സി എന്‍ എ-
കൊച്ചി:
രാജ്യാന്തര ചലച്ചിത്ര മേളയില്‍ മികച്ച പ്രതികരണങ്ങള്‍ ലഭിച്ച വിപിന്‍ ആറ്റ്‌ലിയുടെ 'മ്യൂസിക്കല്‍ ചെയര്‍' എന്ന ചിത്രം നാളെ (18/02/2021) രാവിലെ പത്ത് മണിക്ക് എറണാകുളം സവിതയില്‍ പ്രദര്‍ശിപ്പിക്കും.
തിരുവനന്തപുരത്ത് ആരംഭിച്ച ഇരുപത്തിയഞ്ചാമത് രാജ്യാന്തര ചലച്ചിത്ര മേളയുടെ ആദ്യ ഘട്ടത്തില്‍ ചിത്രം പ്രദര്‍ശിപ്പിച്ചിരുന്നു.
മലയാളം സിനിമ ടുഡേ വിഭാഗത്തില്‍ പ്രദര്‍ശിപ്പിച്ച ചിത്രത്തിന് ഏറെ പ്രേക്ഷക പ്രശംസ ലഭിച്ചിരുന്നു.
'ഹോംലി മീല്‍സ്', 'ബെന്‍', 'വട്ടമേശ സമ്മേളനം' എന്നീ ചിത്രങ്ങളിലൂടെ ശ്രദ്ധേയനായ സംവിധായകനാണ് വിപിന്‍ ആറ്റ്‌ലി തിരക്കഥ എഴുതി സംവിധാനം ചെയ്ത ചിത്രമാണ് 'മ്യൂസിക്കല്‍ ചെയര്‍'.
32 വയസുള്ള മാര്‍ട്ടിന്‍ എന്ന യുവഎഴുത്തുകാരന്റെ ജീവിതമാണ് സിനിമയുടെ പ്രമേയം. മരണം സംഭവിച്ചേക്കാവുന്ന ആരോഗ്യ പ്രശ്‌നങ്ങള്‍ മാര്‍ട്ടിനുള്ളതിനാല്‍ മരണ ഭയം എപ്പോഴും മാര്‍ട്ടിനെ വേട്ടയാടുകയാണ്. മരണത്തിന്റെ കാരണം തേടിയുള്ള മാര്‍ട്ടിന്റെ യാത്രയാണ് മ്യൂസിക്കല്‍ ചെയറിന്റെ പ്രമേയം. സ്‌പൈറോഗിറയുടെ ബാനറില്‍ അലന്‍ രാജന്‍ മാത്യു ആണ് ചിത്രം നിര്‍മ്മിച്ചിരിക്കുന്നത്.
വിപിന്‍ ആറ്റ്‌ലിയെ കൂടാതെ അലന്‍ രാജന്‍ മാത്യു, പത്മകൃഷ്ണന്‍ അയ്യര്‍ എന്നിവരും പ്രധാന കഥാപാത്രങ്ങളായി എത്തുന്നു.
രാജ്യാന്തര ചലച്ചിത്ര മേളയില്‍ മലയാളം സിനിമ ടുഡേ വിഭാഗത്തിലേക്ക് 12 സിനിമകളാണ് തിരഞ്ഞെടുത്തത്.
'ഗ്രാമവൃക്ഷത്തിലെ കുയില്‍' (കെ പി കുമാരന്‍), 'സീ യു സൂണ്‍' (മഹേഷ് നാരായണന്‍), 'സന്തോഷത്തിന്റെ ഒന്നാം രഹസ്യം' (ഡോണ്‍ പാലത്തറ), 'ലവ്' (ഖാലിദ് റഹ്മാന്‍), 'മ്യൂസിക്കല്‍ ചെയര്‍' (വിപിന്‍ ആറ്റ്‌ലി), 'അറ്റന്‍ഷന്‍ പ്‌ളീസ്' (ജിതിന്‍ ഐസക് തോമസ്), 'വാങ്ക്' (കാവ്യ പ്രകാശ്), 'പക: ദ് റിവര്‍ ഓഫ് ബ്ലഡ്' (നിതിന്‍ ലൂക്കോസ്), 'തിങ്കളാഴ്ച നിശ്ചയം' (സെന്ന ഹെഗ്‌ഡെ), 'പാപം ചെയ്യാത്തവര്‍ കല്ലെറിയട്ടെ' (ശംഭു പുരുഷോത്തമന്‍), 'ആന്‍ഡ്രോയ്ഡ് കുഞ്ഞപ്പന്‍' (രതീഷ് ബാലകൃഷ്ണന്‍ പൊതുവാള്‍), 'കയറ്റം' (സനല്‍കുമാര്‍ ശശിധരന്‍) എന്നിവയാണ് ചിത്രങ്ങള്‍.
