CNA
പാലക്കാട്:
നിര്മ്മാതാവില്ലാതെ ഒരു സിനിമ എങ്ങനെ നിര്മ്മിക്കാമെന്നതിന് ഉത്തരവുമായാണ് ഒരുകൂട്ടം കലാ പ്രേമികളുടെ കൂട്ടായ്മ 'പാട്ടുപെട്ടി' എന്ന സിനിമയുടെ ചിത്രീകരണം പൂര്ത്തിയാക്കിയിരിക്കുന്നത്.
പുതുമയാര്ന്ന പരീക്ഷണങ്ങളും മോഹിപ്പിക്കുന്ന ഗ്രാമീണ ദൃശ്യങ്ങളുമായി പൊതുവിലുള്ള താരസങ്കല്പങ്ങളെ മാറ്റി മറിച്ചുകൊണ്ട് മിഥുന് മനോഹര് സംവിധാനം ചെയ്യുന്ന 'പാട്ടുപെട്ടി' എന്ന ചിത്രത്തിന്റെ ചിത്രീകരണം പൂര്ത്തിയായി. The Story of a Singer എന്നാണ് ചിത്രത്തിന്റെ ടാഗ്ലൈന്.
നിര്മ്മാതാവില്ലാതെ പുറത്തിറങ്ങുന്ന സിനിമ എന്ന പ്രത്യേകത എന്തായാലും ഈ ചിത്രത്തിനുണ്ട്. അതുമാത്രമല്ല, കൈകാര്യം ചെയ്തിരിക്കുന്ന വിഷയം കൊണ്ടും പുതു താരങ്ങളുടെ അഭിനയം കൊണ്ടും ഏറെ പ്രേക്ഷകശ്രദ്ധ കിട്ടാനിടയുള്ള ചിത്രമായിരിക്കും ഇത്.
നാട്ടുമ്പുറങ്ങളില് സാധാരണമായ ഹൃദ്യമായ ഒരു പ്രണയകഥയോടൊപ്പം ഗസല് പോലെ മധുരിക്കുന്ന രണ്ടു മനോഹര ഗാനങ്ങളും ശ്രദ്ധേയമായ വൈകാരിക മുഹൂര്ത്തങ്ങളും 'പാട്ടുപെട്ടി'യില് ദൃശ്യവല്ക്കരിച്ചിരിക്കുന്നുണ്ട്.
ചില ന്യൂജെന് താരങ്ങള് ഈ കഥയോട് കാണിച്ച അവഗണനയും ഇങ്ങനെയൊരു ജനകീയ സിനിമയുടെ പിറവിക്ക് നിമിത്തമായിട്ടുണ്ട്.
പണം മുടക്കാന് ആളില്ലെങ്കിലും സിനിമ പിടിക്കാം എന്നു തെളിയിച്ചിരിക്കുകയാണ് ഈ കലാകാരന്മാര്. ആരില് നിന്നും പണം പിരിച്ചെടുക്കാതെ ഓരോ കലാകാരന്മാരുടെയും പങ്കാളിത്തവും കൂട്ടുത്തരവാദിത്വവും സ്വമേധയാ പങ്കിട്ടെടുക്കുന്ന തുകയും അദ്ധ്വാനവുമാണ് സിനിമയുടെ നിര്മ്മിതിക്ക് സഹായകം. ഇങ്ങനെ കിട്ടിയ തുകക്ക് പുറമെ ക്യാമറ, എഡിറ്റിംഗ്, തുടങ്ങിയ സാങ്കേതിക കാര്യങ്ങളിലും ഓരോരുത്തരും ചുമതല കാണിച്ചിട്ടുണ്ട്.
പരപ്പനങ്ങാടി കോവിലകം, കരിങ്കപ്പാറ, തെന്നല, പാലക്കാട് എന്നിവിടങ്ങളിലായി ചിത്രീകരണം പൂര്ത്തിയാക്കിയ 'പാട്ടുപെട്ടി'യുടെ രചന ഭാസ്കരന് കരിങ്കപ്പാറയുടേതാണ്.
