സി എന് എ-
കൊച്ചി:
വി സിനിമാസ് ഇന്റര്നാഷണലിന്റെ ബാനറില് പത്മ ഉദയ് നിര്മ്മിച്ച് നവാഗതനായ തരുണ് മൂര്ത്തി രചനയും സംവിധാനവും നിര്വ്വഹിയ്ക്കുന്ന ചിത്രമാണ് 'ഓപ്പറേഷന് ജാവ'. യഥാര്ത്ഥ സംഭവങ്ങളെ ആസ്പദമാക്കി രചിച്ച തിരക്കഥയാണ് ചിത്രത്തിന്റേത്.
ഒരു റോ ഇന്വെസ്റ്റിഗേഷന് ത്രില്ലര് മൂഡിലുള്ള ഓപ്പറേഷന് ജാവ കാസ്റ്റിംഗിലും അവതരണത്തിലും പുതുമ നിലനിര്ത്തുന്നു എന്നതും ശ്രദ്ധേയമാണ്.
ഇര്ഷാദ് അലി, വിനായകന്, ഷൈന് ടോം ചാക്കോ, അലക്സാണ്ടര് പ്രശാന്ത്, ബിനു പപ്പു, വിനോദ് ബോസ് തുടങ്ങിയവരോടൊപ്പം യുവനിരയിലെ ശ്രദ്ധേയരായ ബാലു വര്ഗീസും, ലുക്ക്മാനും ചിത്രത്തില് പ്രധാന വേഷം കൈകാര്യം ചെയ്യുന്നു. മമിത ബൈജു, ധന്യ അനന്യ, വിനീത കോശി എന്നിവരാണ് ജാവയിലെ സ്ത്രീ സാന്നിദ്ധ്യം.
തീപ്പൊരി സംഭാഷണങ്ങളോ സംഘട്ടന രംഗങ്ങളോ കൊണ്ട് തിരശ്ശീലയ്ക്കു തീ പിടിപ്പിയ്ക്കുന്ന പോലീസുകാരെ ജാവയില് കാണാന് സാധിയ്ക്കില്ല. ഒരു കേസന്വേഷണത്തിനിടയില് നേരിടേണ്ടി വരുന്ന മാനസിക സംഘര്ഷങ്ങളും പിരിമുറുക്കങ്ങളും അനുഭവിയ്ക്കുന്ന കാക്കിയ്ക്കുള്ളിലെ ഒരു കൂട്ടം മനുഷ്യരുടെ കഥയാണ് ജാവ.
ചിത്രത്തിന്റേതായി പുറത്തിറങ്ങിയ ടീസര് ഇതിനോടകം സോഷ്യല് മീഡിയയില് ചര്ച്ചയായിക്കഴിഞ്ഞു.'കേരളാ പോലീസ് എന്ന സുമ്മാവാ' എന്ന ടാഗ് ലൈന് വളരെയധികം ശ്രദ്ധിക്കപ്പെട്ടു. ബിജോയ് സംഗീതം നിര്വ്വഹിച്ചിരിയ്ക്കുന്ന ഓപ്പറേഷന് ജാവയ്ക്ക് ഡോള്ബി അറ്റ്മോസ് മിക്സ് ചെയ്തിരിക്കുന്നത് സൗത്ത് ഇന്ത്യയിലെ തന്നെ പ്രമുഖരായ വിഷ്ണുവും, ശ്രീശങ്കറും (സൗണ്ട് ഫാക്ടര്) ചേര്ന്നാണ്.
ഓ.ടി.ടി റിലീസിന് കാത്തു നില്ക്കാതെ ഫെബ്രുവരി 12ന് ചിത്രം കേരളത്തിലെ തീയറ്ററുകളില് പ്രദര്ശനത്തിനെത്തും.