സി എന് എ-
കൊച്ചി:
വൈദിക പാരമ്പര്യവും കലോപാസനയും കാര്ഷിക സംസ്കൃതിയും എല്ലാം നിറഞ്ഞ് നിന്ന ഓകെ തറവാടിന്റെ സംസ്കൃതിയിലൂടെ ഓര്മ്മകള് അയവിറക്കി ഒരുക്കിയ 'പറയാന് മറന്നത്' പ്രേക്ഷക മനസിലേക്ക്.
പാരമ്പര്യ പ്രൗഢിയും ഗൃഹാതുരത്വവും വിളിച്ചോതുന്ന തറവാട്ട് മുററവും തെങ്ങിന് തോപ്പും വയലേലകളും പശ്ചാത്തലമാക്കി കുടുംബാംഗങ്ങള് വേഷമിട്ട് നിര്മ്മിച്ച ഈ സംഗീത ആല്ബം സ്നേഹ ബന്ധങ്ങളുടെ വൈകാരിക ഓര്മ്മപ്പെടുത്തല് കൊണ്ടും സംഗീത സംവിധാനവും പാശ്ചാത്തലവും എല്ലാം കുടുംബാംഗങ്ങളാല് നിറഞ്ഞ് കവിയുന്നു എന്നതുകൊണ്ടും വേറിട്ടതാകുന്നു.
വടക്കെ മലബാറിലെ കോലത്തുനാട്ടിലെ കോലത്തിരി രാജാവിന്റെ ഏറെ പ്രിയ തറവാടായിരുന്ന ഓണത്താന് കാരക്കാടിന്റെ പെരുമക്ക് ഒരു പൊന് തൂവലാകുകയാണ് ഈ ചിത്രം. നിരവധി സിനിമകള്ക്ക് ലൊക്കേഷനായതും ഒ.കെ. കുടുംബവുമായ അഭേദ്യമായ ബന്ധവുമുള്ള പ്രശസ്തമായ കൈതപ്രം കാനപ്രം തറവാടും ഈ ചിത്രീകരണത്തിലെ പ്രതാപം വിളിച്ചോതുന്നതാണ്.
വൈദിക പാരമ്പര്യവും ആധ്യാത്മിക വിജ്ഞാനവും നിറഞ്ഞ പരേതനായ പരമേശ്വരന് നമ്പൂതിരിയുടെയും ഒ.കെ. വിഷ്ണു നമ്പൂതിരിയുടെയും അനുഗ്രഹത്തോടെ സംഗീതത്തിലും അഭിനയരംഗത്തും നിറസാന്നിധ്യമായ ഒ.കെ.രവിശങ്കറിന്റെ ഭാവനയില് വിരിഞ്ഞതാണ് 'പറയാന് മറന്നത്. ' ചെറുപ്രായത്തില് സംഗീതത്തോടുള്ള ഇഷ്ടം കൊണ്ട് അമ്പലത്തിലെ നിവേദ്യ ചോറുണ്ട് സംഗീത യാത്ര തുടങ്ങി മലയാളി മനസില് ഇടം കണ്ടെത്തിയ രവിശങ്കറിന്റെ മനസില് നിറയുന്ന തറവാടെന്ന, കുടുംബാംഗങ്ങളോടുള്ള വൈകാരിക ബന്ധം ആശയ പ്രമേയത്തിലൂടെ ഈ ചിത്രീകരണം വിളിച്ചോതുന്നു. ഒ.കെ. രവിശങ്കറിനൊപ്പം സംവിധാനവുമായി നര്ത്തകിയും അഭിനേത്രിയും അധ്യാപികയുമായ സഹധര്മ്മിണി താരയും ബാല്യം മുതല് നൃത്ത അഭിനയ കലാരംഗത്ത് ശോഭിച്ച് വരുന്ന ജേഷ്ഠ സഹോദരപുത്രന് പരമേശ്വരനും കുടുംബമരുമകള് ശരണ്യയും ഈ കലോപഹാരത്തില് മുന് നിരയിലുണ്ട്. എണ്പത് തികഞ്ഞ തറവാട്ട് കാരണവര് വിഷ്ണു നമ്പൂതിരി മുതല് പത്ത് വയസുകാരി നിളയും, ആറ് വയസ് മാത്രമുള്ള നക്ഷത്രയും അടക്കം കുടുംബത്തിലെ പ്രായമായവരും കൊച്ചുകുട്ടികളുമെല്ലാം ഈ കൊച്ചു ചിത്രത്തില് വേഷമിട്ടതോടെ ഒ.കെ. തറവാടിന്റെ തായ് വേരുകളിലൂടെയുള്ള തലമുറകളുടെ കൂടിച്ചേരലാകുകയാണ് പറയാന് മറന്നത്. രവിശങ്കറിന്റെ സഹപാഠിയും പ്രവാസിയുമായ ഗോപകുമാര് ചാമുണ്ഡി രചിച്ച ഇതിലെ വരികള് പ്രശസ്ത ഗായകന് ജോസ് സാഗറാണ് ആലപിച്ചത്.
സുനീഷ് ബെന്സണ് ശബ്ദമിശ്രണവും അമല്ജിത്ത് ദൃശ്യമിശ്രണവും സുഭാഷ് പയ്യന്നുര് ഛായാഗ്രഹണവും നിര്വഹിച്ചിരിക്കുന്നു.