CNA
മസ്‌ക്കറ്റ്:
പ്രേംനസീര്‍ സുഹൃത് സമിതി ഒമാന്‍ ചാപ്റ്റര്‍ റോയല്‍ കിംഗ്, എലൈറ്റ് ജൂവലറി സഹകരണത്തോടെ ജൂണ്‍ ഏഴിന് വാദി കബീര്‍ മജാന്‍ ഹൈറ്റ്‌സില്‍ പ്രേംസ്മൃതി എന്ന പേരില്‍ മെഗാ ഷോ ഒരുക്കുന്നു. ചലച്ചിത്ര താരം ശ്രീലതാ നമ്പൂതിരിക്ക് പ്രേംനസീര്‍ ചലച്ചിത്ര ശ്രേഷ്ീ പുരസ്‌ക്കാരം ( 50000 രൂപ,ഫലകം, പ്രശസ്തിപത്രം) ചടങ്ങില്‍ മുഖ്യാതിഥിയാകുന്ന ഓസ്‌ക്കാര്‍ ജേതാവ് റസൂല്‍ പൂക്കുട്ടി സമര്‍പ്പിക്കുമെന്ന് വാര്‍ത്താ സമ്മേളനത്തില്‍ സമിതി ഒമാന്‍ ചാപ്റ്റര്‍ പ്രസിഡണ്ട് ഷഹീര്‍ അഞ്ചല്‍ അറിയിച്ചു. ആടുജീവിതം എന്ന സിനിമയിലെ ഒമാന്‍ താരം താലിബ് അല്‍ ബലൂഷി, ആടുജീവിതത്തിലെ ജീവിക്കുന്ന കഥാപാത്രം മുഹമ്മദ് നജീബ് എന്നിവരെയും ആദരിക്കും. ഒമാനിലെ വ്യത്യസ്ത മേഖലകളില്‍ പ്രവര്‍ത്തിക്കുന്നവര്‍ക്ക് പ്രേംനസീര്‍ പുരസ്‌ക്കാരങ്ങളും ടാലന്റ് ഹണ്ട് വിജയികള്‍ക്ക് സമ്മാനങ്ങളും ചടങ്ങില്‍ വെച്ച് സമര്‍പ്പിക്കുമെന്ന് ചാപ്റ്റര്‍ സെക്രട്ടറി കൃഷ്ണരാജ് അഞ്ചാലുംമൂട് അറിയിച്ചു. ചലച്ചിത്രതാരങ്ങളായ ടോണി ആന്റണി, നീനാകുറുപ്പ്, നര്‍ത്തകി സുമി റാഷിക്ക്, ഗായകരായ ഷബ്‌നം റിയാസ്, ഇമ്രാന്‍ ഖാന്‍ എന്നിവരും ഒമാന്‍ ചാപ്റ്റര്‍ കലാപ്രവര്‍ത്തകരും അവതരിപ്പിക്കുന്ന കലാവിരുന്നും ഒരുക്കിയിട്ടുണ്ട്. കേരള സംസ്ഥാന സെക്രട്ടറി തെക്കന്‍ സ്റ്റാര്‍ ബാദുഷ, ഒമാന്‍ ചാപ്റ്റര്‍ രക്ഷാധികാരികളായ അഹമ്മദ് പറമ്പത്ത്, ഹക്കീം, വനിതാ വിഭാഗം സെക്രട്ടറി ഫൗസിയ സനോജ് , ജോയിന്റ് സെക്രട്ടറി സന്ദീപ്, വൈസ് പ്രസിഡണ്ട് പൊന്നു സുരേന്ദ്രന്‍ എന്നിവരും പത്രസമ്മേളനത്തില്‍ സംബന്ധിച്ചു.
