സി എന്‍ എ-
കൊച്ചി:
പ്രശസ്ത സംവിധായകന്‍ രഞ്ജിത്ത് ബാലകൃഷ്ണന്‍ സംവിധാനം ചെയ്ത ടെലിഫിലിം 'മാധവി' ഏപ്രില്‍ 14ന് രാത്രി 9 മണിക്ക് ഫ്‌ളവേര്‍സ് ടിവിയില്‍ സംപ്രേഷണം ചെയ്യും.
ക്യാപിറ്റോള്‍ തിയേറ്ററിന്റെ ബാനറില്‍, രഞ്ജിത്ത് ബാലകൃഷ്ണനും, കപ്പ സ്റ്റുഡിയോസും ചേര്‍ന്നാണ് 'മാധവി' നിര്‍മ്മിച്ചിരിക്കുന്നത്. കാപ്പ സ്റ്റുഡിയോസ് ആദ്യമായി നിര്‍മ്മാണ രംഗത്തേക്ക് ചുവടു വെയ്ക്കുന്നു എന്ന പ്രത്യേകത കൂടി ഈ ടെലിഫിലിമിനുണ്ട്. നമിത പ്രമോദ് അവതരിപ്പിച്ച 'മാധവി' എന്ന കഥാപാത്രത്തിന്റെ ജീവിതത്തിലൂടെയും, അവളുടെ ജീവിതത്തിലെ ചില തുറന്നു പറച്ചിലുകളിലൂടെ ഉടലെടുക്കുന്ന സംഭവ വികാസങ്ങളിലൂടെയുമാണ് കഥ മുന്നോട്ട് പോവുന്നത്. സമൂഹത്തില്‍ അധികം ചര്‍ച്ച ചെയ്യപ്പെടാത്ത, നിഷിദ്ധമെന്ന് കരുതപ്പെടുന്ന ഒരു വിഷയത്തെ സമര്‍ത്ഥമായി മാധവിയില്‍ പ്രതിപാദിച്ചിരിക്കുന്നു.
കോവിഡ് നിയന്ത്രണങ്ങള്‍ എടുത്തു മാറ്റിയ സമയത്താണ് കോവിഡ് മാനദണ്ഡങ്ങള്‍ പാലിച്ചാണ് മാധവി ചിത്രീകരിച്ചത്.
നവാഗതനായ ചിന്നു കുരുവിളയാണ് വിഷ്വലുകള്‍ പകര്‍ത്തിയത്. നമിത പ്രമോദിന് പുറമെ ശ്രീലക്ഷ്മി, അരുണ്‍ കുര്യന്‍, കുക്കു പരമേശ്വരന്‍ എന്നിവരും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.
മലയാളം, ഹിന്ദി, തമിഴ്, തെലുങ്ക് ചിത്രങ്ങളില്‍ പ്രവര്‍ത്തിച്ചിട്ടുള്ള ജേക്ക്‌സ് ബിജോയിയാണ് മാധവിയുടെ സംഗീതം സംവിധാനം നിര്‍വ്വഹിച്ചിരിക്കുന്നത്.
'ടേക്ക് ഓഫ്', 'ഞാന്‍', 'അയാള്‍ ഞാനല്ല' തുടങ്ങിയ സിനിമകളില്‍ പ്രവര്‍ത്തിച്ചിട്ടുള്ള സന്തോഷ് രാമനാണ് ചിത്രത്തിന്റെ പ്രൊഡക്ഷന്‍ ഡിസൈനര്‍.
നടനും, സംവിധായകനും, 'ഉറുമി', 'നത്തോലി ഒരു ചെറിയ മീനല്ല' തുടങ്ങിയ ചിത്രങ്ങളുടെ കഥാകൃത്തും, 'ഐലന്‍ഡ് എക്‌സ്പ്രസ്സ്', 'പതിനെട്ടാം പടി' എന്നീ ചിത്രങ്ങളുടെ തിരക്കഥയും, സംവിധാനവും നിര്‍വ്വഹിച്ച ശങ്കര്‍ രാമകൃഷ്ണനുമാണ് 'മാധവി'യുടെ അസ്സോസിയേറ്റ് ഡയറക്ടര്‍.
'അശ്വാത്മ', 'സുട്ടു പിഡിക്ക ഉത്തരവ്', 'മാധ', 'ഡിയര്‍ കോംറെയ്ഡ്' തുടങ്ങിയ ചിത്രങ്ങള്‍ക്ക് സൗണ്ട് കൈകാര്യം ചെയ്ത സച്ചിന്‍ സുധാകരനാണ് 'മാധവി'യുടെയും സൗണ്ട് ഡിസൈന്‍ ചെയ്തിരിക്കുന്നത്.
Online PR- CNA.
