സുനിത സുനില്‍-
കൊച്ചി :
'മരട് 357'ലെ നൂറിന്‍ ഷെറീഫും സാജലും അഭിനയിച്ചിരിക്കുന്ന ഗാനം ആണ് ഇപ്പോള്‍ തരംഗമായി കൊണ്ടിരിക്കുന്നത്. നടന്‍ ദിലീപ് ആണ് തന്റെ ഫേസ്ബുക്ക് പേജിലൂടെ ഗാനം പുറത്തുവിട്ടിരിക്കുന്നത്. 'എന്‍ നെഞ്ചിനുള്ളില്‍ കൊഞ്ചാനെത്തും പഞ്ചാരക്കിളിയേ' എന്നു തുടങ്ങുന്ന ഗാനം നൂറിന്‍ ഷെരീഫിന്റെയും സാജലിന്റേയും മനോഹര നൃത്തച്ചുവടുകളെന്ന് പ്രേക്ഷകര്‍.
ഹരി രവീന്ദ്രനും എവലിന്‍ വിന്‍സെന്റെ ചേര്‍ന്നാണ് ഗാനം പാടിയിരിക്കുന്നത്. കെറ്റി മൂവി ഹൗസും ഫോര്‍ മ്യൂസിക്‌സ്, മ്യൂസിക് മഗ്ഗും ചേര്‍ന്ന് മികച്ച ഗായകരെ തിരഞ്ഞെടുക്കാനായി നടത്തിയ മത്സരത്തിലെ വിജയികളാണ് ഹരിയും എവലിനും. രാജീവ് ആലുങ്കല്‍ ഒരുക്കിയ വരികള്‍ക്ക് ഈണം പകര്‍ന്നിരിക്കുന്നത് 4 മ്യൂസിക്‌സ് ആണ്. കേരളത്തില്‍ അടുത്തിടെയുണ്ടായ മരട് ഫല്‍റ്റ് പൊളിക്കല്‍ സംഭവവുമായി ബന്ധപ്പെട്ട് 357ഓളം കുടുംബങ്ങള്‍ക്ക് വീട് നഷ്ടപ്പെട്ട യഥാര്‍ത്ഥ സംഭവമാണ് മരട് 357 പറയുന്നത്.
ആടുപുലിയാട്ടം, പട്ടാഭിരാമന്‍ തുടങ്ങിയ നിരവധി സിനിമകള്‍ ഒരുക്കിയ കണ്ണന്‍ താമരക്കുളമാണ് ചിത്രം സംവിധാനം ചെയ്യുന്നത്. ദിനേശ് പള്ളത്താണ് തിരക്കഥയൊരുക്കുന്നത്. എബ്രഹാം മാത്യു, സുദര്‍ശനന്‍ കാഞ്ഞിരംകുളം എന്നിവര്‍ ചേര്‍ന്നാണ് ചിത്രത്തിന്റെ നിര്‍മ്മാണം.
അനൂപ് മേനോന്‍, ധര്‍മ്മജന്‍ ബോള്‍ഗാട്ടി, ഷീലു എബ്രഹാം, നൂറിന്‍ ഷെരീഫ്, മനോജ് കെ ജയന്‍, ബൈജു സന്തോഷ്, സാജല്‍, സെന്തില്‍ കൃഷ്ണ, സുധീഷ്, ഹരീഷ് കണാരന്‍, കൈലാഷ്, ശ്രീജിത്ത് രവി, ജയന്‍ ചേര്‍ത്തല, സരയു, അഞ്ജലി നായര്‍ തുടങ്ങി നിരവധി താരങ്ങളാണ് സിനിമയില്‍ അഭിനയിക്കുന്നത്. രവി ചന്ദ്രനാണ് ഛായാഗ്രഹണം നിര്‍വ്വഹിച്ചിരിക്കുന്നത്. എഡിറ്റിങ് വി.ടി. ശ്രീജിത്ത്. നൃത്തസംവിധാനം ദിനേശ് മാസ്റ്റര്‍, പ്രസന്നമാസ്റ്റര്‍ എന്നിവര്‍ ചേര്‍ന്നാണ്.
