സി എന്‍ എ-
കൊച്ചി:
2008ലെ മുംബൈ ഭീകരാക്രമണത്തില്‍ വീരമൃത്യു വരിച്ച മേജര്‍ സന്ദീപ് ഉണ്ണികൃഷ്ണന്റെ ജീവിതം സിനിമയാകുന്നു. തെലുങ്ക് നടനും സംവിധായകനും തിരക്കഥാകൃത്തുമായ അദിവി ശേഷ് ആണ് മേജര്‍ സന്ദീപ് ഉണ്ണികൃഷ്ണനായി സ്‌ക്രീനിലെത്തുന്നത്. 'മേജര്‍' എന്ന് പേരിട്ട സിനിമയുടെ വീഡിയോ,
മേജര്‍ സന്ദീപ് ഉണ്ണികൃഷ്ണന്റെ ചരമവാര്‍ഷിക ദിനത്തില്‍ അണിയറ പ്രവര്‍ത്തകര്‍ പുറത്തു വിട്ടു. 'മേജര്‍ ബിഗിനിംഗ്‌സ്' എന്ന വീഡിയോയില്‍ മേജര്‍ സന്ദീപ് ഉണ്ണികൃഷ്ണനായി അഭിനയിച്ചതിനെ കുറിച്ചാണ് അദിവി ശേഷ് പറയുന്നത്. 'ഗൂഡാചാരി' എന്ന സിനിമയിലൂടെ ശ്രദ്ധേയനായ ശശി കിരണ്‍ ടിക്കയാണ് സിനിമ സംവിധാനം ചെയ്യുന്നത്. പാന്‍ ഇന്ത്യ ചിത്രമായി ഒരുങ്ങുന്ന മേജര്‍ അടുത്ത വര്‍ഷം റിലീസിന് എത്തും.
മേജര്‍ സന്ദീപ് ഉണ്ണികൃഷ്ണന്‍ എങ്ങനെ മരിച്ചു എന്നല്ല, എങ്ങനെ ജീവിച്ചു എന്നാണ് ചിത്രത്തിലൂടെ പറയാന്‍ ശ്രമിച്ചിട്ടുള്ളതെന്ന് അദിവി ശേഷ് വീഡിയോയില്‍ വ്യക്തമാക്കുന്നു.
സിനിമയ്ക്കായി കരാര്‍ ഒപ്പിട്ടതു മുതല്‍ മേജറിന്റെ മാതാപിതാക്കളെ കണ്ടത് വരെയുള്ള യാത്രാ അനുഭവങ്ങളാണ് പറയുന്നത്. അദിവി തന്നെയാണ് ചിത്രത്തിന് തിരക്കഥ എഴുതിയിരിക്കുന്നത്. ശോഭിത ധൂലിപാലിയ, സായി, പ്രകാശ് രാജ്, രേവതി എന്നിവരും ചിത്രത്തില്‍ പ്രധാന വേഷത്തിലെത്തുന്നു. സോണി പിക്‌ചേഴ്‌സ് ഫിലിം ഇന്ത്യ, യുവനടന്‍ മഹേഷ് ബാബുവിന്റെ ജി.എം.ബി. എന്റടെയ്ന്‍മെന്റ്, എ പ്ലസ് എസ് മൂവീസ് എന്നിവര്‍ ചേര്‍ന്നാണ് മേജര്‍ നിര്‍മ്മിയ്ക്കുന്നത്.
രാജ്യത്തെ നടുക്കിയ മുംബൈ ഭീരാക്രമണത്തില്‍ താജ് ഹോട്ടലില്‍ ബന്ദിയാക്കപ്പെട്ടവരെ മോചിപ്പിക്കുന്നതിനിടയിലാണ് എന്‍.എസ്.ജി. കമാന്‍ഡോ ആയ മേജര്‍ സന്ദീപ് ഉണ്ണികൃഷ്ണന്‍ വീരമൃത്യുവരിച്ചത്. അദ്ദേഹത്തെ രാജ്യം അശോകചക്ര നല്‍കി ആദരിച്ചു. വളരെ വൈകാരികമായൊരു കഥാന്തരീക്ഷത്തിലാണ് 'മേജര്‍' എന്ന സിനിമ ഒരുങ്ങുന്നത്.
