Editor - MM Kamath
കൊച്ചി:
ആസിഫ് അലിയെ നായകനാക്കി രാജീവ് രവി സംവിധാനം ചെയ്യുന്ന 'കുറ്റവും ശിക്ഷയും' എന്ന പോലീസ് ഇന്‍വെസ്റ്റിഗേഷന്‍ ത്രില്ലര്‍ ചിത്രത്തിന്റെ ട്രെയ്‌ലര്‍ റിലീസായി.
തൊണ്ടിമുതലും ദൃക്‌സാക്ഷിയും എന്ന ചിത്രത്തിലൂടെ ശ്രദ്ധ നേടിയ നടനും പൊലീസ് ഉദ്യോഗസ്ഥനുമായ സിബി തോമസാണ് ഈ ചിത്രത്തിന് കഥ ഒരുക്കിയിരിക്കുന്നത്. മാധ്യമപ്രവര്‍ത്തകനും തിരക്കഥാകൃത്തുമായ ശ്രീജിത്ത് ദിവാകരനും സിബി തോമസും ചേര്‍ന്നാണ് ചിത്രത്തിന്റെ തിരക്കഥ തയ്യാറാക്കിയിരിക്കുന്നത്.
കാസര്‍ഗോഡ് നടന്ന യഥാര്‍ത്ഥ സംഭവങ്ങളെ അടിസ്ഥാനമാക്കിയാണ് ചിത്രം ഒരുക്കിയിരിക്കുന്നത്.
ഷറഫുദീന്‍, സണ്ണി വെയ്ന്‍, അലന്‍സിയര്‍ ലോപ്പസ്, സെന്തില്‍ കൃഷ്ണ, ശ്രിന്ദ തുടങ്ങിയവരാണ് ചിത്രത്തില്‍ മറ്റ് പ്രധാന കഥാപാത്രങ്ങളായി എത്തുന്നത്.
കട്ടി മീശ വെച്ച് ഒരു പക്കാ പോലീസ് ലൂക്കിലേക്ക് മാറിയ ആസിഫ് അലിയുടെ പുതിയൊരു മുഖമായിരിക്കും സിനിമയില്‍ കാണുക.
ഒരു ജ്വല്ലറി മോഷണത്തെ തുടര്‍ന്ന് കേസന്വേഷണത്തിന്റെ ഭാഗമായി കേരള പോലീസിലെ ചെറുപ്പക്കാരായ അഞ്ചു ഉദ്യോഗസ്ഥര് രാജസ്ഥാനിലേക്ക് പോകുന്നു. അവിടുത്തെ പ്രത്യേക ജീവിതാന്തരീക്ഷവും സാഹചര്യങ്ങളും പ്രതികൂലമായി നില്‍ക്കെ ജീവന്‍ പണയപ്പെടുത്തിയും കുറ്റവാളികളെ പിടികൂടാനുള്ള ശ്രമങ്ങളാണ് സിനിമയുടെ പ്രമേയം.
ഫിലിംറോള്‍ പ്രൊഡക്ഷന്സിന്റെ ബാനറില്‍ അരുണ്‍കുമാര്‍ വി. ആറാണ് ഈ ചിത്രം നിര്‍മ്മിക്കുന്നത്. ചിത്രത്തിന്റെ എഡിറ്റിങ്ങ് ബി. അജിത്കുമാര്‍ നിര്‍വ്വഹിക്കുന്നു. ക്യാമറ- സുരേഷ് രാജന്‍, സംഗീതം- ഡോണ്‍ വിന്‍സെന്റ്, കലാസംവിധാനം- സാബു ആദിത്യന്‍. സൗണ്ട്- രാധാകൃഷ്ണന്‍, മേക്കപ്പ്- റോണക്‌സ് സേവ്യര്‍, വസ്ത്രാലങ്കാരം- സുജിത് മട്ടന്നൂര്‍, പ്രൊഡക്ഷന് കണ്ട്രോളര്- ബിനു മണമ്പൂര്‍.
Online PR - CinemaNewsAgency.Com
