സി എന്‍ എ-
കൊച്ചി:
മലബാറിലെ തെയ്യം കലാകാരന്മാരുടെ ജീവിതകഥ പറയുന്ന ചിത്രമാണ് 'മുഖത്തെഴുത്ത്'. ജനാര്ദ്ദനന് കരിവെള്ളൂര്‍ ഗാനരചനയും കലാ സംവിധാനവും സംവിധാനവും നിര്‍വഹിക്കുന്ന ചിത്രമാണിത്. വുഡ് ഗ്രീന്‍സിന്റെ ബാനറില്‍ അഡ്വ: ബെന്നി തോമസ് വടക്കേല്‍ ആണ് ചിത്രം നിര്‍മിക്കുന്നത്. ഡോ: കെ. രാജേഷ് ആണ് ചിത്രത്തിന്റെ രചന നിര്‍വഹിക്കുന്നത്.
പൂര്‍ണമായും തെയ്യം പശ്ചാത്തലമായുള്ള ഈ സിനിമ വര്‍ത്തമാനകാലഘട്ടത്തിന്റെ കഥയാണ് പറയുന്നത്. വിജയന്‍ എന്ന തെയ്യം കലാകാരന്റെ കഥ പറയുന്ന ചിത്രത്തില്‍ കേന്ദ്രകഥാപാത്രത്തെ അവതരിപ്പിക്കുന്നത് ജനാര്ദ്ദനന് കരിവെള്ളൂര്‍ ആണ്. മലയാളത്തിലെ പ്രമുഖ താരങ്ങളും ഇതില്‍ കഥാപാത്രങ്ങളാകുന്നുണ്ട്.
ശില്‍പിയും കലാസംവിധായകനുമായ ജനാര്ദ്ദനന് മലയാള സിനിമയില്‍ 25 വര്‍ഷത്തെ അനുഭവസമ്പത്തുണ്ട്. നേമം പുഷ്പരാജ് ഉള്‍പ്പെടെ നിരവധി പ്രമുഖ സംവിധായകരോടൊപ്പം ഇദ്ദേഹം പ്രവര്‍ത്തിച്ചിട്ടുണ്ട്. ഏറ്റവും കൂടുതല്‍ ഗാന്ധി പ്രതിമകള്‍ നിര്‍മിച്ചതിന് യൂണിവേഴ്‌സല്‍ റെക്കോഡ് ജേതാവാണ് ജനാര്‍ദനന്‍ കരിവെള്ളൂര്‍. 'കൊലുസ്' എന്ന ഷോര്‍ട്ട് ഫിലിം സംവിധാനം ചെയ്ത് അതില്‍ പ്രധാന കഥാപാത്രത്തെ അവതരിപ്പിച്ച് ശ്രദ്ധേയനായിട്ടുണ്ട്. നിരവധി പരസ്യ ചിത്രങ്ങളിലും ഇദ്ദേഹം കലാസംവിധാനം നിര്‍വഹിച്ചിട്ടുണ്ട്.
'മുഖത്തെഴുത്തിന്റെ പൂജയും സ്വിച്ച് ഓണ്‍ കര്‍മവും തിരുവനന്തപുരത്ത് നടന്നു. മന്ത്രി കടകംപള്ളി സുരേന്ദ്രന്‍ ദീപം തെളിയിക്കുകയും സ്വിച്ച് ഓണ്‍ കര്‍മ്മം നിര്‍വഹിക്കുകയും ചെയ്തു. കാഥികന്‍ അയിലം ഉണ്ണികൃഷ്ണന്‍, സിനിമയുടെ അണിയറ പ്രവര്‍ത്തകര്‍ തുടങ്ങിയവര്‍ ചടങ്ങില്‍ പങ്കെടുത്തു.
ചിത്രത്തിന്റെ ഛായാഗ്രഹണം- സുനില്‍ പ്രേം എല്‍. എസ്., സംഗീതം, ആലാപനം- ലൗലി ജനാര്ദ്ദനന്, പിആര്‍ഒ- റഹിം പനവൂര്‍, സ്റ്റില്‍സ്- കണ്ണന്‍ പള്ളിപ്പുറം, ഡിസൈന്‍സ്- ബാലന്‍ പാലായി.
കണ്ണൂരും പയ്യന്നൂരും പരിസരപ്രദേശങ്ങളിലുമായിട്ടാണ് സിനിമയുടെ ചിത്രീകരണം.