ചിത്ര രശ്മി ബുക്സ് പുറത്തിറക്കിയ ഭാസ്കരന് കരിങ്കപ്പാറയുടെ 'ഇന്ന് ഇന്നലെ നാളെ' എന്ന പുസ്തകത്തിലെ കഥയാണ് സിനിമ ആവിഷ്ക്കാരമാകുന്നത്.
ജീവിതമേല്പ്പിച്ച കനത്ത ക്ഷതങ്ങളുടെ തീരാവേദനയുമായി പാട്ടുപെട്ടിക്ക് മുന്നില് കണ്ണീരണിഞ്ഞ് പാടുന്ന പ്രേമന് എന്ന ഗായകനും, സരിത എന്ന് പേരുള്ള ടീച്ചറുമാണ് കേന്ദ്ര കഥാപാത്രങ്ങളാകുന്നത്.
ഭക്തിയും പ്രണയവും കളിയും ചിരിയുമെല്ലാം സമന്വയിച്ച രണ്ടു മനോഹര ഗാനവും പൈതൃകമായി കൊണ്ടു നടക്കുന്ന ഒരു തൊഴിലും, സമൃദ്ധമായ ഗ്രാമകാഴ്ചകളും 'പാട്ടുപെട്ടി' എന്ന ചലച്ചിത്രത്തെ അനശ്വരമാക്കും.
പാട്ടും പച്ചയായ ജീവിതയാഥാര്ഥ്യങ്ങളും ഒരുമിച്ചൊന്നായി ഒഴുകി ഈ ചിത്രത്തെ ഭാവ സാന്ദ്രമാക്കുന്നു.
1980 കാലത്തെ ഗ്രാമീണ ജീവിതം എന്ന ആശയത്തില് ഒരുക്കിയിട്ടുള്ള, പച്ചപ്പും ഹരിതാഭയും കൂട്ടു ജീവിതവും നിറഞ്ഞ, ഈ സിനിമ അന്താരാഷ്ട്ര ചലച്ചിത്ര വേദികള് കൂടി മുന്നില് കണ്ട് ഒരുക്കുന്നതാണ്.
ചലച്ചിത്ര രംഗത്തെ പ്രമുഖരുടെ ഫെയ്സ് ബുക്കിലൂടെയാണ് ട്രെയിലര് റിലീസ് ചെയ്യുക. കേരളത്തില് തെരുവ് നാടകങ്ങളിലൂടെ ശ്രദ്ധേയനായ ആര്. കെ. താനൂര്, എഴുത്തുകാരായ മനോജ് പരപ്പനങ്ങാടി, ഊര്മിള കോട്ടക്കല്, സിന്ധു ചെമ്പ്ര, ഗീതു താനൂര്, മുകേഷ് പരപ്പനങ്ങാടി തുടങ്ങിയവരും പ്രധാന വേഷങ്ങളിലെത്തുന്നു.
ക്യാമറ: രമേശ് പരപ്പനങ്ങാടി, ആര്ട്ട് & പോസ്റ്റര് ഡിസൈന്: ഉണ്ണി ഉഗ്രപുരം, ഗാനരചന: മധു ആദൃശ്ശേരി സുധാകരന് ചൂലൂര്, സംഗീതം: കോട്ടക്കല് മുരളി, പ്രൊഡക്ഷന് എക്സിക്യൂട്ടീവ്: മനു പാണ്ടമംഗലം, അസോസിയേറ്റ് ഡയറക്ടര്: സുവിത് എസ്. നായര്, കൃഷ്ണാ മനോഹര്, ചമയം: നവാസ് തിരൂര്, പിആര്ഒ & സ്റ്റില്: സമദ് കല്ലടിക്കോട്.
വാര്ത്ത പ്രചരണം- എം.എം. കമ്മത്ത്
Online PR - CinemaNewsAgency.Com