CNA
ചെന്നൈ:
രജനികാന്തിന്റെ മകള്‍ ഐശ്വര്യ രജനികാന്ത് സംവിധാനം ചെയ്യുന്ന പുതിയ ചിത്രം 'ലാല്‍ സലാം' എന്ന ചിത്രത്തിന്റെ പൂജ നടന്നു.
ലൈക്കാ പ്രൊഡക്ഷന്സ് സുഭാസ്‌ക്കരന്‍ നിര്‍മ്മിക്കുന്ന 'ലാല്‍സലാമിന്റെ പൂജ സൂപ്പര്‍ താരം രജനികാന്തിന്റെ സാന്നിധ്യത്തിലാണ് ചെന്നൈയിലെ പഞ്ച നക്ഷത്ര ഹോട്ടലില്‍ വെച്ച് നടന്നത്.
ചിത്രത്തിലെ നായകന്മാര്‍ വിഷ്ണു വിശാല്‍, വിക്രാന്ത് എന്നിവരാണ്. രജനികാന്ത് ലാല്‍സലാമില്‍ അതിഥി താരമായി അഭിനയിക്കുന്നുണ്ട്.
നായിക ഇതര അഭിനേതാക്കള്‍ എന്നിവരെ കുറിച്ചുളള ഔദ്യോഗിക പ്രഖ്യാപനം ഉടന്‍ ഉണ്ടാവുമെന്ന് അണിയറക്കാര്‍.
ഐശ്വര്യ 2012 ല്‍ ധനുഷും ശ്രുതി ഹാസനും പ്രധാന വേഷത്തില്‍ അഭിനയിച്ച 'ത്രീ' എന്ന ചിത്രം സംവിധാനം ചെയ്തു കൊണ്ടാണ് സിനിമയിലേക്കെത്തുന്നത്. തുടര്‍ന്ന് 'വെയ് രാജാ വെയ്' എന്ന ചിത്രവും 2017ല്‍ 'സിനിമാ വീരന്‍' എന്ന ഡോക്യുമെന്‍ട്രിയും സംവിധാനം ചെയ്തിട്ടുണ്ട്.
സൗന്ദര്യ രജനികാന്തിന്റെ ആനിമേഷന്‍ ചിത്രമായ 'കൊച്ചടിയാന്‍' എന്ന ചിത്രത്തിലും ഐശ്വര്യ രജനികാന്ത് നിര്‍മ്മിച്ച 'കാല'യിലും രജനികാന്ത് അഭിനയിച്ചിരുന്നു. ഇപ്പോള്‍ ഇതാ 'ലാല്‍ സലാം' എന്ന മറ്റൊരു ചിത്രത്തിനായി അദ്ദേഹം ഐശ്വര്യയുമായി കൈകോര്‍ക്കുകയാണ്.
ഐശ്വര്യ തന്നെ തിരക്കഥയൊരുക്കുന്ന 'ലാല്‍ സലാമിന് എ ആര്‍ റഹ്‌മാന്‍ ആണ് സംഗീതം പകരുന്നത്.
ക്യാമറ: വിഷ്ണു രംഗസ്വാമി, കലാസംവിധാനം: രാമു തങ്കരാജ്, എഡിറ്റിംഗ്: ബി പ്രവീണ്‍ ഭാസ്‌കര്‍, വസ്ത്രാലങ്കാരം: പൂര്‍ണ്ണിമ രാമസ്വാമി.
'പൊന്നിയന്‍ ശെല്‍വന്‍' എന്ന സൂപ്പര്‍ ഹിറ്റിന്റെ വന്‍ വിജയത്തിന് ശേഷം വന്‍ താര ചിത്രങ്ങള്‍ ചെയ്തു കൊണ്ടിരിക്കുന്ന ലൈക പ്രൊഡക്ഷന്സിന്റെ 'ലാല്‍ സലാം' 2023ല്‍ ആയിരിക്കും തിയ്യേറ്ററുകളില്‍ എത്തുക.
Online PR - CinemaNewsAgency.Com
