സി.കെ. അജയ് കുമാര്‍-
ചെന്നൈ:
ഇളയ ദളപതി വിജയ്‌യും വിജയ് സേതുപതിയും 'കൈദി' സംവിധായകന്‍ ലോകേഷ് കനകരാജും ഒന്നിച്ച 'മാസ്റ്റര്‍' എന്ന ചിത്രത്തെ ലോകമെമ്പാടുമുള്ള തമിഴ് സിനിമാ പ്രേമികള്‍ ഏറെ ആകാംഷയോടെ കാത്തിരിക്കയാണ്. കോവിഡ് ലോക്ക്ഡൗണില്‍ കുടുങ്ങി കിടക്കുന്ന ഈ സിനിമയുടെ റിലീസിങ്ങിനെ കുറിച്ച് നിത്യവും അഭ്യുഹങ്ങകളും കിംവദന്തികളും പ്രചരിച്ചു വരികയാണ്. ഈ സന്ദര്‍ഭത്തില്‍ ഔദ്യോഗികമായ വിശദീകരണവുമായി എത്തിയിരിക്കുകയാണ് നിര്‍മ്മാതാക്കളായ എക്‌സ് ബി ക്രിയേറ്റേഴ്‌സ്. ചിത്രം ഓ ടി ടി പ്ലാറ്റുഫോമിലൂടെ റിലീസ് ചെയ്യുന്നതിനായി സമ്മര്‍ദ്ദങ്ങളും ഓഫറുകളും ഉണ്ടെങ്കിലും സിനിമാ വ്യവസായത്തിന്റെ നിലനില്‍പ്പിന് തിയ്യറ്ററുകള്‍ അത്യന്താപേക്ഷിതമാണ് എന്നത് കൊണ്ട് 'മാസ്റ്റര്‍' തിയ്യറ്ററുകളിലെ റിലീസ് ചെയ്യുകയുള്ളൂ എന്ന് നിര്‍മ്മാതാവ് സേവ്യര്‍ ബ്രിട്ടോ വ്യക്തമാക്കുന്നു. വിജയ്‌യും 'മാസ്റ്റര്‍' തിയ്യറ്ററിലേ റിലീസ് ചെയ്യാവു എന്ന ഉറച്ച നിലപാടിലാണത്രെ. ചിത്രത്തിന്റെ കേരളത്തിലെ വിതരണ അവകാശത്തെ കുറിച്ചുള്ള അഭ്യൂഹങ്ങള്‍ക്കും വിശദീകരണം നല്‍കിയ നിര്‍മ്മാതാവ്, ട്രാവന്‍കൂര്‍ ഏരിയയുടെ വിതരണ അവകാശം മാജിക് ഫ്രെയിംസിനും കൊച്ചിന്‍ മലബാര്‍ ഏരിയയുടെ വിതരണ അവകാശം ഫോര്‍ച്യൂണ്‍ സിനിമാസിനുമാണെന്നും വ്യക്തമാക്കി. റിലീസിനായി കേരളത്തില്‍ തിയറ്ററുകള്‍ തുറക്കുന്നതും കാത്തിരിക്കയാണ് 'മാസ്റ്റര്‍'. കാരണം തമിഴകത്തെ പോലെ വലിയ ആരാധക വൃന്ദമാണ് കേരളത്തില്‍ വിജയ്ക്കുള്ളത്. മലയാളിയായ മാളവിക മേനോനാണ് മാസ്റ്ററില്‍ വിജയ്‌യുടെ നായിക. പിആര്‍ഒ- സി.കെ. അജയ് കുമാര്‍.
