സി എന് എ-
കൊച്ചി:
ബിശ്വാസ് ബാലന് സംവിധാനം ചെയ്ത 'കാളിരാത്രി' എന്ന സിനിമയിലെ മികച്ച അഭിനയത്തിന് മലയാളി നടി ജോളി ചിറയത്തിന് മികച്ച സഹനടിക്കുള്ള അന്താരാഷ്ട്ര പുരസ്ക്കാരം.
റഷ്യയിലെ സെന്റ് പീറ്റേഴ്സ്ബര്ഗില് വെച്ച് നടന്ന അന്താരാഷ്ട്ര സിമ്പോളിക് ആര്ട് ഫിലിം ഫെസ്റ്റിവലിലെ മികച്ച സഹനടിക്കുള്ള പുരസ്കാരമാണ് ജോളി ചിറയത്തിന് ലഭിച്ചത്. 70 രാജ്യങ്ങളില് നിന്നായി 965 ഓളം സിനിമകളാണ് ഫെസ്റ്റിവലില് മത്സരത്തിനുണ്ടായിരുന്നത്.
'കാളിരാത്രി'യുടെ രചനയും നിര്മ്മാണവും നിര്വഹിച്ചത് ബിശ്വാസ് ബാലന് തന്നെയാണ്. പ്രശസ്ത തമിഴ് സംവിധായകന് ശെല്വരാഘവന്റെ സഹസംവിധായകനായി ബിശ്വാസ് ബാലന് ഏറെ കാലം പ്രവര്ത്തിച്ചിട്ടുണ്ട്. കൂടാതെ ബിശ്വാസ് ബാലന് മലയാളത്തിലും നിരവധി ചിത്രങ്ങളില് സഹസംവിധായകനായി പ്രവര്ത്തിച്ചിട്ടുണ്ട്.
ക്രൊയേഷ്യയിലെ ഡൈവേര്ഷന്സ് ഇന്റര്നാഷനല് ഷോര്ട്ട് ഫിലിം ഫെസ്റ്റിവല്, സ്പ്ലൈസ് ഫിലിം ഫെസ്റ്റ് ന്യൂയോര്ക്ക് തുടങ്ങിയ അന്താരാഷ്ട്ര ഫെസ്റ്റിവലുകളിലെ മത്സരവിഭാഗത്തിലേക്ക് കാളിരാത്രി എന്ന ചിത്രം നേരത്തെ തെരഞ്ഞെടുക്കപ്പെട്ടിരുന്നു.
കൂടാതെ കോട്ടയം കെ. ആര് നാരായണന് ഇന്സ്റ്റിട്യൂട്ടിലെ അരുണ്. എം. എസ്. സംവിധാനം ചെയ്ത 'സൈക്കിള്' എന്ന ഹ്രസ്വചിത്രത്തിലെ അഭിനയത്തിന് ജയ്പൂരിലെ പിങ്ക് സിറ്റി ഇന്റര്നാഷണല് ഷോര്ട്ട് ഫിലിം ഫെസ്റ്റിവലില് മികച്ച നടിക്കുള്ള പുരസ്കാരം ജോളി ചിറയത്തിന് നേരത്തെ ലഭിച്ചിരുന്നു.
'ഒളിപ്പോര്' എന്ന ചിത്രത്തിലൂടെ സഹസംവിധായക ആയി മലയാള സിനിമയില് എത്തിയ നടിയാണ് ജോളി ചിറയത്ത് 'അങ്കമാലി ഡയറീസ് എന്ന ചിത്രത്തിലെ അമ്മ വേഷത്തിലൂടെയാണ് ജോളി പ്രേക്ഷക ശ്രദ്ധ നേടുന്നത്. കൂടാതെ 'ഇരട്ടജീവിതം', 'വൈറസ്', 'ഈട', 'ജൂണ്', 'കൂടെ', 'തൊട്ടപ്പന്', 'സ്റ്റാന്ഡ് അപ്പ്', 'ഉള്ട്ട', 'കപ്പേള' തുടങ്ങിയ 28 ഓളം മലയാള സിനിമകളിലും ജോളി ചിറയത്ത് അഭിനയിച്ചിട്ടുണ്ട്.