സി എന്‍ എ-
തിരു:
കിഫ്ബി ഫണ്ട് ഉപയോഗിച്ച് 66.88 കോടി രൂപ ചെലവഴിച്ച് തിരുവല്ലം ചിത്രാഞ്ജലി സ്റ്റുഡിയോ ചലച്ചിത്ര നിര്‍മ്മാണത്തിനുള്ള അത്യാധുനിക സൗകര്യങ്ങളോടെ നവീകരണ പ്രവര്‍ത്തനങ്ങള്‍ ആരംഭിച്ചു.
കിഫ്ബി പദ്ധതിയില്‍ ഉള്‍പ്പെടുത്തി 150 കോടി രൂപ മുതല്‍മുടക്കില്‍ നടത്തുന്ന നവീകരണത്തിന്റെ ആദ്യഘട്ട പ്രവര്‍ത്തനങ്ങളുടെ ഉദ്ഘാടനം മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിച്ചു.
നവീകരണ പ്രവൃത്തികള്‍ പൂര്‍ത്തിയാകുന്നതോടെ കൂടുതല്‍ ചലച്ചിത്രങ്ങള്‍ കേരളത്തില്‍ തന്നെ മികവുറ്റ രീതിയില്‍ നിര്‍മ്മാതാക്കള്‍ക്ക് ചെലവ് കുറക്കുറച്ച് നിര്‍മ്മിക്കാന്‍ ഇവിടത്തെ സൗകര്യങ്ങള്‍ ഉപകരിക്കുമെന്ന് മുഖ്യമന്ത്രി പിണറായി വിജയന്‍ വ്യക്തമാക്കി.
ചലച്ചിത്ര വ്യവസായത്തെ പ്രോത്സാഹിപ്പിക്കുന്ന നിലപാടാണ് സര്‍ക്കാര്‍ എക്കാലവും കൈക്കൊണ്ടിട്ടുള്ളത്. ആധുനിക രീതിയിലുള്ള സംവിധാനങ്ങള്‍ സജ്ജമാകുന്നതോടെ ചിത്രാഞ്ജലി സ്റ്റുഡിയോ സിനിമാ നിര്‍മ്മാണത്തിന്റെ കേന്ദ്രമാകുമെന്നും അദ്ദേഹം പറഞ്ഞു.
സാംസ്‌കാരിക വകുപ്പ് മന്ത്രി എ.കെ.ബാലന്‍ ചടങ്ങില്‍ അധ്യക്ഷത വഹിച്ചു. ആധുനികവല്‍ക്കരിക്കുന്ന ചിത്രാഞ്ജലി സ്റ്റുഡിയോ സംസ്ഥാനത്തിന്റെ സിനിമാ മേഖലയ്ക്ക് വലിയ മുതല്‍ക്കൂട്ടാകുമെന്ന് മന്ത്രി പറഞ്ഞു. ആധുനിക സിനിമ നിര്‍മ്മാണത്തിനുള്ള സൗകര്യങ്ങളും സാങ്കേതിക വിദ്യയും സംസ്ഥാനത്ത് തന്നെ ചെയ്യാനാകുന്നത് സിനിമാ മേഖലയുടെ വളര്‍ച്ചക്ക് തന്നെ ആക്കം കൂട്ടുമെന്നും അദ്ദേഹം പറഞ്ഞു.
ആധുനിക റെക്കോഡിംഗ് സംവിധാനം, ഗ്രീന്‍മേറ്റ് സൗണ്ട് സ്‌റ്റേജ്, ആധുനിക രീതിയിലുള്ള എഡിറ്റിംഗ് സ്യൂട്ടുകള്‍, ഡോള്‍ബി അറ്റ്‌മോസ് മിക്‌സിംഗ് തിയേറ്ററുകള്‍, ആധുനിക രീതിയിലുള്ള ഡാവിഞ്ചി ഡിജിറ്റല്‍ ഇന്‍ര്‍മീഡിയറ്റ് കളര്‍ ഗ്രേഡിംഗ് സംവിധാനം, അത്യാധുനിക രീതിയിലുള്ള സിങ്ക് സൗണ്ട് ഉപകരണങ്ങള്‍, ബേസ് ലൈറ്റ് വി5, പുതിയ മോഡലുകളിലുള്ള ക്യാമറകള്‍, സൂം ലെന്‍സ്, സിനിമാ ചിത്രീകരണത്തിനുള്ള മറ്റു ഉപകരണങ്ങള്‍, ഡബ്ബിംഗ് സൗണ്ട് എഡിറ്റിംഗ് സ്യൂട്ടുകള്‍, ചലച്ചിത്ര വിതരണത്തിനുള്ള ഒ.റ്റി.റ്റി. പ്ലാറ്റ്‌ഫോം, അത്യാധുനിക രീതിയിലുള്ള സ്റ്റുഡിയോ ബില്ലിംഗ് സമ്പ്രദായം, കൂടാതെ ഔട്ട്‌ഡോര്‍ ചിത്രീകരണത്തിനുള്ള പരമ്പരാഗത തറവാടുകള്‍, പൂന്തോട്ടം, അമ്പലങ്ങള്‍, പള്ളി, പോലീസ് സ്‌റ്റേഷന്‍, റെയില്‍വേ സ്‌റ്റേഷന്‍, ആവി എന്‍ജിന്‍, ട്രെയിന്‍ ബോഗികള്‍ എന്നിവ ഉള്‍പ്പെടെയുള്ള സെറ്റുകള്‍ തുടങ്ങിയ സൗകര്യങ്ങളാണ് ഈ പദ്ധതി പൂര്‍ത്തിയാകുമ്പോള്‍ ഇവിടെ സാധ്യമാകുന്നത്.
