സി എന്‍ എ-
കൊച്ചി:
നടിയും ഫാഷന്‍ ഡിസൈനറുമായ പൂര്‍ണിമ ഇന്ദ്രജിത്ത് ബോളിവുഡില്‍ അരങ്ങേറ്റം കുറിക്കാന്‍ ഒരുങ്ങുന്നു. സച്ചിന്‍ കുണ്ടല്‍ക്കര്‍ സംവിധാനംചെയ്യുന്ന 'കോബാള്‍ട്ട് ബ്ലൂ' എന്നചിത്രത്തിലാണ് പൂര്‍ണിമ അഭിനയിക്കുന്നത്. വിവാഹശേഷം സിനിമയില്‍ നിന്ന് മാറി നിന്നിരുന്ന പൂര്‍ണിമ ഇന്ദ്രജിത്ത് വളരെ വര്‍ഷങ്ങള്‍ക്കു ശേഷം സിനിമയില്‍ വീണ്ടും അഭിനയിച്ചു തുടങ്ങുകയാണ്. ആഷിക് അബുവിന്റെ 'വൈറസ്', രാജീവ് രവിയുടെ 'തുറമുഖം' എന്നീ ചിത്രങ്ങളില്‍ പൂര്‍ണിമ അഭിനയിക്കുകയുണ്ടായി. അതിന്റെ തുടര്‍ച്ചയാണ് ഇപ്പോഴത്തെ ഹിന്ദിസിനിമ എന്നുവേണം കരുതാന്‍.
2006 ലെ മറാത്തി നോവലിനെ അടിസ്ഥാനമാക്കി നിര്‍മ്മിക്കുന്ന നായിക പ്രാധാന്യമുള്ള ചിത്രമാണ് 'കോബാള്‍ട്ട് ബ്ലൂ'. ശക്തമായ സ്ത്രീ കഥാപാത്രങ്ങളുള്ള സിനിമയാണിത്. പേയിങ്ങ് ഗെസ്റ്റായി വീട്ടിലെത്തുന്ന ഒരാളുമായി പ്രണയത്തിലാകുന്ന രണ്ട് സഹോദരിമാരെ ചുറ്റിപ്പറ്റിയാണ് കഥാ വികസനം.
അഞ്ജലി ശിവരാമന്‍, ഗീതാഞ്ജലി കുല്‍ക്കര്‍ണി എന്നിവരാണ് സഹോദരിമാരുടെ വേഷത്തില്‍ അഭിനയിക്കുന്നത്. സിനിമയില്‍ വളരെ പ്രധാനപ്പെട്ടൊരു കഥാപാത്രത്തെ പൂര്‍ണിമ അവതരിപ്പിക്കുന്നു.
ഓപ്പണ്‍ എയര്‍ ഫിലിംസ് ഹിന്ദി, ഇംഗ്ലീഷ് ഭാഷകളില്‍ നിര്‍മ്മിക്കുന്ന സിനിമയാണ് 'കോബാള്‍ട്ട് ബ്ലൂ'.
