CNA
തിരു:
റിട്ടയേര്ഡ് ഐ.എ.എസ്. ഉദ്യോഗസ്ഥനും കേരള സര്ക്കാരിന്റെ ചീഫ് സെക്രട്ടറിയും കവിയും ഗാനരചയിതാവും വിവര്ത്തകനും തിരക്കഥാകൃത്തും മലയാളം സര്വകലാശാലയുടെ സ്ഥാപക വൈസ് ചാന്സലറുമായിരുന്ന കെ. ജയകുമാര് ഐ.എ.എസ്. ഡോക്യുമെന്ററി ഫിലീം സംവിധാനം ചെയ്യുന്നു.
ചലച്ചിത്ര സംവിധായകനായ അച്ഛന് എം. കൃഷ്ണന് നായര് മലയാള സിനിമയ്ക്ക് നല്കിയ സംഭാവനകളെ ചരിത്രപരമായി രേഖപ്പെടുത്തുന്ന ഡോക്യുമെന്ററിയുടെ പണിപ്പുരയിലാണ് കെ. ജയകുമാര്.
ഡോക്യുമെന്ററിയുടെ ചിത്രീകരണത്തിന് തുടക്കം കുറിക്കുന്ന ചടങ്ങ് തിരുവനന്തപുരം മെരിലാന്റ് സ്റ്റുഡിയോവില് വെച്ച് കഴിഞ്ഞ ദിവസം നടന്നു.
കേരള സര്ക്കാരിന്റെ പരമോന്നത ചലച്ചിത്ര ബഹുമതിയായ ജെ.സി. ഡാനിയേല് അവാര്ഡ് 2000 ത്തില് ലഭിച്ച കൃഷ്ണന് നായരെക്കുറിച്ചുള്ള ഡോക്യുമെന്ററി നിര്മ്മിക്കുന്നത് കേരള സംസ്ഥാന ചലച്ചിത്ര അക്കാദമിയാണ്.
ശ്രീകുമാരന് തമ്പി, മധു എന്നിവര് എം. കൃഷ്ണന് നായരെക്കുറിച്ചുള്ള ഓര്മ്മകള് പങ്കുവെക്കുന്ന ദൃശ്യങ്ങളുടെ ചീത്രീകരണത്തോടെയാണ് ഡോക്യുമെന്ററിയുടെ ഷൂട്ടിംഗിന് തുടക്കം കുറിച്ചത്.
കൃഷ്ണന് നായരുടെ ശിഷ്യനും സംവിധായകനുമായ കെ. രഘുനാഥ് ദീപം തെളിയിച്ച ചടങ്ങില് കെ. ജയകുമാര്, കേരള ഫിലിം പ്രൊഡ്യൂസേഴ്സ് അസോസിയേഷന് ട്രഷറര് ബി. രാകേഷ്, മെരിലാന്റ് സ്റ്റുഡിയോ ട്രസ്റ്റ് അംഗങ്ങളായ കാര്ത്തികേയന്, മുരുകന്, ചലച്ചിത്ര അക്കാദമി പ്രോഗ്രാം മാനേജര് വിമല് കുമാര് വി.പി, കേരള ലളിതകലാ അക്കാദമി നിര്വ്വാഹക സമിതി അംഗം കാരയ്ക്കാ മണ്ഡപം വിജയകുമാര്, ഡോക്യുമെന്ററി ഛായാഗ്രാഹകന് പുഷ്പന് ദിവാകരന് എന്നിവര് പങ്കെടുത്തു.
അച്ഛനെപ്പറ്റിയുള്ള കെ. ജയകുമാറിന്റെ സ്മരണകളുടെ പുസ്തകരൂപമായ 'കൃഷ്ണ പക്ഷം' രണ്ടു വര്ഷം മുമ്പാണ് പ്രസിദ്ധീകരിച്ചത്. അച്ഛന് മലയാള സിനിമയ്ക്ക് നല്കിയ സംഭാവനകള് ദൃശ്യരൂപത്തിലും രേഖപ്പെടുത്തുക എന്ന ലക്ഷ്യത്തോടെയാണ് ജയകുമാര് ഈ ഡോക്യുമെന്ററി ഒരുക്കുന്നത്.
ജെ.സി ഡാനിയേല് അവാര്ഡ് ജേതാക്കളുടെ സംഭാവനകളെക്കുറിച്ച് ഡോക്യുമെന്ററി നിര്മ്മിക്കുന്ന ചലച്ചിത്ര അക്കാദമിയുടെ പദ്ധതിയുടെ ഭാഗമാണ് ഈ സംരംഭമെന്ന് സെക്രട്ടറി സി. അജോയ് അറിയിച്ചു.
കൃഷ്ണന് നായര് സംവിധാനം ചെയ്ത 'കാവ്യമേള' മികച്ച പ്രാദേശിക ചിത്രത്തിനുള്ള ദേശീയ പുരസ്കാരം നേടിയിരുന്നു. 'സി.ഐ.ഡി.', 'കുട്ടിക്കുപ്പായം', 'കാട്ടുതുളസി', 'കൊച്ചിന് എക്സ്പ്രസ്', 'മൈലാഞ്ചി', 'മണിയറ', 'മണിത്താലി', 'പുഴയൊഴുക്കും വഴി', 'കാലം മാറി കഥ മാറി' തുടങ്ങി മലയാള ചിത്രങ്ങളും എം.ജി. രാമചന്ദ്രന് അഭിനയിച്ച നാല് തമിഴ് ചിത്രങ്ങളും രണ്ട് തെലുങ്ക് സിനിമകളും ചേര്ത്ത് 18 സിനിമകളും ഉള്പ്പെടെ നൂറില്പ്പരം സിനിമകള് അദ്ദേഹം സംവിധാനം ചെയ്തിട്ടുണ്ട്. 2001, മെയ് 10ന് ആണ് കൃഷ്ണന് നായര് അന്തരിച്ചത്.
Photo Courtesy: India Today.