ, ഫഹദ് ഫാസില്‍ പ്രൊഡക്ഷന്സ് തുടങ്ങിയ ബാനറുകളിലാണ് ചിത്രം നിര്‍മ്മിച്ചിരിക്കുന്നത്.
മൂന്നു വര്‍ഷത്തെ ഇടവേളക്ക് ശേഷമാണ് ദിലീഷ് പോത്തന്‍ സിനിമ സംവിധാനം ചെയ്യുന്നത്. 'മഹേഷിന്റെ പ്രതികാരം' എന്ന ചിത്രത്തിനുശേഷം ദിലീഷ് പോത്തനും തിരക്കഥാകൃത്ത് ശ്യാം പുഷ്‌കരനും ഒന്നിക്കുന്ന ചിത്രവും കൂടിയാണിത്.
