സി എന് എ-
കാഞ്ഞിരപ്പള്ളി:
മാര്ച്ച് അഞ്ച് വെള്ളി കോട്ടയം ജില്ലയുടെ കിഴക്കന് മേഖലയുടെ കവാടം എന്നു വിശേഷിപ്പിക്കാവുന്ന കാഞ്ഞിരപ്പള്ളി സെന്റ് ഡൊമിനിക്സ് കത്തീഡ്രല് പള്ളിയില് ഒരു സിനിമക്കു തുടക്കമിടുകയാണ്...ചിത്രം 'പാപ്പന്'.
മലയാളത്തിന്റെ ലെജന്റ് ഡയറക്ടര് ജോഷി സംവിധാനം ചെയ്യുന്ന പുതിയ ചിത്രം.
മലയാളി പ്രേക്ഷകന് നിരവധി പുതുമകള്, ദൃശ്യാനുഭവത്തിലൂടെ സമ്മാനിച്ച് വലിയ വിജയത്തിലെത്തിയ 'പൊറിഞ്ചു മറിയം ജോസ് എന്ന ചിത്രത്തിനു ശേഷം ജോഷി സംവിധാനം ചെയ്യുന്ന ചിത്രം കൂടിയാണ് 'പാപ്പന്'.
ഡേവിഡ് കാച്ചപ്പിള്ളി പ്രൊഡക്ഷന്സ് ഇന് അസ്സോസ്സിയേഷന് വിത്ത് ക്യൂബ്സ് ഇന്റര്നാഷണല് ഗ്രൂപ്പിന്റെ ബാനറില് ഡേവിഡ് കാച്ചപ്പിള്ളിയും മുഹമ്മദ് ഷെരീഫും ചേര്ന്നാണ് ഈ ചിത്രം നിര്മ്മിക്കുന്നത്.
തികച്ചും ലളിതമായ ചടങ്ങില് കാഞ്ഞിരപ്പള്ളി അതിരുപതാ വികാരി ജനറല് ഫാദര് ബോബി അലക്സ് മണ്ണംപ്ലാക്കല് സ്വിച്ചോണ് കര്മ്മം നിര്വ്വപിച്ചു.
നിര്മ്മാതാക്കളില് ഒരാളായ ഷെരീഫ് മുഹമ്മദ് ഫസ്റ്റ് ക്ലാപ്പും നല്കി.
പ്രശസ്ത നടി കനിഹയും ഗോകുല് സുരേഷ് ഗോപിയുമാണ് ആദ്യ ഷോട്ടില് അഭിനയിച്ചത്.
അടുത്ത ഷോട്ടില് സുരേഷ് ഗോപിയും പങ്കെടുത്തു.
തങ്ങളുടെ കൂട്ടുകെട്ടില് നിരവധി മികച്ച വിജയങ്ങള് എഴുതിച്ചേര്ത്ത ജോഷി - സുരേഷ് ഗോപി ചിത്രമായ പാപ്പന് എല്ലാ വിഭാഗം പ്രേക്ഷകര്ക്കും ആകര്ഷിക്കും വിധത്തില് ഒരു മാസ് എന്റര്ടെയ്നര് തന്നെയായിരിക്കും.
സുരേഷ് ഗോപിയും മകന് ഗോകുല് സുരേഷ് ഗോപിയും ഒന്നിച്ചഭിനയിക്കുന്ന ആദ്യ ചിത്രമെന്ന പ്രത്യേകതയും ഈ ചിത്രത്തിനുണ്ട്.
'പൂമരം', 'കുങ്ഫൂ മാസ്റ്റര്' എന്നീ ചിത്രങ്ങളിലൂടെ നായികയായി ശ്രദ്ധിക്കപ്പെട്ട നീതാ പിള്ളയാണ് നായിക.
സണ്ണി വെയ്നാണ് ഈ ചിത്രത്തിലെ മറ്റൊരു മുഖ്യമായ കഥാപാത്രത്തെ അവതരിപ്പിക്കുന്നത്.
വിജയരാഘവന്, നൈലാ ഉഷ, ആശാ ശരത്, സാസ്വിക, ജനാര്ദ്ദനന്, ഷമ്മി തിലകന്, ബിനു പപ്പു, വിനീത് തട്ടില് എന്നിവര്ക്കൊപ്പം നിരവധി പുതുമുഖങ്ങളും അണിനിരക്കുന്നു.
'കെയര് ഓഫ് സൈരാ ബാനു' എന്ന ചിത്രത്തിലൂടെ ശ്രദ്ധേയനായ ആര്.ജെ. ഷാനാണ് ഈ ചിത്രത്തിന്റെ തിരക്കഥ രചിക്കുന്നത്.
ജെയ്ക് ബിജോയ്സിന്റേതാണ് സംഗീതം.
അജയ് ഡേവിഡ് കാച്ചപ്പിള്ളി ഛായാഗ്രഹണം നിര്വ്വഹിക്കുന്നു. എഡിറ്റിംഗ്- ശ്യാം ശശിധരന്, കലാസംവിധാനം- നിമേഷ് താനൂര്, മേക്കപ്പ്- റോണക്സ് സേവ്യര്, കോസ്റ്റ്യം ഡിസൈന്- പ്രവീണ് വര്മ്മ, ക്രിയേറ്റീവ് കോണ്ട്രിബ്യൂഷന്- അഭിലാഷ് ജോഷി, ചീഫ് അസ്സോസ്സിയേറ്റ് ഡയറക്ടര്- സിബി ജോസ് ചാലിശ്ശേരി, അസ്സോസ്സിയേറ്റ് ഡയറക്ടേര്സ്- ജിഥുന് രാധാകൃഷ്ണന്, അഭില് ആനന്ദ്, സഹസംവിധാനം- ഷാരുഖ് റഷീദ്, അര്ച്ചനാ രുദ്രാക്ഷ്, വരുണ് ആഘോഷ്.
എക്സിക്കുട്ടീവ് പ്രൊഡ്യൂസേഴ്സ്- സെബാസ്റ്റ്യന് കൊണ്ടു പ്പറമ്പില്, (യു.എസ്.എ) തോമസ് ജോണ് (യു.എസ്.എ)
പ്രൊഡക്ഷന് കണ്ട്രോളര്- മുരുകന്.എസ്., പ്രൊഡക്ഷന് എക്സിക്കുട്ടീവ് വിജയ് ജി.എസ്., പ്രൊഡക്ഷന് മാനേജര് മിഥുന്.
കാഞ്ഞിരപ്പള്ളി, ഈരാറ്റുപേട്ട, പാലാ, എന്നിവിടങ്ങളിലായി ചിത്രീകരണം പൂര്ത്തിയാകുന്ന ഈ ചിത്രം ആഘോഷ് സിനിമാസും, ചാന്ദ് വി മൂവീസും ചേര്ന്നാണ് ചിത്രം പ്രദര്ശനത്തിനെത്തിക്കുന്നു.
-വാഴൂര് ജോസ്. ഫോട്ടോ- നന്ദു.