ചലച്ചിത്ര നിര്‍മ്മാണത്തിനാവശ്യമായ ഉപകരണങ്ങള്‍ക്ക് പുറമേ ഇവിടെ ചിത്രീകരിക്കുന്ന സിനിമകള്‍ക്കും ഡോക്കുമെന്ററികള്‍ക്കും സബ്‌സിഡിയും അനുവദിക്കുന്നതായിരിക്കും. ചിത്രാഞ്ജലി സ്റ്റുഡിയോയുടെ ടെക്‌നിക്കല്‍ ഉപകരണങ്ങളും സൗകര്യങ്ങളും ഉപയോഗിച്ചു നിര്‍മ്മിക്കുന്ന ചിത്രങ്ങള്‍ക്ക് അഞ്ചു ലക്ഷം രൂപ വരെയാണ് സബ്‌സിഡിയിനത്തില്‍ ലഭിക്കുക.
അടുത്ത ഒരു വര്‍ഷത്തിനുള്ളില്‍ നിര്‍മ്മാണം പൂര്‍ത്തിയാക്കാനാണ് ലക്ഷ്യമിടുന്നത്. ഇതോടെ മലയാള ചിത്രങ്ങള്‍ക്കു പുറമെ അന്യഭാഷാ, വിദേശ ചിത്രങ്ങളുടെ നിര്‍മ്മാണത്തിനുള്ള കേന്ദ്രമായി ചിത്രാഞ്ജലി മാറും. വഴുതക്കാട് കലാഭവന്‍ തിയേറ്ററില്‍ നടന്ന ചടങ്ങില്‍ ഒ. രാജഗോപാല്‍ എം.എല്‍.എ. മുഖ്യപ്രഭാഷണം നടത്തി.
വാര്‍ഡ് കൗണ്‍സിലര്‍ ഡി. ശിവന്‍കുട്ടി, കേരള ചലച്ചിത്ര വികസന കോര്‍പ്പറേഷന്‍ ചെയര്‍മാന്‍ ഷാജി എന്‍. കരുണ്‍, മാനേജിംഗ് ഡയറക്ടര്‍ എന്‍. മായ, ഫിലിം പ്രൊഡ്യൂസേഴ്‌സ് അസോസിയേഷന്‍ പ്രസിഡന്റ് എം. രഞ്ജിത്ത്, ചലച്ചിത്ര പ്രവര്‍ത്തകരായ സുരേഷ്‌കുമാര്‍, കിരീടം ഉണ്ണി, മധുപാല്‍, കെ.എസ്.എഫ്.ഡി.സി ഡയറക്ടര്‍ ബോര്‍ഡ് അംഗം ബി. അജിത്കുമാര്‍ എന്നിവര്‍ സംസാരിച്ചു.
പുതിയ പ്രൊജക്ടിന്റെ ഭാഗമായി കൊച്ചിയില്‍ ഒരു എക്‌സ്റ്റെന്‍ഷന്‍ ഉണ്ടായിരിക്കും. കൊച്ചി കടവന്ത്രയിലും കണയന്നൂര്‍ താലൂക്കിലുമായി അനുവദിച്ചുക്കിട്ടിയ സ്ഥലത്ത് പോസ്റ്റ് പ്രൊഡക്ഷന്‍ സ്റ്റുഡിയോകളും ഷൂട്ടിംഗ് ഫ്‌ളോറുകളും നിര്‍മ്മിക്കും.
ചിത്രാഞ്ജലി സ്റ്റുഡിയോയുടെ പാക്കേജുമായി സഹകരിച്ച് നിര്‍മ്മിക്കുന്ന സിനിമകള്‍ക്ക് കൊച്ചിയിലേയും തിരുവനന്തപുരത്തേയും ചിത്രാഞ്ജലി സ്റ്റുഡിയോയുടെ ഉപകരണങ്ങളും സൗകര്യങ്ങളും അവരുടെ പാക്കേജിനനുസരിച്ച് ഉപയോഗിക്കാവുന്നതാണ്.
