സി എന്‍ എ-
ചെന്നൈ:
ഉലകനായകന്‍ കമല്‍ ഹാസന് നടത്തിയ ശസ്ത്രക്രിയ വിജയകരമെന്ന് ആശുപത്രി അധികൃതര്‍ അറിയിച്ചു.
ചെന്നൈ ശ്രീ രാമചന്ദ്ര ആശുപത്രിയില്‍ ഇന്ന് രാവിലെയായിരുന്നുശസ്ത്രക്രിയ. വലതുകാലിലെ അസ്ഥിയിലുണ്ടായ അണുബാധയെത്തുടര്‍ന്നാണ് കമല്‍ഹാസനെ ആശുപത്രിയില്‍ പ്രവേശിപ്പിച്ചത്.
അച്ഛന്‍ നന്നായിരിക്കുന്നുവെന്നും നാലോ അഞ്ചോ ദിവസത്തിനു ശേഷം വീട്ടിലേക്കു മടങ്ങുമെന്നും മക്കളായ ശ്രുതി ഹാസനും അക്ഷര ഹാസനും അറിയിച്ചു. കമലഹാസന്റെ അനാരോഗ്യ വാര്‍ത്തയറിഞ്ഞ് അദ്ദേഹത്തിന്റെ സൗഖ്യത്തിനായി പ്രാര്‍ഥിച്ചവര്‍ക്ക് അവര്‍ നന്ദി രേഖപ്പെടുത്തി.
വര്‍ഷങ്ങള്‍ക്ക് മുന്‍പ് നടന്ന ഒരു അപകടത്തെ തുടര്‍ന്ന് കമല്‍ ഹാസന്റെ വലതുകാലില്‍ ഒരു ശസ്ത്രക്രിയ നടത്തിയിരുന്നു. എന്നാല്‍ അന്ന് ഡോക്ടര്‍മാര്‍ നിര്‍ദേശിച്ചിരുന്ന തുടര്‍ ശസ്ത്രക്രിയ നടത്താന്‍ കഴിഞ്ഞിരുന്നില്ലെന്നും ആവശ്യത്തിന് വിശ്രമം എടുത്തില്ലെന്നും കമല്‍ തന്നെ പ്രതികരിച്ചിരുന്നു.
തമിഴ്‌നാട് നിയമസഭാ തെരഞ്ഞെടുപ്പ് അടുത്തിരിക്കെ കഴിഞ്ഞ രണ്ടാഴ്ച സംസ്ഥാനത്തുടനീളം കിലോമീറ്ററോളം അദ്ദേഹം യാത്ര നടത്തുകയും ചെയ്തിരുന്നു. തിരക്കുകളാല്‍ മാറ്റിവച്ച ശസ്ത്രക്രിയയാണ് കാലിന്റെ സ്ഥിതി വഷളായതിനെത്തുടര്‍ന്ന് അടിയന്തരമായി നടത്തേണ്ടിവന്നതെന്നും ആശുപത്രി അധികൃതര്‍ വ്യക്തമാക്കി.
